AKP ភ្នំពេញ ថ្ងៃទី១៤  ខែវិច្ឆិកា  ឆ្នាំ២០២៥ -- លោកជំទាវ គង់ សូរីតា រដ្ឋលេខាធិការក្រសួងកិច្ចការនារី និងជាជនបង្គោលកម្ពុជានៃគណៈកម្មាធិការស្រ្តីអាស៊ាន ACW កាលពីថ្ងៃទី១៣ ខែវិច្ឆិកា ឆ្នាំ២០២៥ បានអញ្ជើញចូលរួមក្នុងកិច្ចប្រជុំលើកទី៥ នៃគណៈកម្មាធិការដឹកនាំតំបន់អាស៊ាន (AGMSC) នៅទីក្រុង Bohol ប្រទេសហ្វីលីពីន។

 លោកជំទាវរដ្ឋលេខាធិការ បានធ្វើបទអន្តរគមន៍ផ្តោតលើការបញ្រ្ជាបយេនឌ័រ ក្រោមគម្រោង "Operationalisation of the ASEAN Gender Mainstreaming Strategic Framework through the Ad-Hoc Working Group on Gender Mainstreaming” ដែលបានស្នើដោយក្រសួងកិច្ចការនារី និងត្រូវដឹកនាំដោយកម្ពុជា។

បទអន្តរគមន៍ ក៏បានបង្ហាញបន្ថែមលើកិច្ចការងារបញ្ជ្រាបយេនឌ័រនៅប្រទេសកម្ពុជា បានអនុវត្តច្រើនឆ្នាំមកហើយ ដែលមានក្រសួងកិច្ចការនារីជាសេនាធិការរបស់រាជរដ្ឋាភិបាលក្នុងការជំរុញ និងបង្កើនភាពអង់អាចដល់ស្រ្តី និងក្មេងស្រ្តី នៅគ្រប់វិស័យ ហើយកម្ពុជាមានយន្តការច្បាស់លាស់ក្នុងការបញ្រ្ជាបយេនឌ័រ តាមក្រសួង-ស្ថាប័ន ចាប់ពីថ្នាក់ជាតិ ដល់ថ្នាក់ក្រោមជាតិ និងមានការចូលរួម និងគាំទ្រពីថ្នាក់ដឹកនាំកំពូលរបស់កម្ពុជាផងដែរ។

នៅរសៀលថ្ងៃដដែល លោកជំទាវ បានទទួលជួបជាមួយតំណាង UN Women ថ្នាក់តំបន់ ដើម្បីស្វែងរកកិច្ចសហការលើកិច្ចការងារថ្នាក់តំបន់ និងក្នុងប្រទេសកម្ពុជាផងដែរ។ អង្គការ UN Women ថ្នាក់តំបន់ បានបង្ហាញពីការគាំទ្រ និងកោតសរសើរពីការដឹកនាំរបស់កម្ពុជាលើការងារក្រុមប្រឹក្សាស្រ្តី សន្តិសុខ និង សន្តិភាពនៅអាស៊ាន កន្លងមក ហើយសន្យាថានឹងបន្តគាំទ្រលើការងារទាំងអស់នោះបន្តទៀត៕

ដោយ៖ ពេជ្រ សំអឿន( ប្រភព៖ក្រសួងកិច្ចការនារី )