AKP ភ្នំពេញ ថ្ងៃទី១០ ខែកុម្ភៈ ឆ្នាំ២០២៦ -- ឯកឧត្តម ជា ច័ន្ទបរិបូរណ៍ ឯកអគ្គរាជទូតកម្ពុជាប្រចាំសាធារណរដ្ឋប៊ុលហ្គារី និងសាធារណរដ្ឋស៊ីប បានគូស បញ្ជាក់ជាថ្មីនូវការប្តេជ្ញាចិត្តដ៏មុតមាំ របស់ព្រះរាជាណាចក្រកម្ពុជា ក្នុងការពង្រឹង និងពង្រីកទំនាក់ទំនង និងកិច្ចសហប្រតិបត្តិការទ្វេភាគី ជាមួយសាធារណរដ្ឋស៊ីប ឱ្យកាន់តែរឹងមាំ និងមានប្រសិទ្ធភាព ក្នុងក្របខ័ណ្ឌទ្វេភាគី តំបន់ និងអន្តរជាតិ។ ការគូសបញ្ជាក់របស់ឯកឧត្ដមឯកអគ្គរាជទូតបែបនេះ ក្នុងឱកាសជួបជាមួយឯកឧត្តម Nikos Christodoulides ប្រធានាធិបតីនៃសាធារណរដ្ឋស៊ីប ដែលទទួលសារតាំងពីឯកអគ្គរាជទូតថ្មីនៃព្រះរាជាណាចក្រកម្ពុជា នាថ្ងៃទី៩ ខែកុម្ភៈ ឆ្នាំ២០២៦ នៅសាធារណរដ្ឋស៊ីប។

ឯកឧត្តម ជា ច័ន្ទបរិបូរណ៍ បានលើកឡើងពីការអនុញាតនាំមកនូវការផ្តាំផ្ញើសាកសួរសុខទុក្ខដ៏កក់ក្តៅ និងសេចក្តីគោរពរាប់អានយ៉ាងខ្ពង់ខ្ពស់ ពីព្រះមហាក្សត្រនៃព្រះរាជាណាចក្រកម្ពុជា ពីប្រធានព្រឹត្តសភា ប្រធានរដ្ឋសភា និងពីសម្តេចនាយករដ្ឋមន្រ្តី នៃព្រះរាជាណាចក្រកម្ពុជា ជូនចំពោះឯកឧត្តម និងប្រជាជននៃសាធារណរដ្ឋស៊ីប។ 

ឯកឧត្ដមឯកអគ្គរាជទូតក៏បានបញ្ជាក់ឡើងវិញនូវមិត្តភាព និងទំនាក់ទំនងល្អប្រសើររវាងព្រះរាជាណាចក្រកម្ពុជា និងសាធារណរដ្ឋស៊ីប ដែលត្រូវបានកសាង និងបន្តអភិវឌ្ឍន៍ឡើងលើមូលដ្ឋាននៃការគោរពគ្នាទៅវិញទៅមក ការយល់ចិត្តគ្នា និងការប្តេជ្ញារួមគ្នា ចំពោះគោលការណ៍មូលដ្ឋាននៃអធិបតេយ្យភាព សមភាព សន្តិភាព និងការគោរពច្បាប់អន្តរជាតិ។ ទន្ទឹមនេះ ព្រះរាជាណាចក្រកម្ពុជា ផ្តល់សារៈសំខាន់យ៉ាងខ្លាំង ចំពោះការពង្រឹង និងពង្រីកទំនាក់ទំនងទ្វេភាគីជាមួយសាធារណរដ្ឋស៊ីប ហើយមានឆន្ទៈនិងការប្តេជ្ញាចិត្តយ៉ាងពេញលេញ ក្នុងការលើកកម្ពស់កិច្ចសហប្រតិបត្តិការឱ្យកាន់តែសកម្ម ដោយផ្អែកលើមិត្តភាព និងជាដៃគូសហប្រតិបត្តិការ ដែលមានអត្ថប្រយោជន៍រួម ឆ្ពោះទៅមុខយ៉ាងចីរភាព។

ឯកឧត្ដមឯកអគ្គរាជទូតបានបញ្ជាក់ផងដែរថា ក្នុងវិស័យនយោបាយ និងការទូត កម្ពុជា សូមស្វាគមន៍ និងគាំទ្រយ៉ាងពេញទំហឹង ចំពោះការបង្កើនការពិគ្រោះយោបល់នយោបាយជាទៀងទាត់ រវាងស្ថាប័នពាក់ព័ន្ធនៃប្រទេសទាំងពីរ ដើម្បីផ្តល់ជាវេទិកាសម្រាប់ការផ្លាស់ប្តូរទស្សនៈ និងការយល់ឃើញលើបញ្ហាទ្វេភាគី តំបន់ និងអន្តរជាតិ ដែលមានការចាប់អារម្មណ៍រួម។ ជាមួយគ្នានេះ កម្ពុជា ផ្តល់តម្លៃខ្ពស់ចំពោះការគាំទ្រគ្នាទៅវិញទៅមក ក្នុងក្រប ខ័ណ្ឌពហុភាគី រួមទាំងអង្គការសហប្រជាជាតិ និងវេទិកា អាស៊ី–អឺរ៉ុប (ASEM) ដើម្បីលើកកម្ពស់ពហុភាគីនិយម និងសណ្តាប់ធ្នាប់អន្តរជាតិផ្អែកលើច្បាប់។

ទាក់ទងនឹងកិច្ចសហប្រតិបត្តិការ សេដ្ឋកិច្ច និងពាណិជ្ជកម្ម ឯកឧត្ដមឯកអគ្គរាជទូតបានជម្រាបជូនថា កម្ពុជា សូមលើកឡើងអំពីសក្តានុពល និងឱកាសវិនិយោគដ៏ទូលំទូលាយ ក្នុងវិស័យសំខាន់ៗ រួមមាន កសិឧស្សាហកម្ម ឧស្សាហកម្មផលិតសម្លៀកបំពាក់ សេវាកម្ម និងឡូជីស្ទិក។  ក្នុងវិស័យអប់រំ វប្បធម៌ និងការអភិវឌ្ឍធនធានមនុស្ស កម្ពុជា មានឆន្ទៈខ្ពស់ ក្នុងការជំរុញកិច្ចសហប្រតិបត្តិការឱ្យកាន់តែជិតស្និទ្ធ តាមរយៈការផ្លាស់ប្តូរអប់រំ កម្មវិធីអាហារូបករណ៍ ការផ្លាស់ប្តូរនិស្សិត និងសាស្រ្តាចារ្យ ព្រមទាំងការផ្លាស់ប្តូរវប្បធម៌ ដែលជាមូលដ្ឋានសំខាន់សម្រាប់ការយល់ចិត្តគ្នាដ៏ជ្រាលជ្រៅ និងការចងមិត្តភាពយូរអង្វែង រវាងប្រជាជននៃប្រទេសយើងទាំងពីរ។

ចំពោះវិស័យទេសចរណ៍ និងការតភ្ជាប់ប្រជាជនទៅប្រជាជន ក៏ជាវិស័យមានសក្តានុពលខ្ពស់ផងដែរ។ កម្ពុជា ត្រៀមខ្លួនជាស្រេច ក្នុងការលើកកម្ពស់កិច្ចសហប្រតិបត្តិការ រវាងអាជ្ញាធរទេសចរណ៍ និងវិស័យឯកជននៃប្រទេសទាំងពីរ ព្រមទាំងស្វាគមន៍ការពិភាក្សាបន្ថែម អំពីវិធានការសម្រួលទិដ្ឋាការ ដើម្បីជំរុញការធ្វើដំណើរ និងការផ្លាស់ប្តូរប្រជាជនទៅប្រជាជនឱ្យកាន់តែសកម្ម។

ឯកឧត្ដមឯកអគ្គរាជទូត ជា ច័ន្ទបរិបូរណ៍ បានបន្ថែមថា ក្នុងទស្សនៈអនាគត កម្ពុជា មានចំណាប់អារម្មណ៍យ៉ាងខ្លាំង ក្នុងការពង្រីកកិច្ចសហប្រតិបត្តិការ ក្នុងវិស័យកំពុងលេចធ្លោ រួមមាន សេដ្ឋកិច្ចឌីជីថល ថាមពលបៃតង សេដ្ឋកិច្ចសមុទ្រ និងការអភិវឌ្ឍប្រកបដោយចីរភាព ដែលស្របតាមអាទិភាពអភិវឌ្ឍន៍ជាតិ និងគោលដៅអភិវឌ្ឍន៍ប្រកបដោយចីរភាពសកល។ ឯកឧត្ដមក៏មានទំនុកចិត្តយ៉ាងមុតមាំថា ក្រោមការដឹកនាំដ៏ឈ្លាសវៃ និងមានចក្ខុវិស័យរបស់ឯកឧត្តមប្រធានាធិបតី ទំនាក់ទំនងរវាងប្រទេសទាំងពីរ នឹងបន្តរីកចម្រើនយ៉ាងស្ថិរភាព និងមានអនាគតភ្លឺស្វាង។

ក្នុងឱកាសនោះដែរ ឯកឧត្តម Nikos Christodoulides ប្រធានាធិបតីនៃសាធារណរដ្ឋស៊ីបបានមានប្រសាសន៍ថា ប្រទេសកម្ពុជា បានបង្ហាញពីការប្តេជ្ញាចិត្តឥតងាករេចំពោះសន្តិភាពក្នុងតំបន់ និងការចូលរួមយ៉ាងសកម្ម ក្នុងក្របខ័ណ្ឌពហុភាគីនិយម ជាពិសេសនៅក្នុងអាស៊ាន។ ឯកឧត្តម ប្រធានាធិបតីក៏បានអះអាងផងដែរថា សាធារណរដ្ឋស៊ីប សូមស្វាគមន៍ចំពោះសន្ទុះវិជ្ជមាន នៃ ទំនាក់ទំនងទ្វេភាគីរបស់យើងទាំងពីរ និងទន្ទឹងរង់ចាំការអភិវឌ្ឍ នៃកិច្ចសហប្រតិបត្តិការជាក់ស្តែង តាមរយៈកិច្ចសន្ទនា ប្រកបដោយប្រសិទ្ធភាព ការគោរពគ្នាទៅវិញទៅមកនិងការប្តេជ្ញារួមគ្នាក្នុងការអនុវត្តតាមច្បាប់អន្តរជាតិ៕

ដោយ៖ រិទ្ធី ប្រភព៖ ស្ថានឯកអគ្គរាជទូតកម្ពុជាប្រចាំសាធារណរដ្ឋប៊ុលហ្គារី