AKP កំពង់ចាម ថ្ងៃទី០៤ ខែតុលា ឆ្នាំ២០២៥–

ឯកឧត្តម អ៊ុន ចាន់ដា អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ចាម ព្រឹកថ្ងៃទី០៤ ខែតុលា ឆ្នាំ ២០២៥នេះ បានអញ្ជើញប្រគល់ផ្ទះមនុស្សធម៌ ១ខ្នង និងបន្ទប់ទឹក ១ខ្នង ដែលជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជាផ្ទះមនុស្សធម៌ទី២៨ ជូនអ្នកស្រី អេន ស៊ីណា ជាភរិយាវីរកងទ័ពជួរមុខ រស់នៅភូមិរាយប៉ាយកណ្តាល ឃុំរាយប៉ាយ ស្រុកកងមាស ខេត្តកំពង់ចាម ដោយឯកឧត្តមអភិបាលខេត្តបានគូសបញ្ជាក់ថា សម្តេចទាំងទ្វេជានិច្ចកាលតែងតែយកចិត្តទុកដាក់ជួយដោះស្រាយសម្រាលទុក្ខលំបាករបស់បងប្អូនប្រជាពលរដ្ឋ។ 

សូមបញ្ជាក់ថា អ្នកស្រី អេន ស៊ីណា ជាភរិយាយោធិនជួរមុខនៅមុំ៣ ទិសព្រះវិហារ  ដែលកំពុងបំពេញ បេសកកម្មការពារបូរណភាពទឹកដីយ៉ាងប្តូរផ្តាច់នៅលើសមរភូមិ។ អ្នកស្រីមានកូនប្រុសស្រីចំនួន២នាក់ ក្នុងបន្ទុក និងមានផ្ទៃពោះ ៤ខែថែមទៀត ។ កាលពីថ្ងៃទី១៨ ខែសីហា ឆ្នាំ២០២៥ កន្លងទៅ  ដោយមើល ឃើញពីស្ថានភាពលំបាករបស់គ្រួសារវីរយុទ្ធជនជួរមុខ ផុន សុធា  នៅឯមូលដ្ឋានក្រោយ ដែលសព្វថ្ងៃកំពុងកង្វះមធ្យោបាយធ្វើដំណើរ ជម្រកស្នាក់នៅ មានតែកូនផ្ទះតូចមួយ បិទបាំងដោយសង្កសីចាស់ទ្រុឌទ្រោម រួមទាំងជីវភាពក៏មានការខ្វះខាតផងនោះ ក្នុងនាមសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន  ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ក៏បានពិនិត្យ និងសម្រេចសាងសង់ផ្ទះថ្មផ្ទាល់ដីប្រក់សង្កសី ១ខ្នង ទំហំ ៥ម×៨ម និងបង្គន់អនាម័យ ១បន្ទប់ជូនគ្រួសារវីរយុទ្ធជនជួរមុខ ផុន សុធា  បានប្រើប្រាស់ និងស្នាក់នៅបានសមរម្យ។ រីឯឯកឧត្តមអភិបាលខេត្តកំពង់ចាមក៏បានប្រគល់ជូនម៉ូតូថ្មី១គ្រឿង សម្រាប់ជាមធ្យោបាយធ្វើដំណើររបស់គ្រួសារលោកផងដែរ។

ក្នុងឱកាសនេះ ឯកឧត្តម អ៊ុន ចាន់ដា បាននាំយកអំណោយរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាជូនអ្នកស្រី អេន ស៊ីណា រួមមាន អង្ករ ៥០គីឡូក្រាម ព្រមទាំង គ្រឿងប្រើប្រាស់ក្នុងផ្ទះមួយចំនួន និងថវិកា ២០០,០០០រៀល៕

ដោយ៖ ចាន់ សុភឿន (ប្រភព៖ រដ្ឋបាលខេត្តកំពង់ចាម)