AKP បន្ទាយមានជ័យ ថ្ងៃទី១៣ ខែវិច្ឆិកា ឆ្នាំ២០២៥-- ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តបន្ទាយមានជ័យ រួមជាមួយនឹងឯកឧត្តម លោកជំទាវជាតំណាងរាស្ត្រ បានអញ្ជើញចុះសួរសុខទុក្ខ និងសំណេះសំណាលផ្ទាល់ជាមួយនឹងប្រជាពលរដ្ឋភៀសសឹក ដែលបានភៀសខ្លួនជាបន្ទាន់ពីភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ មកកាន់មណ្ឌលសុវត្ថិភាពបណ្ដោះអាសន្ន នៅក្នុងវត្តចាន់ស៊ី សាមគ្គីរតនារាម ស្ថិតក្នុងឃុំកូប ស្រុកអូរជ្រៅ នាព្រឹកថ្ងៃទី១៣ ខែវិច្ឆិកា ឆ្នាំ២០២៥។ ការចុះសួរសុខទុក្ខនេះធ្វើឡើងភ្លាមៗបន្ទាប់ពីមានឧបទ្ទវហេតុដ៏អាក្រក់មួយ កាលពីរសៀលថ្ងៃទី១២ ខែវិច្ឆិកា ឆ្នាំ២០២៥ ដែលកងទ័ពថៃបានប្រើប្រាស់កម្លាំង និងបាញ់ប្រហារយ៉ាងសាហាវឃោរឃៅ និងអមនុស្សធម៌ មកលើប្រជាពលរដ្ឋស្លូតត្រង់នៅក្នុងភូមិព្រៃចាន់ បណ្ដាលឱ្យប្រជាពលរដ្ឋស្លាប់មួយនាក់និងរងរបួស៣នាក់ពួកគាត់មានការភ័យស្លន់ស្លោ និងបង្ខំចិត្តភៀសខ្លួនមកកាន់ទីសុវត្ថិភាព។

ថ្លែងទៅកាន់បងប្អូនប្រជាពលរដ្ឋរងគ្រោះ ដែលកំពុងជ្រកកោនបណ្ដោះអាសន្ននៅក្នុងវត្តចាន់ស៊ីសាមគ្គីរតនារាម  ឯកឧត្តម ឌិត ទីណា បានមានប្រសាសន៍ ដោយសម្លេងធ្ងន់ៗបង្ហាញពីការឈឺចាប់ និងការថ្កោលទោសយ៉ាងដាច់អហង្ការចំពោះទង្វើរបស់ទាហានថៃ «ក្នុងនាមរាជរដ្ឋាភិបាល ក៏ដូចជាក្រុមការងារចុះជួយមូលដ្ឋានខេត្តបន្ទាយមានជ័យ ខ្ញុំសូមចូលរួមសម្ដែងនូវការឈឺចាប់យ៉ាងខ្លាំងជាមួយបងប្អូនប្រជាពលរដ្ឋ ដែលបានទទួលរងនូវការបាញ់ប្រហារយ៉ាងសាហាវឃោរឃៅ និងអមនុស្សធម៌ពីពួកទាហានថៃ។

អំពើបែបនេះ គឺជារឿងដែលមិនអាចទទួលយកបានឡើយ ហើយវាជាការរំលោភបំពានយ៉ាងធ្ងន់ធ្ងរទៅលើអាយុជីវិត និងសិទ្ធិរស់រានមានជីវិតរបស់ប្រជាពលរដ្ឋស្លូតត្រង់។» ឯកឧត្តមបានបន្តថា រាជរដ្ឋាភិបាលកម្ពុជា ក្រោមការដឹកនាំរបស់សម្ដេចតេជោហ៊ុនសែននិងសម្តេចមហាបវរធិបតី ហ៊ុនម៉ាណែតនឹងមិនបណ្តែតបណ្តោយឱ្យអំពើអយុត្តិធម៌នេះកើតឡើងដោយគ្មានការដោះស្រាយនោះទេ។ ឯកឧត្តមបានសង្កត់ធ្ងន់ថា អាជ្ញាធរជាតិ និងកម្លាំងមានសមត្ថកិច្ច នឹងខិតខំប្រឹងប្រែងធ្វើការងារការទូត និងចាត់វិធានការចាំបាច់ទាំងអស់ ដើម្បីទាមទារយុត្តិធម៌ និងធានាសុវត្ថិភាពជូនប្រជាពលរដ្ឋនៅតំបន់ព្រំដែន។ មការងាររាជរដ្ឋាភិបាល នឹងបន្តនៅក្បែរប្រជាពលរដ្ឋជានិច្ច ហើយនឹងផ្ដល់នូវការគាំទ្រ និងជំនួយសង្គ្រោះបន្ទាន់ទាំងស្មារតី ទាំងសម្ភារ និងស្បៀងអាហារ ដើម្បីសម្រាលការលំបាក និងទុក្ខសោករបស់បងប្អូន។

ក្នុងឱកាសនោះដែរ ឯកឧត្តម ឌិត ទីណា និងតំណាងរាស្ត្រទាំងអស់ ក៏បាននាំយកអំណោយជាគ្រឿងឧបភោគបរិភោគ ថវិកាមួយចំនួន និងសម្ភារចាំបាច់ផ្សេងទៀត មកចែកជូនដល់ប្រជាពលរដ្ឋភៀសសឹកដែលកំពុងស្នាក់នៅមណ្ឌលសុវត្ថិភាពក្នុងវត្តចាន់ស៊ី ដើម្បីធានាបាននូវការហូបចុក និងការរស់នៅសមរម្យជាបណ្ដោះអាសន្ន។ ឯកឧត្តមរដ្ឋមន្ត្រីក៏បានអំពាវនាវដល់បងប្អូនប្រជាពលរដ្ឋទាំងអស់ ឱ្យរក្សាភាពស្ងប់ស្ងាត់ មានសាមគ្គីភាព និងជឿទុកចិត្តលើការដឹកនាំរបស់រាជរដ្ឋាភិបាល ដែលតែងតែយកចិត្តទុកដាក់ និងគិតគូរខ្ពស់បំផុតចំពោះសុខទុក្ខរបស់ប្រជាពលរដ្ឋគ្រប់រូប។

ឯកឧត្តម អ៊ុ រាត្រីអភិបាលខេត្តបន្ទាយមានជ័យបានឱ្យដឹងថា អាជ្ញាធរ និងកងកម្លាំងចម្រុះបានចុះជួយដឹកជញ្ជូនប្រជាពលរដ្ឋដោយផ្ទាល់ ដើម្បីធានាសុវត្ថិភាពអាយុជីវិតរបស់ពួកគាត់។ ចំនួនគ្រួសារដែលជម្លៀសចេញពីភូមិព្រៃចាន់មាន ជាង២០០គ្រួសារ ក្នុងនោះមានជាង១០០ គ្រួសារត្រូវបានជម្លៀសទៅកាន់ទីតាំងសុវត្ថិភាពនៅ វត្តចាន់សុីសាមគ្គីរតនារាម ក្នុងឃុំកូប ស្រុកអូរជ្រៅ ខេត្តបន្ទាយមានជ័យ រីឯគ្រួសារអ្នកផ្សេងទៀតបានទៅស្នាក់នៅផ្ទះបងប្អូន។

ឯកឧត្តមអភិបាលខេត្តបានសង្កត់ធ្ងន់ថា អាជ្ញាធរខេត្តបានយកចិត្តទុកដាក់ខ្ពស់ក្នុងការរៀបចំទីកន្លែងស្នាក់នៅដែលមានសុវត្ថិភាពជូនពួកគាត់ រួមទាំងការផ្គត់ផ្គង់ ស្បៀងអាហារ និងការត្រៀមលក្ខណៈរបស់ ក្រុមគ្រូពេទ្យ ឱ្យប្រចាំការជាប់ជានិច្ច ដើម្បីតាមដាន និងជួយសង្គ្រោះដល់ពលរដ្ឋដែលរងគ្រោះ៕

ដោយ ឈុន សារ៉ាត