AKP បាត់ដំបង ថ្ងៃទី១០ ខែកុម្ភៈ ឆ្នាំ២០២៦-- ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន នាថ្ងៃទី១០ ខែកុម្ភ: ឆ្នាំ២០២៦ បានអញ្ជើញដឹកនាំគណៈប្រតិភូក្រសួងចុះពិនិត្យប្រគល់-ទទួលបច្ចេកទេសអនុគម្រោងសាងសង់ប្រព័ន្ធលូរំដោះទឹកកខ្វក់ និងសាងសង់ស្ថានីយចម្រោះទឹកកខ្វក់ក្រុងបាត់ដំបង (ផ្នែកខាងកើតស្ទឹង) និងអនុគម្រោងសាងសង់ប្រព័ន្ធលូ និងស្ថានីយប្រព្រឹត្តកម្មទឹកកខ្វក់ក្រុងបាត់ដំបង (ផ្នែកខាងលិចស្ទឹង) ដោយមានការអញ្ជើញចូលរួមពីឯកឧត្តមអនុរដ្ឋលេខាធិការ ឯកឧត្តមនាយកគម្រោង លោកអគ្គនាយករង និងមន្ត្រីជំនាញនៃអគ្គនាយកដ្ឋានប្រព័ន្ធចម្រោះទឹកកខ្វក់ តំណាងអគ្គនាយកដ្ឋានពាក់ព័ន្ធ ប្រធានមន្ទីរសាធារណការ និងដឹកជញ្ជូន ខេត្តបាត់ដំបង ប្រធានគម្រោង តំណាងក្រុមហ៊ុនទីប្រឹក្សា តំណាងក្រុមហ៊ុនសាងសង់ និងមន្ត្រីបច្ចេកទេសជំនាញពាក់ព័ន្ធ។

គោលបំណងគឺដើម្បីចុះត្រួតពិនិត្យការងារប្រគល់-ទទួលបច្ចេកទេស អនុគម្រោងសាងសង់ ប្រព័ន្ធលូរំដោះទឹកកខ្វក់ និងសាងសង់ស្ថានីយចម្រោះទឹកកខ្វក់ក្រុងបាត់ដំបង (ផ្នែកខាងកើតស្ទឹង) ស្ថិតក្រោមគម្រោងគ្រប់គ្រងកែលម្អបរិស្ថានជុំវិញបឹងទន្លេសាប ជំហាន២ និងអនុគម្រោងសាងសង់ប្រព័ន្ធលូ និងស្ថានីយប្រព្រឹត្តកម្មទឹកកខ្វក់ក្រុងបាត់ដំបង (ផ្នែកខាងលិចស្ទឹង) ស្ថិតក្រោមគម្រោងផ្គត់ផ្គង់ទឹកស្អាត និងអនាម័យខេត្ត ដែលនឹងត្រូវត្រៀមសម្ពោធដាក់ឱ្យប្រើប្រាស់ជាផ្លូវការនាពេលឆាប់ៗខាងមុខនេះ។

សូមបញ្ជាក់ផងដែរថា អនុគម្រោងសាងសង់ប្រព័ន្ធលូរំដោះទឹកកខ្វក់ និងសាងសង់ស្ថានីយចម្រោះទឹកកខ្វក់ ស្ថិតនៅក្នុងគម្រោងគ្រប់គ្រងកែលម្អបរិស្ថានជុំវិញបឹងទន្លេសាបជំហាន២ ដែលគម្រោងផ្នែកខាងកើតស្ទឹងគ្របដណ្តប់លើផ្ទៃដីសរុបចំនួន ៦១២,៣៤ហិកតា ដែលស្ថិតនៅក្នុងសង្កាត់ចំនួន២គឺ ៖ សង្កាត់ព្រែកព្រះស្តេច និងសង្កាត់រត្តនៈ។ ផ្ទៃដីសម្រាប់សាងសង់ស្ថានីយប្រព្រឹត្តកម្មទឹកកខ្វក់មានទំហំ ១០,០២ហិកតា រីឯអនុគម្រោងសាងសង់ប្រព័ន្ធលូ និងស្ថានីយប្រព្រឹត្តកម្មទឹកកខ្វក់ក្រុងបាត់ដំបង (ផ្នែកខាងលិចស្ទឹង) ស្ថិតក្រោមគម្រោងផ្គត់ផ្គង់ទឹកស្អាត និងអនាម័យខេត្ត គ្របដណ្តប់លើផ្ទៃដីសរុបចំនួន ២០០ហិកតា ដែលស្ថិតនៅក្នុងសង្កាត់ចំនួន៥គឺ ៖ សង្កាត់ចំការសំរោង អូចារ ស្លាកែត ទួលលតាឯក និងស្វាយប៉ោ។ ផ្ទៃដីសម្រាប់សាងសង់ស្ថានីយប្រព្រឹត្តកម្មទឹកកខ្វក់មានទំហំ ៨,៩ហិកតា ជាមួយគ្នានេះដែរតាមផែនការគ្រោងទុកប្រព័ន្ធទាំងមូលនឹងត្រូវប្រើប្រាស់បានរយៈពេល២០ឆ្នាំ។ ចំពោះស្ថានីយប្រព្រឹត្តកម្មនៅផ្នែកខាងកើតស្ទឹងប្រើប្រាស់នូវបច្ចេកវិទ្យា LAGOON និងផ្នែកខាងលិចស្ទឹងប្រើប្រាស់បច្ចេកវិទ្យា Trickling Filter Biological Treatment៕

ដោយ ទេស ច័ន្ទសុធារី (ប្រភព៖ ក្រសួងសាធារណការ)