AKP ភ្នំពេញ ថ្ងៃទី២៦ ខែវិច្ឆិកា ឆ្នាំ២០២៥ -- ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បាននិយាយថា លោកបានទទួលយកការអញ្ជើញពីមេដឹកនាំចិន លោក ស៊ី ជីនពីង (Xi Jinping) ឱ្យទៅបំពេញទស្សនកិច្ចនៅទីក្រុងប៉េកាំងនៅក្នុងខែមេសា ឆ្នាំក្រោយ ហើយលោកក៏បានឆ្លើយតបវិញដោយការអញ្ជើញលោក ស៊ី ឱ្យមកទស្សនកិច្ចផ្លូវរដ្ឋនៅសហរដ្ឋអាមេរិកវិញនៅឆ្នាំក្រោយដូចគ្នា។

លោក ត្រាំ បានប្រកាសបែបនេះ នៅប៉ុន្មានម៉ោងបន្ទាប់ពីលោកបាននិយាយជជែកតាមទូរសព្ទជាមួយលោក ស៊ី កាលពីព្រឹកថ្ងៃចន្ទ ដែលក្នុងនោះលោកបាននិយាយថា មេដឹកនាំទាំងពីរនាក់បានពិភាក្សាគ្នាអំពីបញ្ហានានា រួមទាំងបញ្ហាអ៊ុយក្រែន ហ្វេនតានីល និងសណ្តែកសៀង។ ការហៅទូរស័ព្ទនេះបានកើតឡើងជិតមួយខែបន្ទាប់ពីមេដឹកនាំទាំងពីរនាក់បានជួបប្រជុំគ្នាដោយផ្ទាល់នៅទីក្រុងប៊ូសាន ប្រទេសកូរ៉េខាងត្បូង។

លោក ត្រាំ បាននិយាយថា «ទំនាក់ទំនងរបស់យើងជាមួយប្រទេសចិន គឺរឹងមាំខ្លាំងណាស់!»។

ទីក្រុងប៉េកាំង មិនបាននិយាយអ្វីអំពីដំណើរទស្សនកិច្ចរបស់មេដឹកនាំនោះទេ ប៉ុន្តែបាននិយាយថា មេដឹកនាំទាំងពីរបានពិភាក្សាគ្នាអំពីពាណិជ្ជកម្ម តៃវ៉ាន់ និងអ៊ុយក្រែន។

លោក ស៊ី បានប្រាប់លោក ត្រាំ នៅក្នុងការហៅទូរស័ព្ទកាលពីថ្ងៃចន្ទថា ការវិលត្រឡប់របស់កោះតៃវ៉ាន់ទៅកាន់ចិនដីគោក គឺជា «ផ្នែកដ៏សំខាន់មួយនៃសណ្តាប់ធ្នាប់អន្តរជាតិក្រោយសង្គ្រាម» ហើយលោកបានសម្តែងក្តីសង្ឃឹមសម្រាប់កិច្ចព្រមព្រៀងសន្តិភាពដ៏យុត្តិធម៌ យូរអង្វែង និងមានកាតព្វកិច្ច ទៅលើបញ្ហាអ៊ុយក្រែន។ នេះបើយោងតាមក្រសួងការបរទេសចិន។

កិច្ចសន្ទនានេះបានកើតឡើងបន្ទាប់ពីនាយករដ្ឋមន្ត្រីជប៉ុន លោកស្រី សាណាអេ តាកៃជិ (Sanae Takaichi) បាននិយាយកាលពីពេលថ្មីៗនេះថា យោធាជប៉ុនអាចចូលរួម ប្រសិនបើប្រទេសចិនចាត់វិធានការប្រឆាំងនឹងកោះតៃវ៉ាន់ ដែលជាកោះគ្រប់គ្រងដោយខ្លួនឯង ដែលទីក្រុងប៉េកាំងនិយាយថា កោះនេះត្រូវតែស្ថិតនៅក្រោមការគ្រប់គ្រងរបស់ខ្លួន។ ជប៉ុន គឺជាសម្ព័ន្ធមិត្តដ៏សំខាន់របស់សហរដ្ឋអាមេរិកនៅក្នុងតំបន់។ ការហៅទូរស័ព្ទនេះក៏ស្របគ្នាទៅនឹងការជំរុញចុងក្រោយបំផុតដោយរដ្ឋបាលលោក ត្រាំ ដើម្បីបញ្ចប់សង្គ្រាមនៅអ៊ុយក្រែនផងដែរ៕

ដោយ៖ យា ចិន្តាខន្តី (ប្រភព៖ កូរ៉េថាមស៍)