AKP ភ្នំពេញ ថ្ងៃទី២៥ ខែវិច្ឆិកា ឆ្នាំ២០២៥ -- សមាគមសេដ្ឋកិច្ចកូរ៉េខាងត្បូង-អាស៊ីប៉ាស៊ីហ្វិក (KAPEA) បាននិយាយកាលពីថ្ងៃចន្ទម្សិលមិញថា ខ្លួននឹងធ្វើជាម្ចាស់ផ្ទះនៃកិច្ចប្រជុំកំពូលចក្ខុវិស័យសកលលោកក្រោយAPEC ដោយប្រមូលផ្តុំក្រុមហ៊ុនក្នុងស្រុក និងបរទេសប្រហែល៧០០ក្រុមហ៊ុន នៅទីក្រុងសេអ៊ូល និងទីក្រុងក្យឹងជូ នៃខេត្តក្យឹងសាងខាងជើង រយៈពេលពីរថ្ងៃ ដោយចាប់ផ្តើមនៅថ្ងៃព្រហស្បតិ៍។

ក្រោមការឧបត្ថម្ភពីក្រសួងសេដ្ឋកិច្ច និងហិរញ្ញវត្ថុ សមាគមន KAPEA គឺជាក្រុមអ្នកតំណាងអាជីវកម្មដែលមានគោលបំណងសម្រួលដល់កិច្ចសហប្រតិបត្តិការសេដ្ឋកិច្ចជាចម្បងរវាងកូរ៉េខាងត្បូង និងចិន។ អង្គការមិនស្វែងរកប្រាក់ចំណេញនេះបាននិយាយថា ព្រឹត្តិការណ៍រយៈពេលពីរថ្ងៃនេះមានបំណងបង្កើតឱកាសវិនិយោគរវាងក្រុមហ៊ុនមកពីរដ្ឋជាសមាជិកនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC)។

លោក ជី យ៉ុងម៉ូ (Ji Young-mo) ប្រធានសមាគម KAPEA បាននិយាយថា «ជាមួយនឹងការយកចិត្តទុកដាក់ជាសកលផ្តោតទៅលើការធ្វើជាម្ចាស់ផ្ទះនៃកិច្ចប្រជុំកំពូល APEC ក្យឹងជូ ប្រកបដោយជោគជ័យគោលជំហរជាតិរបស់ប្រទេសកូរ៉េខាងត្បូងបានកើនឡើងគួរឱ្យកត់សម្គាល់។ ឥឡូវនេះ វាជាពេលវេលាដ៏ល្អបំផុតដើម្បីពង្រីកកិច្ចសហប្រតិបត្តិការអន្តរជាតិ និងការចូលរួមផ្នែកសេដ្ឋកិច្ច»។

លោកបាននិយាយថា «ព្រឹត្តិការណ៍នេះលើសពីកិច្ចពិភាក្សាអន្តររដ្ឋាភិបាល បន្ទាប់ពីកិច្ចប្រជុំកំពូលមេដឹកនាំសេដ្ឋកិច្ច APEC។ វានឹងបម្រើជាវេទិកាសម្រាប់កិច្ចសហប្រតិបត្តិការអន្តរជាតិជាក់ស្តែងដែលពាក់ព័ន្ធនឹងរដ្ឋាភិបាល និងក្រុមហ៊ុនឯកជនមកពីបណ្តាប្រទេសចូលរួម»។

យោងតាមសមាគម ​​​​KAPEA បានឱ្យដឹងថា ក្រុមហ៊ុនប្រហែល៧០០ដែលរួមមានក្រុមហ៊ុនបរទេសចំនួន២០០ និងក្រុមហ៊ុនក្នុងស្រុកចំនួន៥០០ត្រូវបានគេរំពឹងថានឹងចូលរួមក្នុងព្រឹត្តិការណ៍បន្តពីកិច្ចប្រជុំកំពូល APECនេះ។ មន្ត្រីរដ្ឋាភិបាល និងអ្នកការទូតមកពី ២០ប្រទេស រួមទាំងសហរដ្ឋអាមេរិក ចិន កាណាដា អូស្ត្រាលី វៀតណាម ម៉ាឡេស៊ី បារាំងអាល្លឺម៉ង់ និងអេស្ប៉ាញ នឹងចូលរួមក្នុងព្រឹត្តិការណ៍នេះ៕

ដោយ៖ យា ចិន្តាខន្តី (ប្រភព៖ កូរ៉េថាមស៍)