AKP បន្ទាយមានជ័យ ថ្ងៃទី១៥ ខែវិច្ឆិកា ឆ្នាំ២០២៥ -- ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ដ្រី អនុប្រធានទី១ និងជាអគ្គលេខាធិការសមាគមអតីតយុទ្ធជន និងនិវត្តជនកម្ពុជា នៅព្រឹកថ្ងៃទី១៥ ខែវិច្ឆិកា ឆ្នាំ២០២៥ បានអញ្ជើញជាអធិបតីក្នុងពិធីជួបសំណេះសំណាលជាមួយនិវត្តជន និងប្រកាសសមាសភាពគណៈកម្មាធិការសមាគមអតីតយុទ្ធជន និងនិវត្តជនកម្ពុជា ខេត្តបន្ទាយមានជ័យ នៅសាលប្រជុំសាលាខេត្ត។

ថ្លែងនៅក្នុងឱកាសដ៏សំខាន់នេះ ឯកឧត្តម នាយឧត្ដមសេនីយ៍ កិត្តិសង្គហបណ្ឌិត គន់ គីម បានផ្តល់នូវការណែនាំ និងក្រើនរម្លឹកយ៉ាងទទូចដល់ថ្នាក់ដឹកនាំ និងសមាជិកសមាជិកា នៃសមាគមអតីតយុទ្ធជន និងនិវត្តជន ក្នុងខេត្តបន្ទាយមានជ័យទាំងអស់ នូវចំណុចគន្លឹះមួយចំនួនត្រូវគោរពឲ្យបានខ្ជាប់ខ្ជួននូវរដ្ឋធម្មនុញ្ញ ច្បាប់ និងលិខិតបទដ្ឋានគតិយុត្តិជាធរមាន និងតម្កល់នូវឧត្តមប្រយោជន៍ជាតិ និងប្រជាជនជាធំ។

បន្តអនុវត្តតាមតួនាទី ភារកិច្ច ដែលមានចែងក្នុងលក្ខន្តិកៈសមាគមអតីតយុទ្ធជន និងនិវត្តជនកម្ពុជា, សេចក្តីសម្រេចចិត្តរបស់មហាសន្និបាត ឬមហាសន្និបាតវិសាមញ្ញតំណាង សមាគមអតីតយុទ្ធជន និងនិវត្តជនកម្ពុជាទូទាំងប្រទេស ស្តីពីការរៀបចំ និងការប្រព្រឹត្តទៅ នៃគណៈកម្មាធិការ សមាគមអតីតយុទ្ធជន និងនិវត្តជនកម្ពុជា រាជធានី ខេត្ត និងសេចក្តីសម្រេច ឬគោលការណ៍ណែនាំផ្សេងៗ របស់សមាគម។

ត្រូវពង្រឹងសាមគ្គីភាព ឯកភាពផ្ទៃក្នុង ធ្វើកិច្ចសហការ និងទំនាក់ទំនងឲ្យបានជិតស្និទ្ធល្អប្រសើរ ជាមួយគ្រប់លំដាប់ថ្នាក់ ដៃគូអភិវឌ្ឍន៍ និងអ្នកពាក់ព័ន្ធនានា ដើម្បីរួមគ្នាជាធ្លុងមួយ ធានារក្សាឲ្យបាននូវសុវត្ថិភាពសង្គម សុខដុមរមនា និងវិបុលភាពជូនប្រជាពលរដ្ឋទូទាំងខេត្តបន្ទាយមានជ័យ។

ថ្លែងក្នុងឱកាសនោះដែរ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងជាប្រធានគណៈកម្មាធិការសមាគមអតីតយុទ្ធជន និងនិវត្តជនកម្ពុជា ខេត្តបន្ទាយមានជ័យ បានគូសបញ្ជាក់យ៉ាងច្បាស់ថា វត្តមានរបស់ឯកឧត្តមនាយឧត្តមសេនីយ៍ កិត្តិសង្គហបណ្ឌិត គន់ គីម ពិតជាបានសបញ្ជាក់ឲ្យឃើញពីការយកចិត្តទុកដាក់ខ្ពស់បំផុត របស់ប្រមុខរាជរដ្ឋាភិបាលកម្ពុជា ក៏ដូចជាសមាគមអតីតយុទ្ធជន និងនិវត្តជនកម្ពុជា ដែលមានសម្ដេចតេជោ ហ៊ុន សែន ប្រធានព្រឹទ្ធសភា និងជាប្រធានសមាគម ក្នុងការលើកស្ទួយ ជីវភាពអតីតយុទ្ធជន និងនិវត្តជន និងគ្រួសារទាំងស្មារតី និងសម្ភារៈ ក៏ដូចជាការការពារភាពសុខដុមរមនា ក្នុងសង្គមជាតិកម្ពុជា ប្រកបដោយភាពជឿជាក់ និងប្រាកដនិយម។

ក្នុងនាមជាប្រធានគណៈកម្មាធិការសមាគមខេត្ត ឯកឧត្តមបានគោរពថ្លែងនូវការដឹងគុណ និងសម្តែងនូវភាពស្មោះត្រង់ឥតងាករេ ចំពោះរាជរដ្ឋាភិបាលកម្ពុជា និងសមាគម ដែលបានផ្តល់ឱកាសឲ្យសមាជិកទាំងអស់បានចូលរួមចំណែក ភាតរភាព បំពេញបេសកកម្មរបស់សមាគម។

ឯកឧត្តមអ៊ុំរាត្រីបានប្តេជ្ញាថា នឹងបន្តរួមគ្នាដើម្បីបុព្វហេតុលើកស្ទួយជីវភាព បង្កើតស្មារតីសាមគ្គីភាព មនសិការ ជួយឧបត្ថម្ភគ្នាទៅវិញទៅមក ដើម្បីលើកកម្ពស់តួនាទី និងតម្លៃ របស់អតីតយុទ្ធជន និងនិវត្តជន ឲ្យសក្តិសមទៅនឹងគុណបំណាច់ដ៏ធំធេង ចំពោះប្រទេសជាតិ និងប្រជាជនកម្ពុជា។

សូមជម្រាបថាពិធីប្រកាសសមាសភាពនេះ បានប្រព្រឹត្តទៅក្រោមបរិយាកាសរីករាយ និងស្និទ្ធស្នាល ដែលជាការរឹតចំណងសាមគ្គីភាព និងជំរុញការងារសមាគមឲ្យកាន់តែមានប្រសិទ្ធភាព ដើម្បីបុព្វហេតុជាតិ និងអតីតយុទ្ធជន៕

ដោយ ៖ឈុនសារ៉ាត