AKP ភ្នំពេញ ថ្ងៃទី១០ ខែកុម្ភៈ ឆ្នាំ២០២៦-- ឯកឧត្ដម អ៊ុង សម្បត្តិ អគ្គលេខាធិការ និងជាសមាជិកអចិន្ត្រៃយ៍ក្រុមប្រឹក្សាសកម្មភាពជនពិការ នៃក្ររសួងសង្គមកិច្ច អតីតយុទ្ធជន និងយុវនីតិសប្បទា បានដឹកនាំកិច្ចប្រជុំលើកទី៤ ក្រុមការងារផ្នែកបរិយាបន្នពិការភាព នៅសណ្ឋាគារកាំបូឌីយ៉ាណា នាថ្ងៃទី១០ ខែកុម្ភៈ ឆ្នាំ២០២៦។

ឯកឧត្ដម អ៊ុង សម្បត្តិ បានលើកឡើងថា កិច្ចប្រជុំនេះមានគោលបំណងចំនួនពីរគឺ៖ ទី១. ដើម្បីបង្ហាញពីវឌ្ឍនភាពសំខាន់ៗ ក្នុងរយៈពេល ៦ខែចុងក្រោយ ខែកក្កដា ឆ្នាំ២០២៥ ដល់ខែធ្នូ ឆ្នាំ២០២៥ រួមទាំងមេរៀនសំខាន់ៗដែលបានរៀនសូត្រ និងបញ្ហាប្រឈមនៃផ្នែក បរិយាបន្នពិការភាព និងទី២. ចែករំលែក និងពិភាក្សាអំពីសមិទ្ធផលសំខាន់ៗ បញ្ហាប្រឈម និងទិសដៅបន្ត លើប្រធានបទ កម្មវិធីកំណត់អត្តសញ្ញាណកម្មជនមានពិការភាព និងការធ្វើសមកាលកម្មជាមួយប្រព័ន្ធផ្សេងទៀត ការអនុវត្តកម្មវិធីឌីជីថលសម្រាប់ការគ្រោងថវិការលើផ្នែកបរិយាបន្នពិការភាពថ្នាក់ឃុំ សង្កាត់ ការអភិវឌ្ឍសមត្ថភាពអង្គការតំណាងជនមានពិការភាព (OPDs) (ស្ថាប័ន និងបច្ចេកទេស) និងការចូលរួមក្នុងការពិភាក្សាដែលពាក់ព័ន្ធ ការពិភាក្សាអំពីឱកាសក្នុងការពង្រឹងបរិយាបន្នពិការភាព (DI) ក្នុងវិស័យសុខាភិបាល។

កិច្ចប្រជុំនេះក៏មានការអញ្ជើញចូលរួមពីលោកស្រី ហ៊ែល សុធារតន៍ អ្នកគ្រប់គ្រងផ្នែកកិច្ចសហប្រតិបត្តិការអភិវឌ្ឍន៍ និងជាតំណាងស្ថានទូតអូស្រ្តាលីប្រចាំកម្ពុជា លោកស្រី Sophia Cason ប្រធានកម្មវិធី ACCESS 2 ឯកឧត្ដម លោកជំទាវ លោក លោកស្រី ជាក្រុមការងារផ្នែកបរិយបន្នពិការភាពសរុបចំនួន ៣៣នាក់៕

ដោយ ណយ នឿន (ប្រភព៖ ក្រុមប្រឹក្សាសកម្មភាពជនពិការ)