AKP ភ្នំពេញ ថ្ងៃទី១០ ខែកុម្ភៈ ឆ្នាំ២០២៦--កីឡាករ កីឡាការិនីសូហ្វតិន្នីសកម្ពុជាដណ្តើមបានមេដាយសរុបចំនួន ៥គ្រឿង (ប្រាក់២ និងសំរឹទ្ធ៣) នៅក្នុងការប្រកួតកីឡាសូហ្វតិន្នីសជើងឯកយុវជនអាស៊ី លើកទី២ (The 2nd Asian Junior Soft Tennis Championship 2026) នៅប្រទេសឥណ្ឌា ដែលបានបិទបញ្ចប់ការប្រកួតជាផ្លូវការហើយ នៅថ្ងៃទី៩ ខែកុម្ភៈ ឆ្នាំ២០២៦។ 

មន្ត្រីសហព័ន្ធកីឡាសូហ្វតិន្នីសកម្ពុជាបានឱ្យដឹងថា អត្តពលិកជ័យលាភី ដែលប្រជែងបានមេដាយទាំង៥គ្រឿង រួមមាន៖ កីឡាការិនី ឆាន ឈាវហ៊ួយ ដណ្តើមបានមេដាយប្រាក់១គ្រឿង លើវិញ្ញាសាវាយឯកត្តជនយុវនារីអាយុក្រោម១៨ឆ្នាំ។ កីឡាករ យ៉ន-ឈុនលាភ ហ៊ីម-ដារ៉ាពេជ្រ ទីម-ច័ន្ទកក្កដា កីឡាការិនី ឃុន-ចន្ទរ៉ូសិកា ឆាន-ឈាវហួយ និងឈន-ច័ន្ទកញ្ញា ដណ្តើមបានមេដាយប្រាក់១គ្រឿងលើវិញ្ញាសាវាយក្រុមចម្រុះបុរស-នារី។

កីឡាការិនី ឃុន ចន្ទរ៉ូសិកា និងកីឡាការិនី ឆាន ឈាវហ៊ួយ ដណ្តើមបានមេដាយសំរឹទ្ធ១គ្រឿង លើវិញ្ញាសាវាយគូយុវនារីក្រោម២១ឆ្នាំ។ កីឡាការិនី ឆាន ឈាវហ៊ួយ និងកីឡាការិនី ឈន ច័ន្ទកញ្ញា ដណ្តើមបានមេដាយសំរឹទ្ធ១គ្រឿងលើវិញ្ញាសាវាយគូយុវនារីអាយុក្រោម១៨ឆ្នាំ ខណៈវិញ្ញាសាវាយក្រុមនារីដណ្តើមមេដាយសំរឹទ្ធ១គ្រឿងដោយកីឡាការិនី ឃុន ចន្ទរ៉ូសិកា កីឡាការិនី ឆាន ឈាវហួយ និងកីឡាការិនី ឈន ច័ន្ទកញ្ញា។

គួរបញ្ជាក់ថា នេះជាលើកទី២ ដែលក្រុមជម្រើសជាតិសូហ្វតិន្នីសកម្ពុជាបានចូលរួមប្រកួតប្រជែងក្នុងព្រឹត្តិការណ៍ជើងឯកយុវជនអាស៊ី ដោយកាលពីចូលរួមលើកទី១ នៅប្រទេសហ្វីលីពីនជាម្ចាស់ផ្ទះ ក្រុមកម្ពុជាធ្លាប់ដណ្តើមបានមេដាយសំរឹទ្ធចំនួន២គ្រឿង។ ចំពោះការឈ្នះមេដាយរហូតដល់៥គ្រឿង (ប្រាក់២ និងសំរឹទ្ធ៣) នៅឆ្នាំ២០២៦នេះ ជាការបំបែកទំព័រប្រវត្តិសាស្រ្តថ្មីរបស់សហព័ន្ធកីឡាសូហ្វតិន្នីសកម្ពុជា ដែលអត្តពលិកអាចប្រជែងបានមេដាយ និងភាគច្រើនអាចឡើងទៅកាន់វគ្គផ្តាច់ព្រ័ត្រ (Final ) បានពុំធ្លាប់មានទៀតផង។ សហព័ន្ធកីឡាសូហ្វតិន្នីសកម្ពុជាបានបញ្ជូនគ្រូបង្វឹកម្នាក់ គឺលោក យី សារិន និងកីឡាករ កីឡាការិនី០៦នាក់។

 ព្រឹត្តិការណ៍ប្រកួតកីឡាសូហ្វតិន្នីសជើងឯកយុវជនអាស៊ី លើកទី២ ឆ្នាំ២០២៦ នៅប្រទេសឥណ្ឌា ត្រូវបានប្រារព្ធធ្វើឡើងពីថ្ងៃទី០៣-០៩ ខែកុម្ភៈ ឆ្នាំ២០២៦ ដោយមាន៩ប្រទេសចូលរួម ដែលមានដូចជា កម្ពុជា ចិន ឥណ្ឌូណេស៊ី ជប៉ុន សាធារណរដ្ឋកូរ៉េ ឡាវ ថៃ ម៉ុងហ្គោលី និងម្ចាស់ផ្ទះឥណ្ឌា៕

ដោយ ហេង ណាលីន (រូបភាព៖ សហព័ន្ធ)