AKP បន្ទាយមានជ័យ ថ្ងៃ១៣ ខែវិច្ឆិកា ឆ្នាំ២០២៥--ក្រុមអ្នកសង្កេតការណ៍អាស៊ាន (ASEAN Observers Team - AOT) នៅព្រឹកថ្ងៃព្រហស្បតិ៍ ទី១៣ ខែវិច្ឆិកា ឆ្នាំ២០២៥ នេះ បានបន្តចុះត្រួតពិនិត្យជាក់ស្តែងនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលជាទីកន្លែងកើតហេតុដ៏រន្ធត់ដែល ទាហានថៃបានបើកការបាញ់ប្រហារយ៉ាងគឃ្លើន មកលើជនស៊ីវិលកម្ពុជា កាលពីរសៀលថ្ងៃទី១២ ខែវិច្ឆិកា កន្លងទៅ។

ការចុះត្រួតពិនិត្យនេះមានគោលបំណងច្បាស់លាស់ដើម្បីប្រមូលព័ត៌មាន និងសង្កេតការណ៍ដោយផ្ទាល់អំពីហេតុការណ៍ដែលបង្កឱ្យមានសោកនាដកម្មនេះ ដែលបានបណ្តាលឱ្យជនស៊ីវិលកម្ពុជាស្លាប់ម្នាក់ និងរងរបួសបីនាក់។ គោលបំណងពិនិត្យទីតាំងកើតហេតុ វាយតម្លៃស្ថានភាព និងប្រមូលភស្តុតាងដែលទាក់ទងនឹងការបាញ់ប្រហារពីសំណាក់យោធាថៃមកលើប្រជាពលរដ្ឋខ្មែរ។

មុននឹងចុះដល់ទីតាំងកើតហេតុ ក្រុម AOT ក៏បានអញ្ជើញទៅមន្ទីរពេទ្យមិត្តភាពកម្ពុជា-ជប៉ុន មង្គលបូរី ផងដែរ ដើម្បីពិនិត្យមើល និងសាកសួរសុខទុក្ខជនស៊ីវិលកម្ពុជាចំនួន៣នាក់ ដែលកំពុងសម្រាកព្យាបាលរបួសធ្ងន់ស្រាល ដោយសារការបាញ់ប្រហារដ៏ព្រៃផ្សៃនេះ។ ជំហររបស់កម្ពុជារាជរដ្ឋាភិបាលកម្ពុជាបានថ្កោលទោសយ៉ាងខ្លាំងក្លាបំផុត ចំពោះទង្វើរបស់កងកម្លាំងប្រដាប់អាវុធថៃនេះ ដោយចាត់ទុកថាជា ការរំលោភបំពានយ៉ាងគឃ្លើនមកលើអធិបតេយ្យភាព និងសិទ្ធិរស់រានមានជីវិតរបស់ប្រជាពលរដ្ឋកម្ពុជា។ ការចុះពិនិត្យរបស់ AOT នាពេលនេះ គឺជាជំហានមួយដ៏សំខាន់ក្នុងការស្វែងរក យុត្តិធម៌ សម្រាប់ជនរងគ្រោះ និងដើម្បីធានាបាននូវសន្តិសុខតាមបណ្តោយព្រំដែន៕

ដោយ ឈុន សារ៉ាត