AKP ភ្នំពេញ ថ្ងៃទី២៥ ខែវិច្ឆិកា ឆ្នាំ២០២៥ -- អាជ្ញាធរអាស៊ែរបៃហ្សង់បាននិយាយថា ហេតុការណ៍ផ្ទុះមួយនៅអគារការិយាល័យមួយក្នុងរដ្ឋធានីបាគូរបស់ប្រទេសអាស៊ែរបៃហ្សង់កាលពីថ្ងៃចន្ទម្សិលមិញនេះ បានបណ្តាលឱ្យមនុស្ស ៥នាក់រងរបួស។

ក្រសួងស្ថានភាពអាសន្នរបស់ប្រទេសអាស៊ែរបៃហ្សង់ បាននិយាយនៅក្នុងសេចក្តីថ្លែងការណ៍មួយថា ការផ្ទុះនេះបានកើតឡើងនៅអគារប្រាំជាន់មួយនៅក្នុងខណ្ឌណារីម៉ាណូវនៃទីក្រុងបាគូ ដែលជំរុញឱ្យមានការឆ្លើយតបភ្លាមៗពីក្រុមសង្គ្រោះបន្ទាន់។

ក្រសួងបាននិយាយថា ការផ្ទុះនេះបានកើតឡើងដោយមិនបង្កឱ្យមានអគ្គីភ័យធ្ងន់ធ្ងរទេ ហើយមនុស្ស ៧នាក់ត្រូវបានជួយសង្គ្រោះពីកន្លែងកើតហេតុ។

សេចក្តីថ្លែងការណ៍នោះបាននិយាយថា «វិធានការសន្តិសុខសមស្របត្រូវបានធ្វើឡើងនៅក្នុងតំបន់នោះ។ ការស៊ើបអង្កេតទៅលើឧប្បត្តិហេតុនេះកំពុងដំណើរការដោយភ្នាក់ងារពាក់ព័ន្ធនានា»។

ទីភ្នាក់ងារសារព័ត៌មានរដ្ឋ Azertac បានដកស្រង់សម្តីសេវាសារព័ត៌មាននៃមជ្ឈមណ្ឌលវេជ្ជសាស្ត្រក្នុងស្រុកមួយ ដោយបានរាយការណ៍នៅលើបណ្តាញតេឡេក្រាមថា មនុស្ស ៥នាក់រងរបួសនៅក្នុងការផ្ទុះនេះ ដែលត្រូវបានបញ្ជូនទៅកាន់មន្ទីរពេទ្យ៕

ដោយ៖ យា ចិន្តាខន្តី (ប្រភព៖ AA-AKP)