AKP ភ្នំពេញ ថ្ងៃទី១០ ខែតុលា ឆ្នាំ២០២៥-- ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ថ្ងៃទី០៩ ខែតុលា ឆ្នាំ២០២៥ បានដឹកនាំមន្រ្តីជំនាញនៃអគ្គនាយកដ្ឋានកៅស៊ូចូលរួមសន្និសីទអន្តរជាតិស្ដីពីសេដ្ឋកិច្ចកៅស៊ូ នៅទីក្រុងកូឡាឡាំពួរ ប្រទេសម៉ាឡេស៊ី។ សន្និសីទនេះរៀបចំឡើងដោយផ្សារភ្ជាប់នឹងខួប១០០ឆ្នាំនៃការស្រាវជ្រាវកៅស៊ូម៉ាឡេស៊ី ក្រោមប្រធានបទ៖ គំនិតផ្ដួចផ្ដើមនិរន្តរភាពកៅស៊ូធម្មជាតិសម្រួចឆ្ពោះទៅកាន់អនាគតទាំងអស់គ្នា និងប្រកាសបើកដោយឯកឧត្តម YB Datuk Seri Johari Abdul Ghani រដ្ឋមន្ត្រីក្រសួងចម្ការ និងមុខទំនិញ ម៉ាឡេស៊ី។

សន្និសីទអន្តរជាតិស្ដីពីសេដ្ឋកិច្ចកៅស៊ូនេះធ្វើឡើងក្នុងគោលបំណង ផ្ដល់ជាវេទិកាដល់អ្នកធ្វើគោលនយោបាយ ធុរកិច្ចជន អ្នកផលិត និងអ្នកស្រាវជ្រាវមកជួបជុំពិភាក្សា និងចែករំលែកបទពិសោធន៍លើបញ្ហាប្រឈម ឱកាស និងដំណោះស្រាយសម្រាប់ឧស្សាហកម្មកៅស៊ូធម្មជាតិ ជាពិសេសនិន្នាការទីផ្សារកៅស៊ូ ការស្រាវជ្រាវ និរន្តរភាព និងអនុវត្តបទប្បញ្ញតិ EUDR ដែលនឹងមកដល់នាពេលខាងមុខ។

ក្នុងឱកាសចូលរួមសន្និសីទនេះ ឯកឧត្តម ប្រាក់ ដាវីដ ក៏បានជួបពិភាក្សាជាមួយលោក Li Jihua អនុប្រធានបណ្ឌិតសភាវិទ្យាសាស្ត្រកសិកម្មតំបន់ត្រូពិចប្រទេសចិន (CATAS) ដើម្បីពិភាក្សាស្វែងយល់ និងរកឱកាសពង្រីកកិច្ចសហការបន្ថែម ជាពិសេសការងារកែច្នៃគុណភាពជ័រកៅស៊ូដែលមានប្រភពពីកៅស៊ូគ្រួសារឱ្យឆ្លើយតបទៅនឹងលក្ខខ័ណ្ឌតម្រូវរបស់រោងចក្រផលិតសំបកកង់រថយន្ត និងជួបពិភាក្សា ផងដែរជាមួយលោក Toh Heng Guan អគ្គលេខាធិការសមាគមនៃបណ្ដាប្រទេសផលិតកៅស៊ូធម្មជាតិ (ANRPC) ដើម្បីពង្រឹងកិច្ចសហការក្នុងនាមកម្ពុជាជាសមាជិកពេញសិទ្ធិ និងឈ្វេងយល់អំពីការរៀបចំគោលការណ៍និរន្តរភាពកៅស៊ូធម្មជាតិ និងលក្ខខ័ណ្ឌនានាឆ្លើយតបនឹងបទប្បញ្ញតិ EUDR ៕

ដោយ៖ ចាន់ សុភឿន (ប្រភព៖ ក្រសួងកសិកម្ម)