AKP សៀមរាប ថ្ងៃទី០១ ខែកុម្ភៈ ឆ្នាំ២០២៦-- ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ អមដំណើរដោយឯកឧត្តម លោកជំទាវ ជារដ្ឋលេខាធិការ អនុរដ្ឋលេខាធិការ នៅថ្ងៃទី០១ ខែកុម្ភៈ ឆ្នាំ២០២៦ បានអញ្ជើញនាំយកអំណោយជាគ្រឿងឧបភោគបរិភោគ និងសម្ភារៈប្រើប្រាស់ ប្រគល់ជូនរដ្ឋបាលខេត្តសៀមរាប និងស្នងការដ្ឋាននគរបាលខេត្តសៀមរាប។

ឯកឧត្តមអភិសន្តិបណ្ឌិត ស សុខា មានប្រសាសន៍ថា អំណោយជាគ្រឿងឧបភោគបរិភោគ និង សម្ភារដែលបានប្រគល់ជូនរដ្ឋបាលខេត្តសៀមរាបនេះ គឺដើម្បីចែកជូនដល់ពលរដ្ឋភៀសសឹក ដែលប៉ះពាល់ដោយសារសង្រ្គាមថៃឈ្លានពាន និងឧបត្ថម្ភគាំទ្រដល់វីរកងទ័ព និងកងនគរបាលជួរមុខផងដែរ ក្នុងនោះមានទឹកសុទ្ធ ១៣៨០កេស អង្ករ ១០៧៦៥គីឡូក្រាម ភេសជ្ជៈ ១៩១កេស ពងមាន់១៦០កេស សាច់ខកំប៉ុង១៣៩កេស កន្ទេល១៩៥កន្ទេល ក្រណាត់៨ដុំ ភួយ៧៥០ភួយ ទឹកត្រី ២៥៣យួរ មុង៥៩០មុង អំបិល និងប៊ីចេង ៣៩៩កញ្ចប់ ឃីត១៨០កញ្ចប់ នំ៣៦៤កេស ត្រីខ៨០កេស សៀវភៅសរសេរ១៨កេស។

ជាមួយគ្នានោះ ឯកឧត្តមអភិសន្តិបណ្ឌិត ស សុខា ក៏បាននាំយកនូវឯកសណ្ឋានបំពាក់ដល់ កងកម្លាំងនគរបាលជាតិ មានអាវចរាចរណ៍ចំនួន៥០០អាវ អាវក្រោះការពារគ្រាប់៥០០អាវ និង ខ្សែក្រវ៉ាត់ប៉ូលីសចំនួន១០០ខ្សែ ជូនដល់ស្នងការដ្ឋាននគរបាលខេត្តសៀមរាប ដើមី្បយកទៅបម្រើការងារសន្តិសុខជូនប្រជាពលរដ្ឋ និងភ្ញៀវទេសចរ។

ក្នុងនាមរដ្ឋបាលខេត្តសៀមរាប ឯកឧត្តម ប្រាក់ សោភ័ណ បានគោរពថ្លែងអំណរគុណដ៏ខ្ពង់ខ្ពស់បំផុតចំពោះឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ កែ សួនសុភី ស សុខា រួមនឹងឯកឧត្ដម លោកជំទាវ លោក លោកស្រី បានផ្ដល់នូវអំណោយដ៏ថ្លៃថ្លា ដែលកំពុងតម្រូវការចាំបាច់បំផុតសម្រាប់បងប្អូនភៀសសឹក និង វីរកងទ័ព កងនគរបាលជួរមុខដែលកំពុងតស៊ូប្តូរផ្តាច់ការពារបូរណភាពទឹកដី នៅតាមបន្ទាត់ព្រំដែនកម្ពុជា-ថៃ រួមនិងប្រជាពលរដ្ឋក្មេងចាស់ប្រុសស្រីកំពុងភៀសសឹកជាច្រើនគ្រួសារ កំពុងរងទុក្ខលំបាកដោយ សារសង្គ្រាមឈ្លានពានបង្កឡើងដោយភាគីថៃ។ ឯកឧត្តមបានឱ្យដឹងថា គិតមកត្រឹមថ្ងៃទី៣១ ខែមករា ឆ្នាំ២០២៦ បងប្អូនភៀសសឹកដែលបានជម្លៀសពីតំបន់សមរភូមិមុខ ចំនួន៩០២២គ្រួសារ ស្មើ ២៨១០១នាក់ ក្នុងនោះស្នាក់នៅតាមផ្ទះបងប្អូន ចំនួន៣៨៩៥គ្រួសារ ស្មើ ១២០០៤៩នាក់ និង នៅតាមទីតាំងសុវត្ថិភាព (មណ្ឌល និងវត្តអារាម) មានចំនួន ៥១២៧គ្រួសារ ស្មើនឹង១៦០០៥២នាក់ នៅក្នុងទីតាំងចំនួន ៥៥ទីតាំង លើ១៣១ទីតាំង។ បងប្អូនដែលបានកំពុងបន្តស្នាក់នៅតាមមណ្ឌលទាំង៥៥ទីតាំង ពួកគាត់បានរងគ្រោះដោយការឈ្លានពានរបស់ទាហានថៃ បណ្តាលឱ្យខូចខាតផ្ទះសម្បែង ហើយភូមិដ្ឋានមួយចំនួនក៏រងនូវ គ្រាប់យុទ្ធភ័ណ្ឌមិនទាន់ផ្ទុះ និងតំបន់ក្រហមជាដើម។ ម៉្យាងទៀត ស្បៀងអាហារ សម្ភារដែលរដ្ឋបាលខេត្តទទួលបានពីបងប្អូនសប្បុរសជន ក្រុមការងារបានធ្វើការបែងចែកជូនទៅតាមមណ្ឌល និងផ្តល់ជូនដល់វីរកងទ័ព កងនគរបាលជួរមុខដែលកំពុងប្រតិបត្តិការការពារអធិបតេយ្យភាព បូរណភាពទឹកដី នៅតាមបណ្តោយព្រំដែនកម្ពុជា-ថៃ៕

ដោយ ឃុត សៅ