AKP ភ្នំពេញ ថ្ងៃទី១៥ ខែវិច្ឆិកា ឆ្នាំ២០២៥ -- ការប្រើប្រាស់ជីសម្រាប់ដំណាំ ដែលស្របតាមបទដ្ឋានបច្ចេកទេសនោះ មិនគ្រាន់តែចៀសផុតពីការខ្ជះខ្ជាយថវិកា ពេលវេលា និងប៉ះពាល់បរិស្ថានប៉ុណ្ណោះទេ ប៉ុន្តែវាក៏បានហុចមកវិញនូវទិន្នផលខ្ពស់ចំពោះប្រជាកសិករទៀតផង។

ពិតណាស់ដំណាំគ្រប់ប្រភេទ ត្រូវការជីដែលជាសារធាតុចិញ្ចឹម ដើម្បីជំរុញការលូតលាស់ និងវាហុចមកវិញនូវទិន្នផលជាផ្លែផ្កា។ជាងនេះទៅទៀតការគ្រប់គ្រង និងប្រើប្រាស់ជី ឱ្យមានប្រសិទ្ធភាពខ្ពស់នៅក្នុងប្រព័ន្ធផលិតកម្មដំណាំ មានសារៈសំខាន់ខ្លាំងណាស់ ក្នុងការ បង្កើនទិន្នផលកាត់បន្ថយចំណាយថ្លៃដើមផលិតកម្ម ហើយអាចទទួលមកវិញនូវប្រាក់ចំណេញសម្រាប់ប្រជាកសិករ។ 

ទាក់ទិនក្នុងរឿងនេះ  លោក មៀច សំណាង អគ្គនាយកប្រតិបត្តិរបស់ក្រុមហ៊ុនវីហ្គើលអេហ្រ្គីបាយអូថេក(ខេមបូឌា)ឯ.ក បានបញ្ជាក់ប្រាប់ក្នុងវេទិកា និងពិព័រណ៍កសិកម្មកម្ពុជាឆ្នាំ២០២៥ (CAFE25) ចាប់ពីថ្ងៃទី ១៣-១៦ ខែវិច្ឆិកា ឆ្នាំ២០២៥ ដែលធ្វើឡើងនៅមជ្ឈមណ្ឌលសន្និបាត និងពិព័រណ៍កោះពេជ្រ ក្នុងរាជធានីភ្នំពេញ ឱ្យដឹងថា៖ការដាំដំណាំ ពិតជាមិនអាចខ្វះបាននូវការថែទាំយ៉ាងយកចិត្តទុកដាក់ ពិសេសគឺការបន្ថែមនូវសារធាតុបំប៉ន ឬជីដើម្បីជាជំនួយពន្លឿនដល់ការរីកលូតលាស់ ដាំដំណាំ ហើយអាចកែប្រែស្ថានភាពដីបានល្អ និងមិនប៉ះពាល់ដល់សុខភាពប្រជាកសិករដែលជាអ្នកប្រើប្រាស់ផ្ទាល់ ក៏ដូចជាអ្នកទទួលទាន។

លោកថាតាមរយៈបទពិសោធន៍ក្នុងចំណោមការប្រើប្រាស់ជីដូចជាជី ក្រុមហ៊ុន វីហ្គី អេហ្គ្រីបាយអូថេក របស់លោកស្រាប់ គឺទទួលបានផលជាវិជ្ជមានយ៉ាងអស្ចារ្យ។វាជាផលិតផលជីកសិកម្មដ៏មានគុណភាពរបស់ប្រទេសម៉ាឡេស៊ី។ ក្នុងរយៈពេលជាង ១៥ឆ្នាំមកនេះបានដំណើរការស្រាវជ្រាវ និងបន្តចែកចាយមកកាន់ប្រទេសផ្សេងៗជាច្រើនទៀតនិងក្នុងនេះរួមទាំង លើទីផ្សារប្រទេសកម្ពុជាយើង។ដោយសារការចំណាយពេលស្រាវជ្រាវ និងពិសោធន៍ រយៈពេលជាច្រើនឆ្នាំរហូតឈ្នះពានរង្វាន់ និងការទទួលស្គាល់ពីអន្តរជាតិជាច្រើន។

លោក មៀច សំណាង បានឱ្យដឹងដែរថា រូបមន្តពិសេស ដែលធ្វើឱ្យជីធម្មជាតិនេះ មានភាពអស្ចារ្យជាងជីដទៃទៀត ដោយសារ វាត្រូវបានបញ្ចូលរួចជាស្រេចនូវពពួកបាក់តេរីមានប្រយោជន៍ជាច្រើនប្រភេទ រួមទាំងពពួកផ្សិតក្រុមល្អ ដើម្បីធ្វើការកែប្រែគុណភាពដី ដែលសឹករិចរិលដោយកត្តាជាច្រើន រួមទាំងការប្រើប្រាស់ជីគីមីច្រើនហួសប្រមាណ ឱ្យត្រឡប់មកល្អប្រសើរវិញ ក៏ដូចជាជួយរក្សាជីវជាតិដីឱ្យនៅតែល្អជានិច្ច។ បន្ថែមពីនេះ វានឹងជួយទ្រទ្រង់ដំណាំឱ្យមានសុខភាពល្អ ប្រព័ន្ធឬសរឹងមាំ ការពារដំណាំពីជំងឺ និងសត្វល្អិតបំផ្លាញផ្សេងៗ ព្រមទាំងធន់នឹងការប្រែប្រួលអាសកាសធាតុ។ ពិសេសជំរុញឱ្យដំណាំអាចស្រូប យកជីវជាតិ និងទឹកបានល្អ ជាហេតុជួយឱ្យកសិករទទួលបានទិន្នផលខ្ពស់ និង កាត់បន្ថយការប្រើប្រាស់ជី និងថ្នាំគីមីបានយ៉ាងច្រើនរហូតដល់ ៥០- ៨០ភាគរយ។

ដោយឡែកកញ្ញា ផន ធីយ៉ា ថ្នាក់គ្រប់គ្រងមួយរូបប្រចាំ ក្រុមហ៊ុនលក់ជី  Unifi បានបញ្ជាក់ប្រាប់ថាការ ប្រើប្រាស់ជីកសិកម្មបានត្រឹមត្រូវតាមលក្ខខណ្ឌបច្ចេកទេស អាចគ្រប់គ្រងកត្តាចង្រៃនានាឱ្យមានប្រសិទ្ធភាពខ្ពស់ កាត់បន្ថយថ្លៃដើមផលិត និងដំណាំទទួលបានទិន្នផលកាន់តែប្រសើរ ក៏ដូចជាការចូលរួមជាមួយក្រសួងកសិកម្ម រុក្ខា ប្រមាញ់ និងនេសាទ ក្នុងការកាត់បន្ថយថ្លៃដើមធាតុចូលកសិកម្ម ជាផ្នែកមួយនៃការបង្កើនប្រាក់ចំណេញនៃការវិនិយោគរបស់បងប្អូនកសិករ។

គួរបញ្ជាក់ថា ពិព័រណ៍កសិកម្មកម្ពុជា CAFE25 រៀបចំឡើង រយៈពេលបួនថ្ងៃ ចាប់ពីថ្ងៃទី១៣ ដល់ថ្ងៃទី១៦ ខែវិច្ឆិកា ឆ្នាំ២០២៥ នៅមជ្ឈមណ្ឌលសន្និបាត និង ពិព័រណ៍ កោះពេជ្រ រាជធានីភ្នំពេញ។ស្ដង់ប្រមាណជា ៤០០ បានដាក់បង្ហាញនូវកសិផលយុទ្ធសាស្ត្រ ៩មុខ មានដូចជា៖ អង្ករ ស្វាយចន្ទី ម្រេច បន្លែ ត្រី ដំឡូងមី កៅស៊ូ ឈើ និងស្វាយ និងផលិតផលផ្សេងៗជាច្រើនទៀត៕

ដោយ៖មករា