AKP ភ្នំពេញ ថ្ងៃទី២០ ខែវិច្ឆិកា ឆ្នាំ២០២៥ -- ប្រធានាធិបតីតួកគី លោក រេសិប តាយយីប អឺដូហ្គេន (Recep Tayyip Erdogan) កាលពីថ្ងៃពុធ បានសង្កត់ធ្ងន់លើការប្តេជ្ញាចិត្តរបស់ប្រទេសតួកគីក្នុងការជំរុញកិច្ចខិតខំប្រឹងប្រែងផ្នែកការទូត ដើម្បីបញ្ចប់ជម្លោះរវាងរុស្ស៊ី និងអ៊ុយក្រែនក្នុងអំឡុងពេលចរចាជាមួយប្រធានាធិបតីអ៊ុយក្រែន លោក វូឡូឌីមៀ ហ្គេលេនស្គី (Volodymyr Zelensky) នៅទីក្រុងអង់ការ៉ា។

លោក អឺដូហ្គេន បានមានប្រសាសន៍ក្នុងអំឡុងពេលសន្និសីទសារព័ត៌មានរួមគ្នារបស់ពួកគេថា «នេះនឹងមានប្រយោជន៍សម្រាប់ដំណើរការនៅទីក្រុងអ៊ីស្តង់ប៊ុលដែលត្រូវបានធ្វើឱ្យសកម្មឡើងវិញជាមួយនឹងក្របខ័ណ្ឌដ៏ទូលំទូលាយមួយ ដែលអាចដោះស្រាយបញ្ហាដ៏ធ្ងន់ធ្ងរនៅពេលនេះ» ដោយលោកបានអំពាវនាវឱ្យមានការគាំទ្រពីអន្តរជាតិឡើងវិញសម្រាប់គំនិតផ្តួចផ្តើមនេះ។

លោកបានបញ្ជាក់ជាថ្មីថា ប្រទេសតួកគីបានត្រៀមខ្លួនរួចជាស្រេចដើម្បីពិភាក្សាជាមួយរុស្ស៊ី លើ «សំណើណាមួយដែលអាចពន្លឿនបទឈប់បាញ់ និងបើកផ្លូវសម្រាប់សន្តិភាពដ៏យុត្តិធម៌ និងយូរអង្វែង» ដោយជំរុញឱ្យដៃគូទាំងអស់ដែលកំពុងស្វែងរកការបញ្ឈប់ការបង្ហូរឈាម អនុម័តវិធីសាស្រ្តស្ថាបនា ដើម្បីរស់ឡើងវិញនូវដំណើរការនេះ។

ប្រទេសរុស្ស៊ី និងអ៊ុយក្រែន បានធ្វើកិច្ចចរចាសន្តិភាពជុំទី៣ នៅទីក្រុងអ៊ីស្តង់ប៊ុល កាលពីថ្ងៃទី២៣ ខែកក្កដា ឆ្នាំ២០២៥ ដោយយល់ព្រមលើការដោះដូរអ្នកទោស ប៉ុន្តែមិនមានការជឿនលឿនឆ្ពោះទៅរកការបញ្ចប់ជម្លោះដែលកំពុងបន្តនោះទេ។

លោក ហ្សេលេនស្គី បាននិយាយថា អ៊ុយក្រែនសង្ឃឹមថានឹងចាប់ផ្តើមការដោះដូរអ្នកទោសឡើងវិញនៅចុងឆ្នាំនេះ។

លោក​បាន​មាន​ប្រសាសន៍​ថា «ប្រទេស​តួកគី​កំពុង​ផ្តល់​ការ​គាំទ្រ​យ៉ាង​ខ្លាំង​លើ​បញ្ហា​នេះ» ដោយលោកបាន​បន្ថែម​ថា ទីក្រុង​គៀវ​ជឿជាក់​លើ«កម្លាំង​នៃ​ការទូត​របស់​ប្រទេស​តួកគី និង​សមត្ថភាព​របស់​ខ្លួន​ក្នុង​ការ​យល់​ដឹង​នៅ​ទីក្រុង​មូស្គូ»៕

ដោយ៖ មូល មិនា (ប្រភព៖ ស៊ីនហួ)