AKP ភ្នំពេញ ថ្ងៃទី១៤ ខែវិច្ឆិកា ឆ្នាំ២០២៥-- អង្គការ NatureLife បានឱ្យដឹងកាលពីថ្ងៃទី១៣ ខែវិច្ឆិកា ឆ្នាំ២០២៥ថា កាលថ្មីៗនេះ ក្រោយពីដាច់គម្រោងនិងថវិកាជំនួយ សហគមន៍តំបន់ការពារធម្មជាតិទួលនាងសាវផ្លូវហ្លួងក៏នៅតែបន្ដឆន្ទៈក្នុងការចូលរួមតាមដានជីវចម្រុះ និងអង្កេតតាមដានបទល្មើសនៅក្នុងតំបន់អភិរក្សរបស់សហគមន៍។ សហគមន៍នៅតែបន្ដគាំទ្រការងារល្បាតប្រចាំខែដោយប្រើប្រាស់ថវិការផ្ទាល់ខ្លួន ជាមួយនឹងឆន្ទៈ និងការប្តេជ្ញាចិត្ត ក្រោមការដឹកនាំ និងជំរុញសម្របសម្រួលលដោយលោកស្រី ហ៊ុន ឆេងគា ដែលជាប្រធានសហគមន៍។

ក្នុងស្ថានភាពនេះ សហគមន៍ក្រោមការសម្របសម្រួលអង្គការជីវិតធម្មជាតិនៅកម្ពុជា (NatureLife Cambodia) បាននឹងកំពុងជំរុញបន្ថែមលើនិរន្ដថវិកាក្នុងសហគមន៍ តាមរយៈការពង្រឹងផលិតផលត្រីទន្លេ ដែលជាផលិតផលត្រីឆ្អើមិត្ដភាពបរិស្ថានក្នុងការបង្កើនជីវភាពសហគមន៍ និងប្រមូលបដិភាគសម្រាប់ការងារអភិរក្ស។ កន្លងមក ត្រីទន្លេបានរួមចំណែកផ្ដល់បដិភាគមួយចំនួនជាមួយសហគមន៍ តែមិនទាន់គ្រប់គ្រាន់នៅឡើយ ដែលត្រូវពង្រឹង និងពង្រីកវិសាលភាពបន្ថែមបន្ដទៀត។

គួរបញ្ជាក់ថា សហគមន៍នេះជាទីតាំងដែលសំបូរទៅដោយធនធានត្រី សត្វស្លាបទឹក ព្រៃលិចទឹក និងជីវៈចម្រុះជាច្រើនប្រភេទ ដែលស្ថិតនៅក្នុងតំបន់រ៉ាមសារស្ទឹងសែននៃតំបន់បឹងទន្លេសាប ក្នុងភូមិសាស្រ្ដភូមិទួលនាងសាវ ឃុំផាត់សណ្តាយ ស្រុកកំពង់ស្វាយ ខេត្តកំពង់ធំ។ អ្នកអាចចូលរួមជាមួយសហគមន៍ក្នុងការពារធនធានធម្មជាតិបឹងទន្លេសាបយើងបាន តាមរយៈការគាំទ្រត្រីទន្លេ៕

ដោយ ណយ នឿន (ប្រភព៖ NatureLife)