AKP តាកែវ ថ្ងៃទី១០ ខែតុលា ឆ្នាំ២០២៥-- លោក យង់ សុវឌ្ឍនា អភិបាលរងនៃគណៈអភិបាលខេត្តតាកែវ និងជាប្រធានលេខាធិការដ្ឋានត្រួតពិនិត្យគ្រឿងញៀនខេត្តតាកែវ បានមានប្រសាសន៍ថា ការដោះស្រាយបញ្ហាគ្រឿងញៀនទាមទារឱ្យមានការចូលរួមសហការគ្នា ចាប់ពីបុគ្គលម្នាក់ៗ គ្រួសារ រហូតដល់អាជ្ញាធរមូលដ្ឋាន សំដៅធ្វើយ៉ាងណាឈានទៅលុបបំបាត់ គ្រឿងញៀនឱ្យអស់ពីក្នុងសហគមន៍របស់យើង។

លោកអភិបាលរងបានមានប្រសាសន៍បែបនេះក្នុងកិច្ចប្រជុំបូកសរុបការអនុវត្តការងារប្រយុទ្ធប្រឆាំងគ្រឿងញៀនរយៈពេល៩ខែ ឆ្នាំ២០២៥ កាលពីថ្ងៃទី០៩ ខែតុលា ឆ្នាំ២០២៥ នៅសាលប្រជុំរដ្ឋបាលខេត្តតាកែវ ដោយមានការអញ្ជើញចូលរួមពីប្រធានអនុប្រធានមន្ទីរអង្គភាពជុំវិញខេត្ត អភិបាលអភិបាលរងក្រុង-ស្រុក កងកម្លាំងប្រដាប់អាវុធ និងមន្ត្រីរាជការពាក់ព័ន្ធចូលរួមជាច្រើនរូបផងដែរ។

មានប្រសាសន៍សំណេះសំណាលក្នុងពិធីនោះ លោក យង់ សុវឌ្ឍនា បានធ្វើការណែនាំ និងក្រើនរំលឹកដល់អាជ្ញាធរក្រុង-ស្រុកទាំង១០ ឱ្យបង្កើន និងពង្រឹងសកម្មភាពចុះអប់រំផ្សព្វផ្សាយពីបញ្ហាគ្រឿងញៀនឱ្យបានខ្លាំងក្លា និងទូលំទូលាយបន្ថែមទៀត ដល់ប្រជាពលរដ្ឋគ្រប់ស្រទាប់ជាពិសេសយុវជនសិស្សនិងនិស្សិត។ បញ្ហាគ្រឿងញៀនជាបញ្ហាសង្គមដ៏រ៉ាំរ៉ៃមួយ និងស្មុគស្មាញ បង្កផលវិបាកជាច្រើនដល់សង្គមជាតិ និងមនុស្សទូទៅ។ ដូច្នេះការផ្សព្វផ្សាយឱ្យពួកគាត់យល់កាន់តែច្បាស់ ពីផលប៉ះពាល់នៃគ្រឿងញៀនគឺជារឿងសំខាន់បំផុត ដើម្បីការពារប្រជាពលរដ្ឋជាពិសេសយុវជន មិនឲ្យធ្លាក់ខ្លួនក្នុងអន្លង់អបាយមុខនេះ។

ទន្ទឹមនឹងនេះ លោកអភិបាលរងបានជំរុញឱ្យអាជ្ញាធរមូលដ្ឋានត្រូវបន្តចុះត្រួតពិនិត្យជាប្រចាំនៅតាមទីតាំងនានា និងធ្វើកិច្ចសន្យាជាមួយម្ចាស់អាជីវកម្ម ដូចជាផ្ទះសំណាក់ ក្លឹបកម្សាន្ត ហាងខារ៉ាអូខេ តាមច្រកទ្វារព្រំដែន និងកន្លែងកម្សាន្ដផ្សេងៗទៀត ដើម្បីឱ្យពួកគេចូលរួមសហការយ៉ាងសកម្មជាមួយសមត្ថកិច្ច ក្នុងការបង្ការ ទប់ស្កាត់ បង្ក្រាបបទល្មើសគ្រឿងញៀន និងបទល្មើសផ្សេងៗទៀត។ សកម្មភាពនេះមានគោលដៅកាត់បន្ថយនិងលុបបំបាត់ រាល់សកម្មភាពលួចលាក់កែច្នៃសារធាតុគីមីផ្សំ ការចរាចរណ៍ ការប្រើប្រាស់ និងការជួញដូរគ្រឿងញៀនខុសច្បាប់ នៅតាមមូលដ្ឋាននានា៕

ដោយ អ៊ុច សៀង