AKP កំពង់ធំ ថ្ងៃទី០១ ខែកុម្ភៈ ឆ្នាំ២០២៦-- លោកឧត្ដមសេនីយ៍ត្រី មាស យ៉ត មេបញ្ជាការកងរាជអាវុធហត្ថខេត្តកំពង់ធំ កាលពីថ្ងៃទី៣១ ខែមករា ឆ្នាំ២០២៦ បានអញ្ជើញដឹកនាំលោក លោកស្រី មេបញ្ជាការរង ប្រធានមន្ទីរ នាយ នាយរងការិយាល័យនិងជំនួយការនាំយកថវិកាមូលនិធិមហាគ្រួសារ កងរាជអាវុធហត្ថចំនួន ២៤.០៥០.០០០រៀល ប្រគល់ជូនលោកស្រី ហុន ម៉ូនិកា ត្រូវជាគ្រួសារសពលោកអនុសេនីយ៍ឯក អួន ឃាង នាយសេនាធិការមូលដ្ឋានកងរាជអាវុធហត្ថស្រុកបារាយណ៍នៃបញ្ជាការដ្ឋានកងរាជអាវុធហត្ថកំពង់ធំ។

ឆ្លៀតនៅក្នុងឱកាសនោះ លោកឧត្តមសេនីយ៍ត្រី មេបញ្ជាការក៏បានពាំនាំការផ្ដាំផ្ញើសាកសួរសុខទុក្ខពីសំណាក់ឯកឧត្តមនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេសជូនចំពោះក្រុមគ្រួសារ លោក អួន ឃាងក្នុងការបាត់បង់ស្វាមី ដែលជាបង្គោលគ្រួសារដ៏ល្អ។ លោក មេបញ្ជាការបានលើកទឹកចិត្តដល់ក្រុមគ្រួសារត្រូវប្រឹងខិតខំតស៊ូរឹងមាំឡើងដើម្បីជីវភាពគ្រួសារ និងមើលថែខ្លួនឯង ក៏ជាមើលថែកូនៗសម្រាប់អនាគតរបស់ពួកគាត់ទៅមុខទៀត។

លោកឧត្តមសេនីយ៍ត្រីមេបញ្ជាការក៏បានមានប្រសាសន៍ថា ក្រោមការដឹកនាំរបស់ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេសលោកតែងតែយកចិត្តទុកដាក់គិតគូចំពោះកងរាជអាវុធហត្ថគ្រប់រូបដែលបានទទួលមរណនិងមានជំងឺដង្កាត់ផ្សេងៗ។លោកបានដឹកនាំបង្កើតឱ្យ មានមូលនិធិ មហាគ្រួសារនេះឡើងដើម្បីជួយសម្រួលដល់ក្រុមគ្រួសារក៏ដូចជាចូលរួមរំលែកទុក្ខលំបាកដល់មន្រ្តីកងរាជអាវុធហត្ថក្រោមឱវាទទាំងអស់នៅទូទាំងប្រទេស៕

ដោយ ស៊ុម វណ្ណា