AKP ភ្នំពេញ ថ្ងៃទី១៤ ខែកុម្ភៈ ឆ្នាំ២០២៦ -- ការទទួលរៀបចំធ្វើម្ចាស់ផ្ទះរបស់កម្ពុជានៃការប្រកួតកីឡាវាយកូនបាល់អន្តរជាតិអាស៊ីវគ្គជម្រុះប្រចាំតបន់អាស៊ីអាយុក្រោម១៤ឆ្នាំ (ITF ASIA 14 & UNDER DEVELOPMENT CHAMOPIONSHIPS 2026-Regional Qualifying Event South, Southeast, & East Asia) ពីថ្ងៃទី០៣-១៣ ខែកុម្ភៈ ឆ្នាំ២០២៦ នៅទីលានវាយកូនបាល់ពហុកីឡដ្ឋានជាតិមរតកតេជោបានបិទបញ្ចប់ដោយជោគជ័យជាមួយនឹងការទទួលបានអត្ថប្រយោជន៍ជាច្រើន។

នេះជាការគូសបញ្ជាក់របស់លោក ទេព រិទ្ធិវិទ្ធ អគ្គលេខាធិការ សហព័ន្ធកីឡាវាយកូនបាល់កម្ពុជា និងជាអនុប្រធានសហព័ន្ធកីឡាវាយកូនបាល់អាស៊ីទទួលបន្ទុកប្រធានគណៈកម្មការអភិវឌ្ឍន៍យុវជនក្រោម១៨ឆ្នាំ និងផ្នែកគ្រូបង្វឹក ក្នុងឱកាសបិទបញ្ចប់ដោយជោគជ័យ កាលពីល្ងាចថ្ងៃទី១៣ ខែកុម្ភៈ ឆ្នាំ២០២៦ ក្រោយដំណើរការប្រកួតរយៈពេល២សប្តាហ៍ ដោយមាន១២ប្រទេសចូលរួម សរុបគ្រូបង្វឹក កីឡាករ កីឡាការិនី ៦០នាក់។

លោក ទេព រិទ្ធិវិទ្ធ បានបន្ថែមថា ក្នុងនាមម្ចាស់ផ្ទះរៀបចំ ការប្រកួតកីឡាវាយកូនបាល់អន្តរជាតិប្រចាំតំបន់វ័យក្រោម១៤ឆ្នាំនេះ យើងពិតជាមានមោទនភាព ដែលមាន១២ប្រទេសចូលរួម ដោយបានបង្ហាញសញ្ញាណដ៏ល្អ។នៅក្នុងការប្រកួតអន្តរជាតិនេះ អ្វីដែលជារឿងសំខាន់នោះ គឺកីឡាករ កីឡាការិនីដែលបានចូលរួមប្រកួតបានច្រើន គឺទទួលបានពិន្ទុកាន់តែច្រើន ហើយក្នុងនាមសហព័ន្ធកីឡាវាយកូនបាល់អាស៊ីបានស្នើសុំឱ្យសហព័ន្ធកីឡាវាយកូនបាល់ទាត់អន្តរជាតិ (ITF) ទទួលស្គាល់ពិន្ទុ ដែលទទួលបានក្នុងការប្រកួតកម្រិតអាស៊ីនេះ។

ដូច្នេះ សហព័ន្ធកីឡាវាយកូនបាល់អាស៊ី ក៏ដូចជាសហព័ន្ធកីឡាវាយកូនបាល់កម្ពុជាពិតជាមានកិត្តិយសណាស់ ដែលទទួលបានការរៀបចំធ្វើម្ចាស់ផ្ទះជាមួយនឹងការផ្តល់បទពិសោធន៍ជូនដល់កីឡាករ កីឡាការិនីកម្ពុជាឱ្យបានកាន់តែល្អប្រសើរបន្ថែមទៀតជាមួយកីឡាករ កីឡាការិនីមកពីប្រទេសខ្លាំងៗជាង បើទោះជាគុណភាពបច្ចេកទេសរបស់អត្តពលិកកម្ពុជានៅខ្សោយជាងគេបន្តិចក៏ពិតមែន។ ការទទួលធ្វើម្ចាស់ផ្ទះរបស់កម្ពុជាបានផ្តល់សិទ្ធិដល់កីឡាករ កីឡាការិនីទទួលបានពិន្ទុ សម្រាប់ត្រៀមចូលរួមប្រកួតអន្តរជាតិក្រៅទ្វីបអាស៊ី នាពេលខាងមុខ ដោយចាប់ពីកម្ពុជាជាម្ចាស់ផ្ទះក្នុងខែកុម្ភៈ ឆ្នាំ២០២៦នេះតទៅនឹងត្រូវចាប់អនុវត្តបូកបន្ថែមពិន្ទុរបស់អត្តពលិកសម្រាប់ITF បន្ទាប់ពីលោក ទេព រិទ្ធិវិទ្ធ ក្នុងនាមជាអនុប្រធានសហព័ន្ធកីឡាវាយកូនបាល់អាស៊ី បានស្នើសុំទៅ ITF។

លោក ទេព រិទ្ធិវិទ្ធ បានសង្កត់ធ្ងន់ថា តាមរយៈការបូកពិន្ទុសម្រាប់កម្រិតអន្តរជាតិនេះជាកម្លាំងចិត្តបន្ថែម ក្នុងការជួយជំរុញដល់ទឹកចិត្តកីឡាករ កីឡាការិនីនានាក្នុងអាស៊ី ជាពិសេសកីឡាករ កីឡាការិនីកម្ពុជាឱ្យបន្តកិច្ចខិតខំប្រឹងប្រែងហ្វឹកហាត់ឱ្យកាន់តែខ្លាំងក្លាបន្ថែមទៀត។ លោកលើកឡើងថា សម្រាប់ការហ្វឹកហាត់ ដែលគ្មានការប្រកួត គឺមិនបានដុសខាត់គុណភាពបច្ចេកទេសរបស់កីឡាករ កីឡាការិនីនោះទេ។ ដូច្នេះទោះចាញ់ការប្រកួត ក៏ត្រូវតែប្រកួតឱ្យបានច្រើន ហើយបច្ចេកទេសនឹងឡើងទៅតាមនោះដែរ។

«ចំណុចសំខាន់មួយទៀត សម្រាប់សហព័ន្ធវាយកូនបាល់អាស៊ី ក៏ដូចជាសហព័ន្ធផ្សេងៗទៀត ខ្ញុំចង់ឱ្យមានគ្រូបង្វឹកស្ថិតក្នុងទីលានប្រកួតផ្ទាល់តែម្តង ដោយពីមុនៗ គ្រូបង្វឹកមិនមានសិទ្ធិនៅទីលាន មិនបានគាំទ្រ ឬផ្តល់ព័ត៌មានអ្វីកីឡាករ ឬកីឡាការិនីរបស់ខ្លួននោះទេ នៅពេលកំពុងប្រកួត។ ឥឡូវនេះ ខ្ញុំបានស្នើសុំទៅសហព័ន្ធវាយកូនបាល់អាស៊ីឱ្យមានគ្រូបង្វឹកអាចមានសិទ្ធិឈរនៅលើលានប្រកួតសម្រាប់វ័យអាយុក្រោម១២ឆ្នាំ ដល់ក្រោម១៨ឆ្នាំ ដោយនៅពេលដែលអត្តពលិករបស់ខ្លួនមានកំហុសអាចកែប្រែបានភ្លាមៗ ក្នុងអំឡុងពេលប្រកួត ក្រោយទទួលបានការណែនាំពីគ្រូបង្វឹករបស់ខ្លួនភ្លាមៗ»។ លោក ទេព រិទ្ធិវិទ្ធ បានបន្ថែម។

ចំពោះសមាសភាពកីឡាករ កីឡាការិនីម្ចាស់ផ្ទះកម្ពុជាមាន៤នាក់ គឺកីឡាករកាន់កូនកាត់ខ្មែរ-រស្ស៊ី មីហេអ៊ីឆេវ អាឡិចសេនឌឺ កីឡាករ មានសុផានិត និងកីឡាការិនី ម៉ន មករា និងកីឡាការិនី ស៊្រុន ជំនិតអេសធើ ដឹកនាំដោយគ្រូបង្វឹកកម្ពុជា លោក ឃ្លាំង ពន្លក។ កីឡាករ កីឡាការិនីម្ចាស់ផ្ទះកម្ពុជាត្រូវប្រកួតលើ៤វិញ្ញាសា គឺវិញ្ញាសាឯកត្តជនក្មេងប្រុស-ក្មេងស្រី និងវាយគូក្មេងប្រុស-ក្មេងស្រីក្រោម១៤ឆ្នាំ។

គួរបញ្ជាក់ថា នេះជាការប្រកួតវគ្គជម្រុះប្រចាំតំបន់ ដើម្បីស្វែងរកក្រុមជ័យលាភី២ប្រទេសឡើងទៅប្រកួតនៅជុំផ្តាច់ព្រ័ត្រ នាឆ្នាំ២០២៧ខាងមុខ។ ជាលទ្ធផល រួមមាន៖ អត្តពលិកវៀតណាម និងហ្វីលីពីនជាក្រុមជ័យលាភីនឹងត្រូវឡើងទៅប្រកួតនៅជុំផ្តាច់ព្រ័ត្រ នៅឆ្នាំ២០២៧ខាងមុខ៕

ដោយ ហេង ណាលីន (រូបភាព៖ យឹម សុវឌ្ឍនា)