AKP ភ្នំពេញ ថ្ងៃទី១៨ ខែកញ្ញា ឆ្នាំ២០២៥ -- យោងតាមការចុះផ្សាយរបស់កាសែតខ្មែរថាមស៍ ទោះបីជានិយ័តករទូរគមនាគមន៍កម្ពុជា (TRC) បានហាមឃាត់បរិក្ខារប្រព័ន្ធ Starlink មិនឱ្យចូលទីផ្សារកម្ពុជាកាលពីពីរសប្តាហ៍មុនក៏ដោយ ប៉ុន្តែប្រតិបត្តិការជួញដូរបរិក្ខារនេះនៅលើទីផ្សារងងឹតកាន់តែធ្វើឡើងយ៉ាងសកម្ម។

ក្នុងការចុះផ្សាយរបស់កាសែតខ្មែរថាមស៍បានលើកឡើងថា ការផ្សព្វផ្សាយពាណិជ្ជកម្មពាក់ព័ន្ធនឹងផលិតផលនេះ នៅតែអាចរកឃើញយ៉ាងងាយស្រួលនៅលើបណ្តេញសង្គម និងវេទិកាពាណិជ្ជកម្មអេឡិចត្រូនិក ខណៈបច្ចុប្បន្នតម្លៃជាទូទៅលើសពី ១ ០០០ ដុល្លារ។ ការចុះផ្សាយនេះបានបន្តថា ទោះបីជាក្រុមហ៊ុន Starlink  បានជួបពិភាក្សាជាមួយរាជរដ្ឋាភិបាលកម្ពុជា ទាក់ទងនឹងការវិនិយោគ និងកិច្ចសហប្រតិបត្តិការដ៏មានសក្តានុពលក្នុងវិស័យសេវាកម្មឌីជីថលក៏ដោយ ក៏ក្រុមហ៊ុនមិនទាន់ទទួលបានការអនុញ្ញាតឱ្យធ្វើប្រតិបត្តិការក្នុងប្រទេសកម្ពុជានៅឡើយទេ។

បើតាមនិយ័តករទូរគមនាគមន៍កម្ពុជាបានសង្កត់ធ្ងន់ថា៖ «ការនាំចូល ការចែកចាយ និងការប្រើប្រាស់បរិក្ខារប្រព័ន្ធ Starlink សុទ្ធតែខុសច្បាប់។ ទន្ទឹមនេះ និយ័តករទូរគមនាគមន៍កម្ពុជា ថែមទាំងបានព្រមានថា សកម្មភាពខុសច្បាប់ទាំងនេះ មិនត្រឹមតែរំខានដល់ប្រតិបត្តិការធម្មតារបស់សហគ្រាសដែលមានអាជ្ញាប័ណ្ណ និងបំពានសិទ្ធិអ្នកប្រើប្រាស់ប៉ុណ្ណោះទេ ប៉ុន្តែក៏អាចប៉ះពាល់ដល់គុណភាព នៃសេវាទូរគមនាគមន៍ និងថែមទាំងគំរាមកំហែងដល់សន្តិសុខជាតិ និងសណ្តាប់ធ្នាប់សាធារណៈទៀតផង។ ចំពោះអ្នកបំពាន នឹងត្រូវពិន័យជាប្រាក់ដល់ទៅ ៥០ លានរៀល (ប្រមាណ ១ម៉ឺន២ពាន់ដុល្លារ)។»

ប្រព័ន្ធ Star Link គឺជាសេវាអ៊ីនធឺណិតតាមផ្កាយរណបដែលដាក់ដំណើរការដោយក្រុមហ៊ុន SpaceX ដែលជាកម្មសិទ្ធិរបស់មហាសេដ្ឋីជនជាតិអាម៉េរិកលោក អេឡុន ម៉ាសក៍ (Elon Musk)។ ប្រព័ន្ធ Star Link បានផ្តល់សេវាអ៊ីនធឺណិតដែលមានល្បឿនលឿន និងភាពយឺតយ៉ាវ នៃការតភ្ជាប់ដែលមានកម្រិតទាប (Low latency) ដល់តំបន់ដាច់ស្រយាល ឬតំបន់ខ្វះខាតបណ្តាញអ៊ីនធឺណិត តាមរយៈផ្កាយរណបគន្លងទាបកៀកជិតផែនដី។

ជាមួយគ្នានេះ អ្វីដែលគួរឱ្យកត់សម្គាល់នោះគឺ ទោះបីជាប្រព័ន្ធ Starlink បាននាំមកនូវភាពងាយស្រួលមួយចំនួនដល់អតិថិជនរស់នៅតំបន់ដាច់ស្រយាលក៏ដោយ ប៉ុន្តែផលប៉ះពាល់អវិជ្ជមានរបស់វាក៏បានបង្ហាញឱ្យយើងបានឃើញផងដែរ។ នៅពេលដែលប្រព័ន្ធ Starlink ធ្វើការបិទប្រព័ន្ធនៅក្នុងប្រទេស ឬតំបន់ជាក់លាក់ណាមួយ វានឹងបណ្តាលឱ្យបណ្តាញអ៊ីនធឺណិតនៅក្នុងទីក្រុងធំៗ នៃប្រទេសនោះលែងដំណើរការ កាត់ផ្តាច់ប្រព័ន្ធធនាគារ រាំងស្ទះដល់ប្រព័ន្ធទូរគមនាគមន៍សហគ្រាស បណ្តាលឱ្យយន្តការឆ្លើយតបគ្រាអាសន្នរបស់រដ្ឋាភិបាលត្រូវទទួលរងការធ្វើតេស្តដ៏ធ្ងន់ធ្ងរ។

ប្រព័ន្ធ Starlink ក៏អាចត្រូវបានប្រើប្រាស់ដោយប្រទេសគូប្រជែង ក្រុមប្រដាប់អាវុធមិនមែនរដ្ឋ និងសូម្បីតែក្រុមភេរវករ ដើម្បីបង្កើនប្រព័ន្ធទូរគមនាគមន៍ ការសម្របសម្រួល ការឃោសនា និងសមត្ថភាពប្រយុទ្ធរបស់ពួកគេ បណ្តាលឱ្យឧត្តមភាពវិស័យយោធា ឬការស៊ើបការណ៍សម្ងាត់របស់ភាគីខាងយើងចុះខ្សោយ។ ដូចជាជម្លោះរវាងប្រទេសរុស្ស៊ី និងអ៊ុយក្រែន បានបង្ហាញថា ការចូលរួមយ៉ាងស៊ីជម្រៅរបស់ក្រុមហ៊ុនផ្កាយរណបពាណិជ្ជកម្មក្នុងជម្លោះភូមិសាស្ត្រនយោបាយ អាចផ្លាស់ប្តូរដំណើរការជម្លោះ និងបង្កឱ្យមានការកើនឡើងនូវហានិភ័យ នៃការប្រឈមមុខដាក់គ្នារវាងប្រទេសមហាអំណាច។ ទន្ទឹមនឹងនោះ ការប្រើប្រាស់ប្រព័ន្ធនេះ ក៏អាចផ្តល់នូវបណ្តាញថ្មី និងពិបាកគ្រប់គ្រងសម្រាប់កងកម្លាំងខាងក្រៅ ដើម្បីបញ្ជៀបមនោគមន៍វិជ្ជា ផ្សព្វផ្សាយព័ត៌មានមិនពិត និងញុះញង់ឱ្យមានចលាចលក្នុងសង្គម។ ប្រព័ន្ធ Starlink ក៏អាចត្រូវបានប្រើប្រាស់សម្រាប់សកម្មភាពខុសច្បាប់ដូចជាឧក្រិដ្ឋកម្មឆ្លងដែន ការសម្របសម្រួលភេរវកម្ម និងការរត់ពន្ធប្រព័ន្ធទូរគមនាគមន៍ ដែលបង្កើនការលំបាកដល់ការអនុវត្តច្បាប់។ 

សូមបញ្ជាក់ថា ចាប់តាំងពីការផ្ទុះឡើងនូវជម្លោះរវាងប្រទេសរុស្ស៊ី និងអ៊ុយក្រែន ប្រព័ន្ធ Starlink បានក្លាយជា "ខ្សែជីវិត" នៃការទំនាក់ទំនងសមរភូមិយោធាអ៊ុយក្រែន-កងទ័ពឈ្លបយកការណ៍ជួរមុខពឹងផ្អែកលើវាដើម្បីបញ្ជូនរូបភាពសមរភូមិតាមពេលវេលាជាក់ស្តែង (Real-time)  ហើយកងកម្លាំងដ្រូន (Drone) បានអនុវត្តន៍ការវាយប្រហារយ៉ាងជាក់លាក់ តាមរយៈប្រព័ន្ធរុករករបស់វា ហើយសូម្បីតែប្រតិបត្តិការ នៃប្រព័ន្ធបញ្ជាពីខាងក្រោយក៏ពឹងផ្អែកលើប្រព័ន្ធ Starlink ផងដែរ។ 

ជាមួយគ្នានេះ នៅថ្ងៃទី ២៤ ខែកក្កដា ឆ្នាំ២០២៥, ប្រព័ន្ធអ៊ីនធឺណិតផ្កាយរណប " Starlink" កើតមានឧប្បត្តិហេតុជាប់គាំងភ្លាមៗ ដែលនាំទៅដល់ហេតុការដាច់បណ្តាញអ៊ីនធឺណិតជាសកល បង្កផលប៉ះពាល់ដល់ប្រទេស និងតំបន់ប្រហែល ១៤០ ដែលអូសបន្លាយអស់រយៈពេល ២ម៉ោងកន្លះ៕

ដោយ៖ រិទ្ធី