AKP ភ្នំពេញ ថ្ងៃទី១៥ ខែវិច្ឆិកា ឆ្នាំ២០២៥ -- ថ្លែងក្នុងសិក្ខាសាលាស្តីពី “ចំណេះដឹងហិរញ្ញវត្ថុ” រៀបចំឡើងដោយ សមាគមនារីក្រសួងព័ត៌មានកាលពីរសៀលថ្ងៃទី១៤ ខែវិច្ឆិកា ឆ្នាំ២០២៥ នៅសាលមណ្ឌលបណ្តុះបណ្តាល និងវិក្រឹតការវិជ្ជាជីវៈសារព័ត៌មាន លោកជំទាវ ទុយ សិរីរតនៈ នេត្រ ភក្ត្រា ប្រធានកិត្តិយស សាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ក្រសួងព័ត៌មានបានមានប្រសាសន៍ថា ការទទួលបាននូវចំណេះដឹងហិរញ្ញវត្ថុ ធ្វើឱ្យយើងអាចយល់ដឹងអំពីការគ្រប់គ្រងចំណូល-ចំណាយ ចេះសន្សំ និងវិនិយោគសម្រាប់អនាគត ប្រើប្រាសថវិកាចំទិសដៅ ត្រូវតាមកាលវេលា ធានាបាននូវការគ្រប់គ្រងហានិភ័យទាំងឡាយដែលអាចកើតមានឡើង ហើយក៏អាចរៀបចំផែនការសម្រាប់អនាគតគ្រួសារថែមទៀតផង។លោកជំទាវមានប្រសាសន៍បន្តថា ការដែលមានចំណេះដឹងផ្នែកហិរញ្ញវត្ថុ នឹងជួយបង្កើតវប្បធម៌ហិរញ្ញវត្ថុរឹងមាំ ដែលជាមូលដ្ឋានសម្រាប់អភិវឌ្ឍសេដ្ឋកិច្ចគ្រួសារ សហគមន៍ និងប្រទេសជាតិទាំងមូល។

លោកជំទាវ សាស្ត្រាចារ្យ បណ្ឌិត ម៉ម ដាត្ថាលីណែត ដែលជាវាគ្មិនក្នុងសិក្ខាសាលា“ចំណេះដឹងហិរញ្ញវត្ថុ”ខាងលើនេះបានសង្កត់ធ្ងន់ថា ចំណេះដឹងផ្នែកហិរញ្ញវត្ថុ សំដៅទៅលើចំណេះដឹងនិងសមត្ថភាពក្នុងការយល់ដឹងអំពីដំណើរការរបស់សាច់ប្រាក់និងរបៀបគ្រប់គ្រងសាច់ប្រាក់។គោលដៅចម្បងរបស់ចំណេះដឹងផ្នែកហិរញ្ញវត្ថុគឺការអប់រំឱ្យមនុស្សគ្រប់រូប ចេះគ្រប់គ្រងថវិការបស់ខ្លួន និងយល់ពីសារៈសំខាន់អំពីការសន្សំប្រាក់ និងការវិនិយោគដើម្បីទទួលបានសេរីភាពផ្នែកហិរញ្ញវត្ថុ និងជីវភាពធូរធារនាពេលអនាគត។ចំណុចសំខាន់នៃអង្គសិក្ខាសាលានេះបានបង្ហាញថា នៅពេលដែលយើងមានមូលដ្ឋានផ្នែកហិរញ្ញវត្ថុធ្វើឱ្យយើងអាចធ្វើការគ្រប់គ្រងហិរញ្ញវត្ថុផ្ទាល់ខ្លួនយ៉ាងឈ្លាសវៃនិងមានប្រសិទ្ធភាព យល់អំពីភាពខុសគ្នានៃ តម្រូវការ និង ចំណង់ អាចជួយបង្កើតទម្លាប់សន្សំនៅក្នុងគ្រួសារ យល់ពីភាពខុសគ្នារវាង ទ្រព្យសកម្ម និង បំណុល អាចមានសមត្ថភាពក្នុងការរកចំណូលបន្ថែមតាមរយៈការវិនិយោគ៕

ដោយ៖ ទូច វលក័្ខណ