AKP ភ្នំពេញ ថ្ងៃទី១៤ ខែវិច្ឆិកា ឆ្នាំ២០២៥ -- របាយការណ៍របស់លេខាធិការដ្ឋាននៃក្រុមការងារចំពោះកិច្ចរៀបចំយុទ្ធនាការ “និយាយថាទេចំពោះព័ត៌មានក្លែងក្លាយ - Say No To Fake News” ស្តីពីការអនុវត្តយុទ្ធនាការរយៈពេល៦ខែ គឺចាប់ពីខែមេសា ដល់ខែកញ្ញា ឆ្នាំ២០២៥ បានបង្ហាញលទ្ធផលល្អប្រសើរ ក្នុងនោះ យុទ្ធនាការបានផ្តល់ព័ត៌មាន បង្កើនចំណេះដឹងអំពីគ្រោះថ្នាក់ និងការបង្ការហានិភ័យដែលបណ្តាលមកពីព័ត៌មានក្លែងក្លាយ ក៏ដូចជារបៀបផ្ទៀងផ្ទាត់ព័ត៌មាន តាមរយៈការផ្សព្វផ្សាយមាតិកាបែបអប់រំសរុបចំនួនប្រមាណជាង​ ២៥ ៦០០ ដង/មាតិកា ដែលត្រូវបានបញ្ចេញតាមប្រព័ន្ធផ្សព្វផ្សាយរដ្ឋ-ឯកជន ទាំងប្រពៃណី និងទំនើប និងតាមបណ្តាញសង្គម ក្នុងនោះ មានមាតិកាអប់រំថ្មីចំនួនប្រមាណ ២ ០០០ មាតិកា ដែលបង្ហាញរបៀបកំណត់ព័ត៌មានក្លែងក្លាយ និងសារក្រើនរម្លឹកអំពីផលវិបាកនៃព័ត៌មានក្លែងក្លាយ រាប់បញ្ចូលទាំងព័ត៌មានក្លែងក្លាយបង្កើតដោយ Ai។ យុទ្ធនាការនេះ ក៏កំពុងដំណើរការអនុវត្តន៍យ៉ាងសកម្មនៅតាមបណ្តារាជធានី-ខេត្ត និងទទួលបានការគាំទ្រច្រើនឡើងៗពីប្រជាពលរដ្ឋតាមសហគមន៍នៅទូទាំងប្រទេស ជាមួយនឹងការបន្តចូលរួមជាប្រចាំ ទាំងក្នុងយុទ្ធនាការលើបណ្តាញទំនាក់ទំនងសង្គម តាមរយៈសកម្មភាពផ្សព្វផ្សាយ ព្រឹត្តិការណ៍នានា ក៏ដូចជាការចូលរួមក្នុងសកម្មភាពផ្ទាល់ក្នុងសហគមន៍។

ឯកឧត្តម ទេព អស្នារិទ្ធ អនុរដ្ឋលេខាធិការ និងជាប្រធានលេខាធិការដ្ឋានក្រុមការងារចំពោះកិច្ចរៀបចំយុទ្ធនាការ “និយាយថាទេចំពោះព័ត៌មានក្លែងក្លាយ”​ នៃក្រសួងព័ត៌មានបានបញ្ជាក់ឱ្យដឹងនៅថ្ងៃទី១៤ ខែវិច្ឆិកា ឆ្នាំ២០២៥នេះថា ការអនុវត្តយុទ្ធនាការតាមបណ្តារាជធានី-ខេត្ត ចាប់តាំងពីខែមេសារហូតមកដល់ខែកញ្ញា ឆ្នាំ២០២៥ សម្រេចបានលទ្ធផលសំខាន់ៗ ទាក់ទងនឹងការផ្សព្វផ្សាយអប់រំមាតិកាបែបអប់រំ ហើយមាតិកាទាំងនេះត្រូវបានអ្នកប្រើប្រាស់បណ្តាញសង្គមចែករំលែកបន្ត ប្រកបដោយការទទួលខុសត្រូវ ដោយការផ្សាយជាឯកជនរបស់ពលរដ្ឋទូទៅ និងសហគមន៍អ្នកប្រើប្រាស់បណ្តាញសង្គមជាច្រើនទៀត។ ឯកឧត្ដមបានបញ្ជាក់ថា ព្រឹត្តិការណ៍ផ្សព្វផ្សាយតាមទីសាធារណៈ ក៏ដូចជាពិធីប្រជុំផ្សព្វផ្សាយក្នុងខេត្ត ក្រុង ស្រុក ត្រូវបានរៀបចំឡើង សរុបចំនួន ២៨២ លើក នៅក្នុងរាជធានីភ្នំពេញ ខេត្តកណ្តាល កំពង់ស្ពឺ កំពង់ឆ្នាំង តាកែវ កំពត កែប ព្រះសីហនុ កោះកុង កំពង់ចាម​ ព្រៃវែង​ ស្វាយរៀង ពោធិ៍សាត់ សៀមរាប និងស្ទឹងត្រែង ដើម្បីបញ្ជ្រាបការយល់ដឹងសាធារណៈឱ្យទូលំទូលាយ។ ទន្ទឹមនេះ យុទ្ធនាការបានផ្សព្វផ្សាយ​ផ្ទាល់ដល់សិស្សានុសិស្សតាមសាលារៀន សហគមន៍ និងតាមភូមិ-ឃុំ ដែលមានប្រជាពលរដ្ឋរស់នៅ និងកំពុងប្រើបណ្តាញសង្គមសម្រាប់ការទទួលព័ត៌មាន។ សកម្ម​ភាពនេះកំពុងបន្តអនុវត្តនៅតាមបណ្តាខេត្តផ្សេងៗទៀត តាម​កាលវិភាគកំណត់ ខណៈយុទ្ធនាការផ្សព្វផ្សាយលើបណ្តាញសង្គម​បានបន្តជាប្រចាំ។

ជាមួយគ្នានេះ ឯកឧត្ដមអនុរដ្ឋលេខាធិការបានលើកឡើងថា ការគាំទ្ររបស់សាធារណៈជនកំពុងមានសន្ទុះជាមួយអ្នកចូលរួមប្រមាណជាង៥លាននាក់ និងបន្តកើនឡើងទៀត ទាំងក្នុងយុទ្ធនាការលើបណ្តាញទំនាក់ទំនងសង្គម និងតាមរយៈការចូលរួមក្នុងសកម្មភាពផ្សព្វផ្សាយ ព្រមទាំងការចូលរួមក្នុងព្រឹត្តិការណ៍នានាតាមសហគមន៍។ យុទ្ធនាការបានផ្ញើសារអប់រំតាមប្រព័ន្ធ TRC-SMS ទៅកាន់អ្នកប្រើប្រាស់ទូរសព្ទចល័តចំនួនជាង ២៣លាន នាក់/គណនី នៅទូទាំងប្រទេសកម្ពុជា។ ចំពោះការផ្សព្វផ្សាយតាមទីសាធារណៈតាមរយៈផ្ទាំងប៉ាណូធំៗសរុបចំនួន ៤៥ផ្ទាំង នៅក្នុងរាជធានីភ្នំពេញ ខេត្តកណ្តាល កំពង់ចាម សៀមរាប រតនគីរី ត្បូងឃ្មុំ តាកែវ ព្រះសីហនុ ស្វាយរៀង កំពង់ស្ពឺ កំពត កែប មណ្ឌលគិរី កំពង់ឆ្នាំង និងខេត្ដបាត់ដំបង បានរួមចំណែកធានាការទទួលព័ត៌មានស្តីពីយុទ្ធនាការនេះឱ្យកាន់តែទូលំទូលាយ។ លើសពីនេះទៀត ក្នុងក្របខ័ណ្ឌធានាសណ្តាប់ធ្នាប់សារព័ត៌មាន និងការផ្សាយលើបណ្តាញសង្គម ក្រសួងព័ត៌មានបានដាក់ចេញសេចក្តីណែនាំ និងបទដ្ឋានតម្រង់ទិសលើក្រមសីលធម៌ និយាមប្រតិបត្តិបណ្តាញសង្គម សម្រាប់អ្នកសារព័ត៌មាន អ្នកបង្កើតមាតិកាលើបណ្តាញសង្គមអនុវត្តតាម ដើម្បីលើកកម្ពស់សុវត្ថិភាពព័ត៌មាន និងពង្រឹងការប្រើប្រាស់បណ្តាញសង្គមប្រកបដោយការទទួលខុសត្រូវ និងអនុលោមតាមសីលធម៌សង្គម។

ឯកឧត្តម ទេព អស្នារិទ្ធ បានមានប្រសាសន៍គូសបញ្ជាក់ថា ជាមួយនឹងលទ្ធផលទាំងនេះ និងសកម្មភាពដែលត្រូវអនុវត្តន៍បន្ត យុទ្ធនាការ “និយាយថាទេចំពោះព័ត៌មានក្លែងក្លាយ” កំពុងក្លាយជាចលនាជាតិ ដើម្បីផ្តល់ការការ​ពារជូនប្រជាពលរដ្ឋពីមហន្តរាយដែលអាចកើតពីព័ត៌មានក្លែងក្លាយ។​ ឯកឧត្ដមបានអះអាងថា ការសាយភាយ​ព័ត៌មានក្លែងក្លាយកាន់តែមានភាពខ្លាំងក្លាឡើង ហើយបានក្លាយជាក្តីបារម្ភចំបងមួយសម្រាប់បណ្តាប្រទេស​នៅលើពិភពលោក ខណៈបច្ចេកវិទ្យាបាននិងកំពុងវិវត្តរីកចម្រើនឡើងឥតឈប់ឈរ។ ឯកឧត្តមទេព អស្នារិទ្ធ បានមានប្រសាសន៍៖ «នៅកម្ពុជា យុទ្ធនាការ “និយាយថាទេចំពោះព័ត៌មានក្លែងក្លាយ” និងយន្តការប្រឆាំងព័ត៌មានក្លែងក្លាយរបស់ក្រសួងព័ត៌មាន បានផ្តល់ភាពជឿជាក់ពីសំណាក់ប្រជាពលរដ្ឋមកលើការដឹកនាំ និងឆ្លុះបញ្ចាំងឆន្ទៈក្នុងការការពារសហគមន៍ និងសង្គមជាតិពីគ្រោះថ្នាក់ ដែលបង្កឡើងដោយព័ត៌មានក្លែងក្លាយ រាប់បញ្ចូលទាំងព័ត៌មានក្លែងក្លាយបង្កើតដោយបច្ចេកវិទ្យា Ai»។

ឯកឧត្តមអនុរដ្ឋលេខាធិការបានមានប្រសាសន៍បន្ថែមថា យុទ្ធនាការនេះបានបង្កើនការយល់ដឹងជាសាធារណៈអំពីផលវិបាក និងគ្រោះថ្នាក់ដែលបណ្តាលមកពីព័ត៌មានក្លែងក្លាយ ជាពិសេសលើកកម្ពស់កម្រិតអក្ខរកម្មព័ត៌មាន និងប្រព័ន្ធផ្សព្វផ្សាយនៅក្នុងចំណោមអ្នកប្រើប្រាស់បណ្តាញសង្គមនៅកម្ពុជា។ យុទ្ធនាការនេះកាន់តែមានភាពសកម្មឡើង ខណៈពលរដ្ឋ អាជីវករ អ្នកប្រកបរបរក្នុងសេដ្ឋកិច្ចក្រៅប្រព័ន្ធ មន្ត្រីរាជការ អ្នកសារព័ត៌មាន សិស្ស និស្សិត អ្នកបង្កើតមាតិកាលើបណ្តាញសង្គមជាច្រើន បានបន្តចូលរួមទប់ស្កាត់ការបង្កើត និងចែកចាយព័ត៌មានក្លែងក្លាយ ដើម្បីរួមចំណែកធានាសុវត្ថិភាពព័ត៌មានក្នុងសង្គម។

ឯកឧត្ដមប្រធានលេខាធិការដ្ឋានក្រុមការងារបានបន្ថែមថា តាមរយៈយុទ្ធនាការនេះ កម្រិតអក្ខរកម្មព័ត៌មាន និងប្រព័ន្ធផ្សព្វផ្សាយរបស់ពលរដ្ឋកម្ពុជា ត្រូវបានមើលឃើញថាមានការកើនឡើងថែមមួយកម្រិត ពិសេសក្នុងចំណោមអ្នកប្រើប្រាស់បណ្តាញសង្គមគ្រប់ប្រភេទ រាប់បញ្ចូលទាំងយុវវ័យផង ពោលគឺប្រជាពលរដ្ឋបានយល់ច្បាស់អំពីផលវិបាក និងមហន្តរាយ ដែលអាចកើតចេញពីការផលិត និងចែករំលែកព័ត៌មានមិនពិត ឬការផ្សាយដែលគ្មានប្រភពច្បាស់លាស់។ បន្ថែមពីនេះទៀត ពលរដ្ឋកម្ពុជាបានទទួលចំណេះដឹងអំពី សន្តិសុខព័ត៌មាន ហើយបានចែករំលែកចំណេះដឹងទាំងនោះ ដើម្បីអប់រំកូនចៅ មិត្តភក្តិ សមាជិកគ្រួសារ/សហគមន៍ អំពីការពិនិត្យព័ត៌មានដែលមានប្រភពពីបណ្តាញសង្គម ដោយផ្ទៀងផ្ទាត់ជាមួយនឹងប្រភពព័ត៌មានផ្លូវការរបស់ស្ថាប័នរដ្ឋ-ឯកជន និងសារព័ត៌មានដែលគោរពក្រមសីលធម៌វិជ្ជាជីវៈ មុននឹងជឿ ឬចែករំលែកបន្ត សម្រាប់រួមចំណែកក្នុងការធានាសណ្តាប់ធ្នាប់ ភាពសុខសាន្ត និងការអភិវឌ្ឍ។

ក្នុងឱកាសនោះ ឯកឧត្តម ទេព អស្នារិទ្ធ ក៏បានអំពាវនាវដល់ប្រជាពលរដ្ឋនៅទូទាំងប្រទេស ជានិច្ចកាលសូមតាមដានស្ថានការណ៍នានាពីប្រភពព័ត៌មានផ្លូវការ សម្រាប់ការទទួលបានព័ត៌មានប្រចាំថ្ងៃ ជាពិសេសបញ្ហាសំខាន់ៗដែលកំពុងកើតឡើងនៅក្នុងសង្គម រាប់បញ្ចូលទាំងប្រធានបទព្រំដែនកម្ពុជា-ថៃ ផងដែរ។

សូមបញ្ជាក់ថា យុទ្ធនាការ”និយាយថាទេចំពោះព័ត៌មានក្លែងក្លាយ” ត្រូវបានផ្តួចផ្តើម និងដឹកនាំដោយក្រសួងព័ត៌មាន ហើយត្រូវបានអនុវត្តចាប់តាំងពីខែមេសា ឆ្នាំ២០២៥ មក និងកំពុងបន្តសកម្មភាពតាមបណ្តារាជធានី ខេត្ត ក្នុងក្របខ័ណ្ឌនៃការអនុវត្តនៅទូទាំងប្រទេស ក្រោមការរៀបចំ និងចូលរួមដោយថ្នាក់ដឹកនាំនៃគណៈអភិបាលរាជធានី ខេត្ត អាជ្ញាធរក្រុង ស្រុក/ឃុំ វិស័យឯកជនក្នុងរាជធានី ខេត្ត និងដៃគូពាក់ព័ន្ធ៕

ដោយ៖ រិទ្ធី