AKP ភ្នំពេញ ថ្ងៃទី១៥ ខែវិច្ឆិកា ឆ្នាំ២០២៥ -- ក្រសួងអប់រំ យុវជន និងកីឡា បានឱ្យដឹងថា នាពេលបច្ចុប្បន្ននេះសិស្សានុសិស្សនៅតាមសាលារៀនគោលដៅមួយចំនួន រួមមាន ខេត្តស្ទឹងត្រែង សៀមរាប និងខេត្តតាកែវ បាន និងកំពុងចូលរួមសិក្សាយ៉ាងសកម្មក្នុងកម្មវិធីក្រៅម៉ោងសិក្សា កម្មវិធីអប់រំបង្កើតហ្គេម (GCC) តាមរយៈការបង្កើតហ្គេមអប់រំ។

កម្មវិធីខាងលើនេះផ្តោតលើការអនុវត្តជាក់ស្តែង ដោយសិស្សានុសិស្សបានហ្វឹកហាត់បង្កើតគំនូសឌីជីថល (Pixel Art) រៀបចំស្លាយបទបង្ហាញ និងធ្វើបទបង្ហាញអំពីដំណើរការបង្កើតហ្គេមអប់រំ ដែលសកម្មភាពទាំងនេះមិនត្រឹមតែផ្តល់ភាពសប្បាយរីករាយប៉ុណ្ណោះទេ ថែមទាំងជួយបណ្ដុះបណ្ដាលជំនាញសំខាន់ៗចំនួនពីរប្រភេទដល់ពួកគេថែមទៀតផងគឺ៖ ទី១. ជំនាញឌីជីថល ដែលរួមមាន ការរចនាក្រាហ្វិក ការប្រើប្រាស់កម្មវិធី និងការយល់ដឹងពីដំណើរការអភិវឌ្ឍន៍ហ្គេម និងទី២. បំណិនសតវត្សរ៍ទី២១ ដែលរួមមាន ភាពច្នៃប្រឌិត ការគិតត្រិះរិះ ការធ្វើការជាក្រុម ជំនាញទំនាក់ទំនង និងការដោះស្រាយបញ្ហា។

ក្រសួងអប់រំ យុវជន និងកីឡា បានប្រកាសពីការបន្តការគាំទ្រសកម្មភាពអប់រំឌីជីថលទាំងនេះ ដើម្បីអភិវឌ្ឍន៍សិស្សានុសិស្សឱ្យក្លាយជាធនធានមនុស្សប្រកបដោយសក្តានុពលក្នុងយុគសម័យឌីជីថល៕

ដោយ៖ ចាន់ សុភឿន (ប្រភព៖ ក្រសួងអប់រំ)