AKP កំពង់ស្ពឺ ថ្ងៃទី១០ ខែកុម្ភៈ ឆ្នាំ២០២៦-- ឯកឧត្តម ស្លេះ អាល់ហ្វីន អនុរដ្ឋលេខាធិការក្រសួងព័ត៌មាន នារសៀលថ្ងៃទី១០ ខែកុម្ភៈ ឆ្នាំ២០២៦ បានដឹកនាំកិច្ចប្រជុំ ផ្សព្វផ្សាយលទ្ធផលសន្និបាតបូកសរុបការងារព័ត៌មាន និងសោតទស្សន៍ ឆ្នាំ២០២៥ ព្រមទាំងមានការចូលរួមពីលោកជំទាវប្រធានមន្ទីរព័ត៌មានខេត្ត អនុប្រធានមន្ទីរ ប្រធាន អនុប្រធានការិយាល័យ មន្ត្រីរាជការ និងមន្ត្រីជាប់កិច្ចសន្យាជាច្រើនរូបទៀត នៅសាលប្រជុំនៃមន្ទីរព័ត៌មានខេត្តកំពង់ស្ពឺ។‎ 

‎ក្នុងឱកាសនោះ ឯកឧត្តម ស្លេះ អាល់ហ្វីន បានថ្លែងនូវការកោតសរសើរចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីនៃមន្ទីរព័ត៌មានខេត្តកំពង់ស្ពឺ នាឆ្នាំកន្លងមក។ ដើម្បីឆ្លើយតបទៅនឹងបរិបទនៃការវិវត្តន៍ផ្នែកព័ត៌មានឌីជីថល ឯកឧត្តមបានដាក់ចេញនូវអនុសាសន៍ និងទិសដៅការងារសំខាន់ៗចំនួន ៧ ចំណុច សម្រាប់អនុវត្តក្នុងឆ្នាំ២០២៦ រួមមាន៖ ‎១. ការអនុវត្តអនុក្រឹត្យលេខ ២១៧៖ បន្តពង្រឹងការអនុវត្តឱ្យមានប្រសិទ្ធភាពខ្ពស់។ ‎២. ការរៀបចំផែនការសកម្មភាពប្រចាំឆ្នាំ៖ ត្រូវរៀបចំ និងអនុវត្តផែនការឱ្យបានហ្មត់ចត់ និងស្របតាមគោលដៅក្រសួង។ ‎៣. ការពង្រឹងគុណភាពផ្សព្វផ្សាយ៖ លើកកម្ពស់ខ្លឹមសារព័ត៌មានឱ្យកាន់តែមានគុណភាព សុក្រឹតភាព និងទាក់ទាញ។ ‎៤. ការគ្រប់គ្រងព័ត៌មាន និងសាធារណមតិ៖ តាមដាន និងគ្រប់គ្រងរំហូរព័ត៌មានឱ្យបានទាន់សម័យកាល ដើម្បីឆ្លើយតបមតិសាធារណៈបានទាន់ពេល។ ៥. ការងារកែលម្អរនិងអភិវឌ្ឍន៍៖ បន្តកែលម្អ និងអភិវឌ្ឍន៍អង្គភាពឱ្យមានការរីកចម្រើនជាលំដាប់។ ‎៦. ការជំរុញកសាងមូលធនមនុស្ស៖ យកចិត្តទុកដាក់លើការបណ្តុះបណ្តាល និងបង្កើនសមត្ថភាពមន្ត្រី។ ‎៧. ការពង្រឹង និងពង្រីកការទំនាក់ទំនងនិងកិច្ចសហប្រតិបត្តិការ បង្កើនទំនាក់ទំនងល្អជាមួយស្ថាប័នពាក់ព័ន្ធ និងដៃគូសហការនានា។

‎
‎ឯកឧត្តមបានបន្តទៀតថា មន្ត្រីព័ត៌មានទាំងអស់ ត្រូវតែដើរឱ្យទាន់នូវការវិវត្តនៃបច្ចេកវិទ្យាឌីជីថល និងមានភាពបុរេសកម្មក្នុងការក្ដាប់ព័ត៌មាន យើងមិនត្រឹមតែជាអ្នកផ្សព្វផ្សាយប៉ុណ្ណោះទេ ប៉ុន្តែគឺជាអ្នកតម្រង់ទិសសាធារណមតិ និងជាស្ពានចម្លងដ៏រឹងមាំរវាងរាជរដ្ឋាភិបាល និងប្រជាពលរដ្ឋ ដើម្បីធានាបាននូវសុខសន្តិភាព និងការអភិវឌ្ឍ។

‎
‌‎ក្នុងឱកាសដ៏មានសារៈសំខាន់នោះដែរ ឯកឧត្តម ស្លេះ អាល់ហ្វីន បានសម្របសម្រួលឱ្យមានការបែងចែកជា "ក្រុមពិភាក្សា" ដើម្បីពិគ្រោះយោបល់ និងរៀបចំផែនការសកម្មភាពសម្រាប់ឆ្នាំ២០២៦។ ការបែងចែកក្រុមនេះមានគោលបំណងសំខាន់ៗដើម្បីឱ្យមន្ត្រីតាមការិយាល័យជំនាញនីមួយៗ បញ្ចេញមតិយោបល់ និងលើកឡើងពីបញ្ហាប្រឈមជាក់ស្តែង។ រៀបចំផែនការសកម្មភាពដែលស្របទៅតាមស្ថានភាពភូមិសាស្ត្រ និងតម្រូវការព័ត៌មាននៅក្នុងខេត្តកំពង់ស្ពឺ និងធ្វើយ៉ាងណាឱ្យផែនការឆ្នាំ២០២៦ មានភាពប្រទាក់ក្រឡាគ្នា ងាយស្រួលអនុវត្ត និងមានប្រសិទ្ធភាពខ្ពស់។

‎
‎ឯកឧត្តមបានបញ្ជាក់ថា លទ្ធផលដែលទទួលបានពីការពិភាក្សាតាមក្រុមនេះ នឹងក្លាយជាមូលដ្ឋានគ្រឹះដ៏រឹងមាំក្នុងការកសាង "ផែនការសកម្មភាពប្រចាំឆ្នាំ" ឱ្យកាន់តែមានលក្ខណៈគ្រប់ជ្រុងជ្រោយ ដើម្បីឆ្លើយតបទៅនឹងទិសដៅការងារ ៧ ដាក់ចេញ៕

ដោយ លឹម សាន្ត