AKP បន្ទាយមានជ័យ ថ្ងៃទី០១ ខែកុម្ភៈ ឆ្នាំ២០២៦-- ក្នុងស្មារតីមនុស្សធម៌ និងការទទួលខុសត្រូវខ្ពស់លើជោគវាសនារបស់ប្រជាពលរដ្ឋ នាព្រឹកថ្ងៃទី០១ ខែកុម្ភៈ ឆ្នាំ២០២៦នេះ ថ្នាក់ដឹកនាំជាន់ខ្ពស់របស់រាជរដ្ឋាភិបាលបានចុះផ្ទាល់ដល់មូលដ្ឋាន ដើម្បីដោះស្រាយបញ្ហាដីធ្លី និងជម្រកជូនបងប្អូនភៀសសឹកដែលបានរងគ្រោះដោយសារសង្គ្រាមឈ្លានពានរបស់ភាគីថៃមកលើដែនអធិបតេយ្យភាពកម្ពុជានាពេលកន្លងមកនេះ។ សកម្មភាពនេះដឹកនាំដោយឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១គណៈកម្មាធិការជាតិគ្រប់គ្រងគ្រោះមហន្តរាយ និងឯកឧត្ដម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ រួមជាមួយឯកឧត្ដម អ៊ុ រាត្រី អភិបាលខេត្ត និងមន្ត្រីពាក់ព័ន្ធជាច្រើនរូបទៀត។

បេសកកម្មនាព្រឹកនេះផ្តោតសំខាន់លើការចុះពិនិត្យទីតាំងដីជាក់ស្តែង សម្រាប់រៀបចំសាងសង់ជម្រកស្នាក់នៅសមរម្យជូនបងប្អូនភៀសសឹក ដែលបានភៀសខ្លួនចេញពីតំបន់ជម្លោះកាលពីអំឡុងពេលសង្គ្រាមឈ្លានពានរបស់ភាគីថៃមកលើដែនអធិបតេយ្យភាពកម្ពុជា បើទោះបីជាស្ថានការណ៍បានស្ងប់ស្ងាត់ ប៉ុន្តែពលរដ្ឋមួយចំនួននៅតែមិនទាន់មានលទ្ធភាពវិលត្រឡប់ទៅកាន់ភូមិឋានដើម ឬមិនទាន់មានជម្រកពិតប្រាកដនៅឡើយ។

ឯកឧត្តមកិត្តិសង្គហបណ្ឌិត គន់ គីម មានប្រសាសន៍ថា "សម្តេចធិបតី នាយករដ្ឋមន្ត្រី តែងតែគិតគូរជានិច្ចពីសុខទុក្ខរបស់បងប្អូន។ ការរៀបចំជម្រកនេះ មិនមែនគ្រាន់តែជាការផ្តល់ដី និងផ្ទះនោះទេ ប៉ុន្តែវាគឺជាការផ្តល់សេចក្តីថ្លៃថ្នូរ និងសុវត្ថិភាពជូនពលរដ្ឋដែលបានលះបង់ និងរងគ្រោះដោយសារសង្គ្រាមការពារទឹកដី។ យើងត្រូវតែធានាថា គ្មានពលរដ្ឋណាម្នាក់ត្រូវបានបោះបង់ចោលឡើយ។"

ក្នុងឱកាសនោះដែរ ឯកឧត្ដម ឌិត ទីណា បានសង្កត់ធ្ងន់ថា ការរៀបចំនេះមិនត្រឹមតែផ្ដោតលើការសាងសង់ផ្ទះសម្បែងប៉ុណ្ណោះទេ ប៉ុន្តែក្រសួងកសិកម្មនឹងសិក្សាពីលទ្ធភាពនៃការបង្កបង្កើនផល ដើម្បីឱ្យបងប្អូនមានមុខរបរ និងចំណូលស្ថិរភាព។

ឯកឧត្ដមបានមានប្រសាសន៍បន្ថែមថា "ក្នុងនាមជាក្រុមការងារចុះមូលដ្ឋាន យើងមានភារកិច្ចធ្វើយ៉ាងណាឱ្យជីវភាពរបស់បងប្អូនភៀសសឹកមានភាពប្រសើរឡើង។ ក្រៅពីជម្រក យើងនឹងពិនិត្យលើប្រព័ន្ធធារាសាស្ត្រ និងបច្ចេកទេសកសិកម្ម ដើម្បីឱ្យដីដែលផ្តល់ជូននេះ ក្លាយជាដីមាស ដីប្រាក់សម្រាប់បង្កើនសេដ្ឋកិច្ចគ្រួសារ។"

ជាមួយនោះដែរឯកឧត្ដម អ៊ុ រាត្រី អភិបាលខេត្តបន្ទាយមានជ័យ បានបង្ហាញនូវការប្តេជ្ញាចិត្តខ្ពស់ក្នុងការសហការជាមួយគ្រប់ស្ថាប័នពាក់ព័ន្ធ ដើម្បីជំរុញដំណើរការរៀបចំដីធ្លី និងសាងសង់ជម្រកនេះឱ្យបានឆាប់រហ័សបំផុត ដើម្បីឆ្លើយតបទៅនឹងតម្រូវការចាំបាច់របស់បងប្អូនប្រជាពលរដ្ឋ។

ការចុះពិនិត្យទីតាំងដីនាពេលនេះបានបង្ហាញឱ្យឃើញយ៉ាងច្បាស់នូវរូបភាពនៃ "សាមគ្គីភាព និងការយកចិត្តទុកដាក់" របស់ថ្នាក់ដឹកនាំកម្ពុជា។ វាមិនត្រឹមតែជាការដោះស្រាយបញ្ហាស្នាក់នៅប៉ុណ្ណោះទេ ប៉ុន្តែវាជាការផ្សះផ្សានូវរបួសផ្លូវចិត្តរបស់ពលរដ្ឋភៀសសឹក និងជាការបោះជំហានទៅមុខយ៉ាងរឹងមាំក្នុងការកសាងសហគមន៍នៅតាមព្រំដែនឱ្យកាន់តែមានការអភិវឌ្ឍ និងសន្តិសុខពេញលេញ៕

ដោយ ឈុន សារ៉ាត