AKP កំពង់ធំ ថ្ងៃទី១៤ ខែវិច្ឆិកា ឆ្នាំ២០២៥-- ឯកឧត្តម នួន ផារ័ត្ន អភិបាលខេត្តកំពង់ធំ កាលពីថ្ងៃទី១៣ ខែវិច្ឆិកា ឆ្នាំ២០២៥ បានអញ្ជើញចុះពិនិត្យ និងជំរុញការស្ថាបនាផ្លូវកៅស៊ូ DBST១ខ្សែមានប្រវែង១៤,៦គីឡូម៉ែត្រ ពីភូមិកំពង់ឈើទាលដល់ភូមិប្រឡាយ ឃុំសំបូរ ស្រុកប្រាសាទសំបូរ ខេត្តកំពង់ធំ។

ឯកឧត្តម នួន ផារ័ត្ន បានលើកឡើងថា ការស្ថាបនាផ្លូវកៅស៊ូ DBST១ខ្សែនេះគឺជាការកែលម្អការធ្វើដំណើរដើម្បីបង្កើនការតភ្ជាប់ និងផ្តល់ផលប្រយោជន៍យ៉ាងខ្លាំងដល់ការដឹកជញ្ជូនកសិផលរបស់ប្រជាពលរដ្ឋ ព្រមទាំងជំរុញកំណើនសេដ្ឋកិច្ចសម្រាប់ប្រជាពលរដ្ឋជាពិសេសសម្រាប់ប្អូន កូនក្មួយសិស្សានុសិស្សបានធ្វើដំណើរទៅសាលារៀនានស្រួលនិងទាន់ពេលវេលា។

ជាមួយគ្នានេះដែរ ឯកឧត្តមអភិបាលខេត្តក៏បានជម្រាបជូនបងប្អូនប្រជាពលរដ្ឋប្រមាណ៣០០នាក់អំពីស្ថានភាពវិវត្តថ្មីៗនៃសភាពការណ៍នៅតាមព្រំដែនកម្ពុជា-ថៃ ជាពិសេសទង្វើដ៏សែនអាក្រក់អមនុស្សធម៌ និងជាឧក្រិដ្ឋកម្មដ៏សាហាវឃោរឃៅរបស់ទាហានថៃដែលបានបើកការបាញ់ប្រហារមកលើប្រជាជនខ្មែរស្លូតត្រង់នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ កាលពីថ្ងៃទី១២ ខែវិច្ឆិកា ឆ្នាំ២០២៥ ដែលកម្ពុជាយើងធ្វើការថ្កោលទោសនិង ទាមទារឱ្យមានការទទួលខុសត្រូវលើទង្វើដ៏សែនអមនុស្សធម៌នេះ។

ឯកឧត្តម នួន ផារ័ត្ន បានអំពាវនាវសូមបងប្អូនប្រជាពលរដ្ឋជឿជាក់លើការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាក្នុងការរក្សាសន្តិភាពនិងការការពារអធិបតេយ្យ បូរណភាពដែនដី និងសុវត្ថិភាពជូនបងប្អូនប្រជាពលរដ្ឋយើង។សាមគ្គីជាតិយើងសំខាន់ណាស់ក្នុងការទប់ទល់នឹងការឈ្លានពានរបស់សត្រូវខាងក្រៅ៕

ដោយ ស៊ុម វណ្ណា