AKP កំពង់ធំថ្ងៃទី១៥ ខែវិច្ឆិកា ឆ្នាំ២០២៥ -- លោក លំ គន្ធារី អភិបាលរងខេត្តតំណាងឯកឧត្តម នួន ផារ័ត្នអភិបាលខេត្តកំពង់ធំ បានលើកឡើងថាទិវាមនុស្សចាស់ស្របតាមប្រធានបទ"វ័យចាស់ដោយសេចក្តីថ្លៃថ្នូរ"ដែលជាទិវាមួយសម្រាប់រំឭកគុណដល់មនុស្សចាស់ មនុស្សលើសកលលោកក្នុងការចូលរួមកសាងសង្គមជាតិមួយ គ្រប់វ័យ ពិសេសចំពោះមនុស្សចាស់ក្នុងឱកាសជួបសំណេះសំណាលជាមួយបងប្អូនសមាគមនុស្សចាស់ ក្នុងកម្មវិធីអបអរសាទរទិវាមនុស្សចាស់កម្ពុជា និងទិវាមនុស្សចាស់អន្តរជាតិ០១ តុលា ឆ្នាំ២០២៥នៅវត្តធម្មឃោសិតារាម(វត្តស្លែង) ឃុំក្តីដូង ស្រុកកំពង់ស្វាយ ខេត្តកំពង់ធំកាលពីរសៀលថ្ងៃទី១៤ខែវិច្ឆិកាឆ្នាំ២០២៥ដោយមានអ្នកចូលរួមប្រមាណជាង១៥០នាក់។

លោក ឃន ឆេងលី ប្រធានសមាគមក្តីមេត្តាឃុំក្តីដូងនិងសមាគមអន្តរជំនាន់ភូមិពាមគ្រែងបានលើកឡើងថា រាជរដ្ឋាភិបាលកម្ពុជាផ្តល់បេសកកម្មឱ្យក្រសួងសង្គមកិច្ច អតីតយុទ្ធជននិងយុវនីតិសម្បទា ទទួលបន្ទុករៀបចំអនុវត្តគោនយោបាយជាតិ ស្តីពីមនុស្សវ័យចាស់ឆ្នាំ២០១៧-២០៣០ ធ្វើផែនការសកម្មភាពឆ្នាំ២០២១-២០២៥ ដើម្បីជួយផ្តល់សេវាកម្មនានាសម្រាប់មនុស្សចាស់ក្នុងខេត្តកំពង់ធំនៅក្នុងឃុំក្តីដូងបច្ចុប្បន្ននេះសមាគមក្តីមេត្តាឃុំក្តីដូង១.ក្នុង០១ខែជួបជុំគ្នាម្តងពិភាក្សារកការរីចម្រើននៅក្នុងសហគមន៍។ ២.ហាត់ប្រាណប្រចាំអាទិត្យនិងហាត់ប្រាណតាមផ្ទះជាប្រចាំ។ ៣.ថ្លឹងគីឡូសុខភាព និងវាស់សម្ពាធឈាម ជូនសមាជិកជារាងរាល់ខែ។ ៤.ជួសរកជាតិស្ត និងស្នើមណ្ឌលសុខភាពមកពិនិត្យសុខភាព ជូនសមាជិក។ ៥.ចុះថែសមាជិក ចាស់ជរាគ្មានទីពឹងតាមផ្ទះ។ ៦.ចុះសួរសុខទុក្ខសមាជិកមានជំងឺដល់ផ្ទះ និងឧបត្ថម្ភថវិកា។ ៧.ពេលសមាជិកទទួលមរណភាព ឧបត្ថម្ភថវិកា។ ៨.បង្រៀនសមាជិកឱ្យចេះធ្វើជីធម្មជាតិដាក់ដំណាំ និងបង្រៀនធ្វើចំណីសត្វ។ ៩.មានទុនកម្ចីខ្នាតតូច ដល់សមាជិកសមាគមដើម្បីប្រកបមុខរបរខ្នាតតូច។

ក្នុងឱកាសនេះលោកស្រី លំ គន្ធារី បានសម្តែងនូវការកោតសរសើរចំពោះមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តកំពង់ធំ អាជ្ញាធរមូលដ្ឋាន និងស្ថាប័នពាក់ព័ន្ធដ៏ទៃទៀតដែលបានរៀបចំកម្មវិធីនេះឡើង ដើម្បីបង្កើនការយកចិត្តទុកដាក់លើកស្ទួយសុខុមាលភាពមនុស្សចាស់ឱ្យកាន់តែប្រសើរឡើង តាមរយៈការកសាងសមាគមមនុស្សចាស់ សំដៅជួយគ្នាទៅវិញទៅមកពេលមានជំងឺ អប់រំអំពីសុខភាពឬដំណោះស្រាយពេលមានទុក្ខធុរៈជាដើម សំដៅជួយគាំទ្រដល់ចាស់ជរាដែលគ្មានទីពឹង។ ចុះសួរសុខទុក្ខ និងជួយឧបត្ថម្ភដល់ជនចាស់ជរា ជនពិការ ទុរគតិជន នៅតាមសហគមន៍។ ពង្រឹងនូវសីលធម៌ និងទំនៀមទម្លាប់ល្អរបស់ខ្មែរយើង ពិសេសត្រូវអប់រំកូនចៅ និងមនុស្សជំនាន់ក្រោយៗទៀត ឱ្យចេះគោរពដំបូន្មានរបស់មាតាបិតានិងគោរពព្រឹទ្ធាចារ្យ។អង្គការក្រៅរដ្ឋាភិបាល ស្ថាប័ន អង្គភាព និងសប្បុរសជនជិតឆ្ងាយនានា មេត្តាបង្កើនទៅលើតម្រូវការរបស់មនុស្សចាស់ដែលកំពុងរស់នៅយកចិត្តទុកដាក់ឱ្យកាន់តែប្រសើរថែមទៀត។ សហគមន៍ធ្វើយ៉ាងណាឱ្យមនុស្សចាស់រស់នៅប្រកបដោយសុខដុមរមនា និងសេចក្តីថ្លៃថ្នូរមានមុខមានមាត់ក្នុងសង្គម។

សូមបញ្ជាក់ថាសមាគមមនុស្សចាស់ក្តីមេត្តាឃុំក្តីដូង បានបង្កើតឡើងនៅថ្ងៃទី០៣ ខែមីនា ឆ្នាំ២០១៨ និងសមាគមមនុស្សចាស់គំរូអន្តរជំនាន់ភូមិពាមគ្រែងបង្កើតឡើងនៅថ្ងៃទី២៣ខែតុលា ឆ្នាំ២០២២ ដែលមានសមាជិកសរុបចំនួន៥៥៧នាក់(ស្រី៣៧៦ នាក់)។សម្រាប់កម្មវិធីនេះសមាគមមនុស្សចាស់ក្តីមេត្តាឃុំក្តីដូងមានចំនួន៨០នាក់ (ស្រី៥៣នាក់)និងសមាគមមនុស្សចាស់គំរូអន្តរជំនាន់ភូមិពាមគ្រែងមានចំនួន២០នាក់ (ស្រី០៤នាក់)ម្នាក់ៗទទួលបានសារុង១និងថវិកាចំនួន២០០០០រៀលឧបត្ថម្ភដោយលោកស្រី លំ គន្ធារីនិងឯកឧត្តម ប្លុង ពុទ្ធកូរ៉ាសមាជិកក្រុមប្រឹក្សាខេត្ត៕

ដោយ៖ ស៊ុម វណ្ណា