AKP បន្ទាយមានជ័យ ថ្ងៃទី១៨ ខែកញ្ញា ឆ្នាំ២០២៥--
លោកវេជ្ជបណ្ដិត ឱក ទីណា ប្រធានមន្ទីរពេទ្យបង្អែកប៉ោយប៉ែត ខេត្តបន្ទាយមានជ័យបានគូសបញ្ជាក់ថា យ៉ាងហោចណាស់អ្នកជំងឺចំនួន៤នាក់ ក្នុងចំណោមអ្នករងគ្រោះចំនួន២៩នាក់ ផ្សេងទៀត ដែលទទួលរងការវាយប្រហារយ៉ាងឃោរឃៅពីសំណាក់កងទ័ព និងកងកម្លាំងចម្រុះរបស់ថៃ ដែលបានចូលមកឈ្លានពាននៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ កាលពីល្ងាចថ្ងៃទី១៧ ខែកញ្ញា ឆ្នាំ២០២៥ ត្រូវបានក្រុមគ្រូពេទ្យកំពុងយកចិត្ដទុកដាក់មើលថែទាំ ខណៈអ្នកជំងឺខ្លះមានស្ថានភាពធូរស្រាលវិញហើយ។
ថ្លែងប្រាប់ក្រុមអ្នកសារព័ត៌មាននាព្រឹកថ្ងៃទី១៨ ខែកញ្ញា ឆ្នាំ២០២៥ លោកវេជ្ជបណ្ដិត ឱក ទីណា បានបញ្ជាក់ថា ចំពោះប្រជាពលរដ្ឋដែលបានទទួលរងគ្រោះដោយសារការវាយប្រហារពីសំណាក់កងទ័ព និងកម្លាំងចម្រុះរបស់ថៃ កាលពីរសៀលថ្ងៃទី ១៧ ខែ កញ្ញា ឆ្នាំ ២០២៥ ពលរដ្ឋកម្ពុជាដែលមានបញ្ហាត្រូវផ្សែងពុលរបស់ភាគីថៃ គឺភាគច្រើនមានអាការៈថប់ដង្ហើម ឈឺបំពង់ក ឡើងស្លេះ និងស្រវាំងភ្នែក។ លោកវេជ្ជបណ្ឌិតបានបន្ដថា ជនរងគ្រោះទាំងអស់កំពុងសម្រាកនៅមន្ទីរពេទ្យបង្អែកប៉ោយប៉ែត ហើយទោះបីយ៉ាងណាស្ថានភាពអាការៈអ្នកជំងឺមានលក្ខណៈល្អប្រសើរឡើងវិញមួយចំនួនហើយ។ លោកវេជ្ជបណ្ឌិតបានបន្ថែមថា សម្រាប់ជនរងគ្រោះដែលមកសម្រាកនៅមន្ទីរពេទ្យនេះមានចំនួន៤នាក់ ហើយក្នុងចំណោមអ្នកទាំង៤នាក់នេះ គឺមានអ្នកខ្លះមានស្ថានភាពធូរស្រាលប្រសើរហើយ ប៉ុន្តែនៅតាមដានពីសុខភាពបន្តទៀត។  
បើតាមលោកវេជ្ជបណ្ដិត ឱក ទីណា ប្រធានមន្ទីរពេទ្យបង្អែកប៉ោយប៉ែត អ្នកជំងឺដែលរងគ្រោះដោយសារការវាយប្រហារពីសំណាក់កងទ័ពថៃ និងកងកម្លាំងចម្រុះរបស់ថៃទាំងអស់ ត្រូវការសម្រាកបន្តទៀតដើម្បីបំបាត់អាការៈមុនពេលត្រូវអនុញ្ញាតឱ្យវិលត្រឡប់ទៅផ្ទះសម្បែងវិញ។ លោកវេជ្ជបណ្ឌិតបានអះអាងឱ្យដឹងបន្ថែមថា កងកម្លាំងភាគីថៃបានវាយប្រហារយ៉ាងធ្ងន់ធ្ងរដែលបង្កការប៉ះពាល់ដល់សុខភាព តែយ៉ាងណាក្រោមការយកចិត្តទុកដាក់ថែទាំ និងព្យាបាលរបស់គ្រូពេទ្យ អាការៈរបស់ពួកគាត់បានធូរស្បើយ។

សូមជម្រាបជូនផងថា នៅថ្ងៃទី១៧ ខែកញ្ញា ឆ្នាំ២០២៥ វេលាម៉ោង ១៥:៣០នាទីរសៀល កងកម្លាំងចម្រុះរបស់ភាគីថៃ រួមមានកម្លាំងតម្រួតព្រំដែន ទាហានប៉ារ៉ា ទាហានឈុតខ្មៅ នគរបាល និងប្រជាពលរដ្ឋស្រុកគោកធ្យូង ចំនួនប្រហែល៣០០នាក់ មានអាវុធគ្រប់ដៃ និងមានឧបករណ៍សម្រាប់ទប់ស្កាត់បាតុកម្ម ខ្លះទៀតមានកាន់ជំពាមកៅស៊ូ បានចូលមកធ្វើសកម្មភាពរាយបន្លាលួស នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។ លុះដល់ម៉ោង១៦:២០នាទី ថ្ងៃខែឆ្នាំដដែល កម្លាំងចម្រុះរបស់ភាគីថៃបានប្រើប្រាស់រថយន្តបំពាក់ឧបករណ៍បំពងសំឡេង និងកាំភ្លើងបាញ់ឧស្ម័នបង្ហូរទឹកភ្នែកមកលើកងកម្លាំង និងប្រជាពលរដ្ឋកម្ពុជា ក្រោយពីក្រុមអ្នកសង្កេតការណ៍អន្តរកាល (IOT) ដឹកនាំដោយប្រទេសម៉ាឡេស៊ី បានចុះសង្កេតការណ៍ នៅភូមិព្រៃចាន់ ឃុំអូរបីជាន់ ស្រុកអូរជ្រៅ ដើម្បីសង្កេតផ្ទៀងផ្ទាត់ និងរាយការណ៍អំពីស្ថានភាពព្រំដែន នៅវេលាម៉ោង ១៣:៥៧នាទីរសៀល ហើយទើបតែបានចាកចេញពីទីតាំងនោះមិនបានប៉ុន្មាននាទីផង។

នៅក្នុងហេតុការណ៍នេះផងដែរ កងកម្លាំងយោធា និងក្រុមប៉ូលីសបង្ក្រាបបាតុកម្មរបស់ថៃបានធ្វើឱ្យប៉ះពាល់យ៉ាងធ្ងន់ធ្ងរដល់ក្រដាស់ត្រចៀក និងប្រព័ន្ធខួរក្បាល ព្រមទាំងបានបង្កអំពើហិង្សាទៅលើប្រជាពលរដ្ឋខ្មែរ ដោយបានប្រើប្រាស់ឧបករណ៍បង្ក្រាបបាតុកម្ម និងបាញ់ជំពាមកៅស៊ូ គ្រាប់ឃ្លីដែលបណ្តាលឱ្យមានប្រជាពលរដ្ឋ និងព្រះសង្ឃយើងចំនួន ២៨អង្គ/នាក់ ដួលសន្លប់ និងរងរបួស ធ្ងន់ និងស្រាល។ យោងតាមរបាយការណ៍របស់មន្ទីរសុខាភិបាលខេត្តបន្ទាយមានជ័យបានឱ្យដឹងថា ការផ្ទុះអាវុធដែលបង្កដោយទាហានសៀមមកលើប្រជាពលរដ្ឋកម្ពុជា នៅទីតាំងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ កាលពីរសៀលថ្ងៃទី១៧ ខែកញ្ញា ឆ្នាំ២០២៥ បានធ្វើឱ្យព្រះសង្ឃ ប្រជាពលរដ្ឋស៊ីវិល និងទាហាន រងរបួសសរុប៣០នាក់។ អ្នករងរបួសទាំងនោះ ត្រូវបានជួយសង្គ្រោះបឋម និងបញ្ជូនទៅព្យាបាលនៅតាមមន្ទីរពេទ្យបង្អែកក្នុងខេត្តបន្ទាយមានជ័យ ខណៈកងវីរៈយោធាជួរមុខម្នាក់ ដែលត្រូវរបួសក្រោមភ្នែកខាងស្តាំ ត្រូវបានបញ្ជូនសង្គ្រោះបន្តនៅមន្ទីរពេទ្យព្រះអង្គឌួង នៅក្នុងរាជធានីភ្នំពេញ៕

ដោយ៖ មករា