AKP ភ្នំពេញ ថ្ងៃទី២៥ ខែវិច្ឆិកា ឆ្នាំ២០២៥ -- កាលពីថ្ងៃចន្ទ ឧបនាយករដ្ឋមន្ត្រីចិន លោក ហេ លីហ្វេង (He Lifeng) បានជួបប្រជុំតាមវីដេអូជាមួយលោក រ៉ូឡង់ ឡេស្គួរ (Roland Lescure) រដ្ឋមន្ត្រីក្រសួងហិរញ្ញវត្ថុបារាំង។ភាគីទាំងពីរបានផ្លាស់ប្តូរទស្សនៈស៊ីជម្រៅលើកិច្ចសហប្រតិបត្តិការសេដ្ឋកិច្ចនិងហិរញ្ញវត្ថុថ្មីៗរវាងប្រទេសទាំងពីរ ក៏ដូចជាបញ្ហាដែលជាកង្វល់រួម។

លោក ហេ គឺជាថ្នាក់ដឹកនាំរបស់ប្រទេសចិននៅក្នុងកិច្ចសន្ទនាសេដ្ឋកិច្ច និងហិរញ្ញវត្ថុកម្រិតកំពូលរវាងប្រទេសចិន-បារាំង បាននិយាយថាប្រទេសចិនត្រៀមខ្លួនរួចជាស្រេចដើម្បីធ្វើការជាមួយប្រទេសបារាំង ដើម្បីពង្រឹងការផ្លាស់ប្តូរ និងកិច្ចសហប្រតិបត្តិការក្នុងវិស័យសេដ្ឋកិច្ច និងហិរញ្ញវត្ថុដើម្បីលើកកម្ពស់សមិទ្ធផលថ្មីៗជាបន្តបន្ទាប់ក្នុងកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងចិន-បារាំង និងដើម្បីផ្តល់នូវស្ថិរភាព និងថាមពលវិជ្ជមានសម្រាប់សេដ្ឋកិច្ចពិភពលោក។

លោក ឡេស្គួរ គឺជាថ្នាក់ដឹកនាំរបស់ប្រទេសបារាំងក្នុងកិច្ចសន្ទនា បាននិយាយថា ប្រទេសបារាំងមានឆន្ទៈក្នុងការពង្រឹងកិច្ចសហប្រតិបត្តិការជាក់ស្តែងជាមួយប្រទេសចិនក្នុងវិស័យសេដ្ឋកិច្ច ពាណិជ្ជកម្ម និងការវិនិយោគក្នុងវិស័យសេដ្ឋកិច្ច និងហិរញ្ញវត្ថុ និងដើម្បីលើកកម្ពស់វឌ្ឍនភាពកាន់តែច្រើនក្នុងទំនាក់ទំនងសេដ្ឋកិច្ច និងពាណិជ្ជកម្មរវាងប្រទេសទាំងពីរ៕

ដោយ៖ មូល មិនា (ប្រភព៖ ភីបផលដេលី)