AKP ភ្នំពេញ ថ្ងៃទី២៦ ខែវិច្ឆិកា ឆ្នាំ២០២៥ -- អង្គការអន្តរជាតិសម្រាប់ជនអន្តោប្រវេសន៍ (IOM) ប្រចាំប្រទេសលីប៊ី បានប្រកាសកាលពីថ្ងៃអង្គារថា ខ្លួនបានសម្របសម្រួលជើងហោះហើរត្រឡប់មកវិញ ដោយបានបញ្ជូនជនអន្តោប្រវេសន៍ចំនួន ១៦០នាក់ពីប្រទេសលីប៊ីទៅកាន់ប្រទេសឆាដវិញ។

នៅក្នុងសេចក្តីថ្លែងការណ៍មួយនៅលើទំព័រហ្វេសប៊ុកផ្លូវការរបស់ខ្លួន អង្គការ IOM បាននិយាយថា ជនអន្តោប្រវេសន៍ទាំងអស់បានទទួលការការពារ និងជំនួយពេញមួយដំណើរការ រួមទាំងការផ្ទៀងផ្ទាត់អត្តសញ្ញាណ ក៏ដូចជាការត្រួតពិនិត្យសុខភាពផ្លូវចិត្ត និងសុខភាពផ្លូវកាយ ស្របតាមនីតិវិធីដែលបានបង្កើតឡើង ដើម្បីធានាបាននូវការវិលត្រឡប់ដោយសុវត្ថិភាព និងថ្លៃថ្នូរ។

កម្មវិធីវិលត្រឡប់មនុស្សធម៌ដែលអនុវត្តដោយអង្គការ IOM មានគោលបំណងគាំទ្រដល់ជនអន្តោប្រវេសន៍ដែលងាយរងគ្រោះបំផុតនៅក្នុងប្រទេសលីប៊ី ដោយសហការជាមួយភ្នាក់ងារអង្គការសហប្រជាជាតិ និងដៃគូអន្តរជាតិ។

ជនអន្តោប្រវេសន៍ខុសច្បាប់ភាគច្រើនមកពីប្រទេសអាហ្វ្រិក ដោយបានទាញយកអត្ថប្រយោជន៍ពីភាពអសន្តិសុខ និងភាពវឹកវរនៅក្នុងប្រទេសលីប៊ីចាប់តាំងពីឆ្នាំ២០១១ ដើម្បីឆ្លងកាត់សមុទ្រមេឌីទែរ៉ានេពីឆ្នេរសមុទ្ររបស់ខ្លួនទៅកាន់ទ្វីបអឺរ៉ុប៕

ដោយ៖ មូល មិនា (ប្រភព៖ ស៊ីនហួ)