AKP ភ្នំពេញ ថ្ងៃទី១៥ ខែវិច្ឆិកា ឆ្នាំ២០២៥–ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ក្នុងពិធីសំណេះសំណាលជាមួយប្រតិភូកាយរឹទ្ធិជាតិ
កម្ពុជាមុនទៅចូលរួមការបោះជំរំកាយរឹទ្ធិជំទង់អន្តរជាតិសិង្ហបុរី ឆ្នាំ២០២៥ ក្រោមប្រធានបទ «សាទរដំណើររបស់យើងតាមរយៈការបង្កើនចំណងមិត្តភាពលើមាគ៌ា និងក្តីស្រម៉ៃរួមគ្នា» ចាប់ពីថ្ងៃទី១៨-២៣ ខែវិឆ្ឆិកា ឆ្នាំ២០២៥ ខាងមុខនេះ ដោយមានចូលរួមប្រមាណ ១.០០០នាក់ បានចាត់ទុកការបោះជំរំនេះ ពិតជាមានសារៈសំខាន់ណាស់សម្រាប់ក្មួយៗយុវជនកាយរឹទ្ធិកម្ពុជា ដើម្បីបណ្តុះបណ្តាល អភិវឌ្ឍន៍សមត្ថភាព ផ្លាស់ប្តូរបទពិសោធន៍ និងសិក្សារួមគ្នារវាងវប្បធម៌ចម្រុះរបស់ជាតិសាសន៍ដែលមកពីបណ្តាប្រទេសជាសមាជិកអាស៊ាន និងតំបន់អាស៊ី-ប៉ាស៊ីហ្វិក សរុបចំនួន ១៣ប្រទេស។

ថ្លែងក្នុងឱកាសនេះ ឯកឧត្តមរដ្ឋមន្ត្រីបានសម្តែងនូវការស្វាគមន៍យ៉ាងកក់ក្តៅ ស្និទ្ធស្នាល និងអបអរសាទរចំពោះប្អូនៗ និងក្មួយៗកាយរឹទ្ធិមកពីរាជធានីភ្នំពេញ ខេត្តកណ្តាល សៀមរាប ត្បូងឃ្មុំ និងខេត្តកំពង់ចាម ដែលត្រូវបានជ្រើសរើសក្នុងចំណោមប្អូនៗ និងក្មួយៗកាយរឹទ្ធិដទៃទៀត ដើម្បីទៅចូលរួមការបោះជំរំនៅប្រទេសសិង្ហបុរីដ៏មានសារៈសំខាន់នេះ និងបានគូសបញ្ជាក់ថា យុវជនកាយរឹទ្ធិម្នាក់ គឺជាទូតសុឆន្ទៈរបស់វិស័យទេសចរណ៍កម្ពុជាម្នាក់ និងជាតំណាងឱ្យកាយរឹទ្ធិជាតិកម្ពុជាម្នាក់។ ដូច្នេះសូមក្មួយៗម្នាក់ៗត្រូវជួយផ្សព្វផ្សាយព័ត៌មានវិជ្ជមាន និងសក្តានុពលទេសចរណ៍ វប្បធម៌កម្ពុជាឱ្យបានទូលំទូលាយ នៅក្នុងឱកាសនៃការបោះជំរំនេះ។

ឯកឧត្តមរដ្ឋមន្ត្រី ហួត ហាក់ បានផ្តាំផ្ញើដល់ប្អូនៗ និងក្មួយៗឱ្យថែរក្សាសុខភាព ដោយត្រូវអនុវត្តតាមការណែនាំអំពីសុខភាព និងសុវត្ថិភាពរបស់គណៈកម្មការជំរំ និងគ្រូពេទ្យ ត្រូវមានសីលធម៌ និងគោរពវិន័យ (ត្រូវស្តាប់ដោយយកចិត្តទុកដាក់ចំពោះអ្នកដឹកនាំ និងមេល្បាតរបស់ក្មួយៗ)។ ជាថ្មីម្តងទៀតឯកឧត្តមរដ្ឋមន្រ្តីបានគូសរំលេចថា ក្មួយៗទាំងអស់គ្នា គឺជាទូតសុឆន្ទៈរបស់វិស័យទេសចរណ៍កម្ពុជា និងតំណាងឱ្យកាយរឹទ្ធិជាតិកម្ពុជា ដោយក្មួយៗត្រូវហ្វឹកហាត់សម្តែងសិល្បៈ និងធើ្វការផ្សព្វផ្សាយវប្បធម៌ ទេសចរណ៍របស់យើងតាមរយៈបទម្រៀង របាំ និងការចែករំលែកវប្បធម៌ ប្រពៃណីខ្មែរដល់សមាជិកជំរំដទៃទៀត ជាពិសេសក្មួយៗ សូមជួយផ្សព្វផ្សាយព័ត៌មានវិជ្ជមាន សក្តានុពលទេសចរណ៍កម្ពុជា និងត្រូវឆ្លើយតប ករណីព័ត៌មាននិយាយខុសពីការពិតអំពីប្រទេសកម្ពុជាផងដែរ និងត្រូវបង្កើតមិត្តភាពជាមួយកាយរឹទ្ធិមកពីប្រទេសដទៃទៀតឱ្យបានជិតស្និទ្ធ៕

ដោយ៖ ចាន់ សុភឿន (ប្រភព៖ ក្រសួងទេសចរណ៍)