AKP បន្ទាយមានជ័យ ថ្ងៃទី១៣ ខែវិច្ឆិកា ឆ្នាំ២០២៥--

គណៈប្រតិភូគណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន (គណៈកម្មការទី៤) នៃរដ្ឋសភា បានចុះជួបសំណេះសំណាល និងផ្ដល់អំណោយមនុស្សធម៌ដល់ប្រជាពលរដ្ឋខ្មែរភៀសសឹកជិត ៣០០ គ្រួសារ ដែលកំពុងស្នាក់នៅបណ្ដោះអាសន្ននៅជំរំវត្តច័ន្ទស៊ីសាមគ្គីរតនារាម ស្ថិតក្នុងឃុំកូប ស្រុកអូរជ្រៅ ខេត្តបន្ទាយមានជ័យ នាថ្ងៃទី១៣ ខែវិច្ឆិកា ឆ្នាំ២០២៥។

ការចុះបំពេញបេសកកម្មនេះ ធ្វើឡើងដោយបានការអនុញ្ញាតពីសម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា។ គណៈប្រតិភូដឹកនាំដោយឯកឧត្ដម កែប ជុតិមា ប្រធានគណៈកម្មការទី៤ នៃរដ្ឋសភា ដោយមានការចូលរួមពីតំណាងរាស្ដ្រមណ្ឌលខេត្តបន្ទាយមានជ័យ រួមមាន ឯកឧត្ដម ខេង ស៊ុម, ឯកឧត្ដម អ៊ី ឡុង និងលោកជំទាវ នូម សុភ័ណ ព្រមទាំងមានវត្តមានឯកឧត្ដម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ និងឯកឧត្ដម លី សុវណ្ណរិទ្ធ អភិបាលរងខេត្តបន្ទាយមានជ័យផងដែរ។

ក្នុងឱកាសនោះ ឯកឧត្ដម កែប ជុតិមា បានពាំនាំនូវការផ្ដាំផ្ញើសាកសួរសុខទុក្ខប្រកបដោយក្ដីនឹករលឹក និងការគិតគូរពីសំណាក់ថ្នាក់ដឹកនាំកំពូលនៃជាតិ គឺសម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា, ឯកឧត្ដមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា, ឯកឧត្ដម វង សូត អនុប្រធានទី២ រដ្ឋសភា, សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជូនដល់បងប្អូនប្រជាពលរដ្ឋភៀសសឹកទាំងអស់។

ឯកឧត្តមក៏បានអំពាវនាវដល់បងប្អូនប្រជាពលរដ្ឋខ្មែរ សូមមេត្តាតស៊ូ អត់ធ្មត់ ជឿទុកចិត្តលើថ្នាក់ដឹកនាំ និងរួមសាមគ្គីគ្នាជាធ្លុងមួយឲ្យបានរឹងមាំ ក្នុងគ្រាដែលប្រទេសជាតិកំពុងជួបប្រទះសង្គ្រាមឈ្លានពានពីកងទ័ពសៀម។
"សូមមេត្តាមានជំនឿជឿជាក់លើថ្នាក់ដឹកនាំរបស់រាជរដ្ឋាភិបាលកម្ពុជា ដែលដឹកនាំដោយសម្ដេចមហាបវរធិបតី ហ៊ុន ម៉ាណែត ក្នុងនីតិកាលទី៧ នៃរដ្ឋសភា ក្នុងការដោះស្រាយជម្លោះព្រំដែនប្រកបដោយពុទ្ធិបញ្ញាញាណឈ្លាសវៃ ប្រកាន់ខ្ជាប់នូវសន្តិភាព និងអហិង្សាជាស្នូលក្រោមម្លប់សន្តិភាព"។

ឯកឧត្ដមបានគូសបញ្ជាក់បន្ថែមថា ប្រជាពលរដ្ឋខ្មែរយើងទាំងអស់គ្នា គឺជាកម្លាំងដ៏កក់ក្ដៅពោរពេញដោយថាមពលរបស់រាជរដ្ឋាភិបាល និងកងកម្លាំងប្រដាប់អាវុធ ដែលជាស្នូលនៃការការពារជាតិមាតុភូមិ បូរណភាពដែនដី និងស្ថិរភាពសង្គម។ ផលប៉ះពាល់នៃការភៀសខ្លួន និងការឧបត្ថម្ភ
ការជួបជុំនេះធ្វើឡើងបន្ទាប់ពីមានការបាញ់ប្រហារទៅលើជនស៊ីវិលខ្មែរពីសំណាក់កងទ័ពឈ្លានពានថៃនៅរសៀលថ្ងៃទី១២ ខែវិច្ឆិកា ឆ្នាំ២០២៥ មកលើលំនៅឋានប្រជាពលរដ្ឋខ្មែរនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលបណ្ដាលឲ្យពលរដ្ឋស្លូតត្រង់ម្នាក់បានស្លាប់ និង ៣ នាក់រងរបួស។ ហេតុការណ៍នេះបានជំរុញឲ្យប្រជាពលរដ្ឋខ្មែរចំនួនប្រមាណជាង ២៥៧ គ្រួសារ ត្រូវបង្ខំចិត្តចាកចោលផ្ទះសម្បែងរបស់ខ្លួនទៅកាន់ទីតាំងមានសុវត្ថិភា។ 

ឯកឧត្ដម កែប ជុតិមា បានបន្តរៀបរាប់អំពីការលំបាក និងផលប៉ះពាល់ដែលប្រជាពលរដ្ឋភៀសសឹកកំពុងប្រឈម រួមមាន ការខ្វះខាតទីជម្រក អាហារ ទឹកស្អាត បាត់បង់មុខរបរ ចំណូល ក្មេងៗបាត់បង់ការសិក្សា ព្រមទាំងបញ្ហាអនាម័យ និងការប៉ះពាល់ផ្លូវចិត្តយ៉ាងធ្ងន់ធ្ងរ។ ដើម្បីចូលរួមសម្រាលការលំបាកទាំងនេះ ឯកឧត្ដម កែប ជុតិមា និងគណៈប្រតិភូគណៈកម្មការទី៤ នៃរដ្ឋសភា បានផ្ដល់អំណោយឧបត្ថម្ភដល់ប្រជាពលរដ្ឋភៀសសឹកទាំង ២៥៧ គ្រួសារ ដោយក្នុងមួយគ្រួសារទទួលបានថវិកាចំនួន ៥០,០០០ រៀល ពីគណៈកម្មការទី៤ និងថវិកាចំនួន ៥០,០០០ រៀល បន្ថែមទៀតពីឯកឧត្ដម ឌិត ទីណា រដ្ឋមន្ត្រីក្រសួងកសិកម្ម។

ក្រៅពីការឧបត្ថម្ភដល់ប្រជាពលរដ្ឋផ្ទាល់ គណៈប្រតិភូក៏បានផ្ដល់ថវិកាឧបត្ថម្ភដល់កងកម្លាំង និងរដ្ឋបាលមូលដ្ឋានមួយចំនួនទៀតផងដែរ មានរដ្ឋបាលខេត្តបន្ទាយមានជ័យ ១០,០០០,០០០ (ដប់លាន) រៀល ប៉ូលីសការពារព្រំដែន ៩១១៖ ២,៥០០,០០០ (ពីរលានប្រាំសែន) រៀល កងពលលេខ ៥១៖ ២,៥០០,០០០ (ពីរលានប្រាំសែន) រៀល
 ផ្នែកសឹករងអូរជ្រៅ៖ ២,៥០០,០០០ (ពីរលានប្រាំសែន) រៀល កងរាជអាវុធហត្ថស្រុកអូរជ្រៅ៖ ២,៥០០,០០០ (ពីរលានប្រាំសែន) រៀល សាលាស្រុកអូរជ្រៅ៖ ២,៥០០,០០០ (ពីរលានប្រាំសែន) រៀល ភូមិជោគជ័យ ២,០០០,០០០ (ពីរលាន) រៀល
 ភូមិព្រៃចាន់ ២,០០០,០០០ (ពីរលាន) រៀល៕

ដោយ ឈុន សារ៉ាត