AKP ភ្នំពេញ ថ្ងៃទី១០ ខែតុលា ឆ្នាំ២០២៥-- ប្រភពពីអង្គការ NatureLife បានឱ្យដឹងនៅថ្ងៃទី១០ ខែតុលា ឆ្នាំ២០២៥ថា ម្រោងរេដបូកដែនជម្រកសត្វព្រៃលំផាត់ដែលអនុវត្តដោយអង្គការជីវិតធម្មជាតិ នៅកម្ពុជា (NLC) បានគាំទ្រយ៉ាងសកម្មក្នុងសកម្មភាពសំខាន់ៗមួយចំនួនក្នុងនោះក៏មានការដំឡើងស្លាកសរុបចំនួន៣៥០ផ្ទាំង ដើម្បីសម្គាល់ព្រំតំបន់គ្រប់គ្រងនីមួយៗនៃដែនជម្រកសត្វព្រៃលំផាត់ឱ្យកាន់តែច្បាស់លាស់ ដែលចាប់ផ្តើមអនុវត្តតាំងពីខែកក្កដា ខែកញ្ញា ឆ្នាំ២០២៥ មកម៉្លេះ។

ស្លាកទាំងអស់នេះត្រូវបានដំឡើងដោយក្រុមអ្នកស្ម័គ្រចិត្តល្បាតសហគមន៍ មន្រ្តីឧទ្យានុរក្ស ក្រុមអភិរក្សជីវៈចម្រុះស្រែជ្រៃ និងកូនវ៉ា និងមានស្រ្តី២នាក់បានចូលរួមសកម្មភាពនេះ។ ក្នុងនោះមន្ត្រីឧទ្យានុរក្ស និងក្រុមល្បាតសហគមន៍បានដំឡើងស្លាកចំនួន២០០ ក្នុងតំបន់អភិរក្សក្នុងភូមិសាស្រ្តខេត្តរតនគិរី នៅខេត្តមណ្ឌលគិរីនៃដែនជម្រកសត្វព្រៃលំផាត់ និងស្លាកចំនួន១៥០ ត្រូវបានដំឡើងក្នុងតំបន់ប្រើប្រាស់ដោយចីរភាព ដោយក្រុមអភិរក្សជីវៈចម្រុះកូនវ៉ា និងស្រែជ្រៃ។

យោងតាមក្រមបរិស្ថានការគ្រប់គ្រង និងការប្រើប្រាសធនធានធម្មជាតិ NatureLife នៅតំបន់នីមួយៗមានបែបបទ និងវិសាលភាពផ្សេងៗគ្នា។ ហេតុនេះការដំឡើងស្លាកសញ្ញាទាំងអស់នេះមានសារៈសំខាន់ណាស់សម្រាប់ជូនដំណឹងដល់ប្រជាសហគមន៍ ពីព្រំប្រទល់នៃតំបន់ស្នូល តំបន់អភិរក្ស និងតំបន់ប្រើប្រាសដោយចីរភាព ព្រោះវាបានចូលរួមកាត់កាត់បន្ថយទំនាស់ និងជំរុញការប្រើប្រាស់ធនធានធម្មជាតិ នៅក្នុងតំបន់ការពារស្របតាមច្បាប់៕

ដោយ ណយ នឿន (ប្រភព៖ NatureLife)