AKP ភ្នំពេញ ថ្ងៃទី១៦ ខែកញ្ញា ឆ្នាំ២០២៥-- ឯកឧត្តម ឌិត ទីណា រដ្ឋមន្រ្តីក្រសួងកសិកម្មរុក្ខាប្រមាញ់ និងនេសាទមបានថ្លែងថា តាមការស្ទង់មតិកន្លងមកបង្ហាញថា និស្សិតដែលបានបញ្ចប់ការសិក្សាប្រមាណ ៩៨,៨ភាគរយ ទទួលបានការងារធ្វើ ក្នុងនោះភាគច្រើនលើសលប់បម្រើការក្នុងវិស័យឯកជន ,មួយចំនួនទៀតបាន ប្រឡងជាប់ជាមន្រ្តីកសិកម្មឃុំ និងខណៈដែល មួយចំនួនទៀតបានបង្កើតអាជីវកម្មដោយខ្លួនឯង។

បញ្ជាក់នៅក្នុងពិធីប្រគល់សញ្ញាបត្រជូននិស្សិតជ័យលាភីនៃសាកលវិទ្យាល័យភូមិន្ទកសិកម្ម វិទ្យាស្ថានជាតិកសិកម្មព្រែកលាប និងវិទ្យាស្ថានជាតិកសិកម្មកំពង់ចាម នាព្រឹកថ្ងៃទី ១៦ ខែកញ្ញា ឆ្នាំ២០២៥ នាមជ្ឈមណ្ឌលកោះពេជ្រ ឱ្យដឹងថា៖និស្សិតជ័យលាភីដែលត្រូវទទួលសញ្ញាបត្រនៅថ្ងៃនេះមានចំនួន ១ ៤៨៧នាក់ (នារី ៦០៧នាក់ ស្មើនឹង ៤០%) ដែលបានបញ្ចប់ការសិក្សាតាមជំនាញរបស់ខ្លួនដោយជោគជ័យ ក្នុងឆ្នាំ២០២៣ និងឆ្នាំ២០២៤ ក្នុងនោះនិស្សិតចំនួន ៦៤៧នាក់ មកពីសាកលវិទ្យាល័យភូមិន្ទកសិកម្ម, ចំនួន ៦២៩នាក់ មកពីវិទ្យាស្ថានជាតិកសិកម្មព្រែកលៀប និងចំនួន ២១១នាក់ មកពីវិទ្យាស្ថានជាតិកសិកម្មកំពង់ចាម។ 

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡាបានគូAAបញ្ជាក់ឱ្យដឹងដែរថារយៈពេល៤០ឆ្នាំកន្លងមកនេះ គ្រឹះស្ថានឧត្តមសិក្សាកសិកម្មទាំងបីបានរួមចំណែកកសាងធនធានមនុស្ស សរុបចំនួន ៣១ ៨៤១នាក់ ក្នុងនោះ ដោយសាកលវិទ្យាល័យភូមិន្ទកសិកម្ម ចំនួន ១៤ ៩៨១នាក់, ដោយវិទ្យាស្ថានជាតិកសិកម្មព្រែកលៀប ចំនួន ១១ ៦៥១នាក់ និងដោយវិទ្យាស្ថានជាតិកសិកម្មកំពង់ចាម ចំនួន ៥ ២០៩នាក់។ជាមួយនឹងអត្រានិស្សិតបញ្ចប់ការសិក្សាជាមធ្យមចំនួនប្រមាណ ៨០០នាក់ ក្នុងមួយឆ្នាំ ខណៈដែលគ្រឹះស្ថានទាំងបីកំពុងបន្តបណ្តុះបណ្តាលនិស្សិតចំនួន ៥ ៨៦២នាក់ ក្នុងឆ្នាំសិក្សា២០២៤-២០២៥នេះ រួមទាំងនិស្សិតអាហារូបករណ៍ សម្តេចតេជោ និង សម្តេចកិត្តិព្រឹទ្ធបណ្ឌិត ចំនួន ១១៩នាក់។

រដ្ឋមន្រ្តីក្រសួងអប់រំបានថ្លែងឱ្យដឹងដែរថា”ខ្ញុំពិតជាមានការពេញចិត្តពេញថ្លើមជាមួយនឹងសកម្មភាព យ៉ាងសស្រាក់ សស្រាំរបស់មន្ត្រីកសិកម្មឃុំទាំង ១,៦០០នាក់ នៅទូទាំងប្រទេស ដែលត្រូវបានជ្រើសរើស ក្នុងនោះ មន្ត្រីកសិកម្មឃុំចំនួន ១,២២៨នាក់ បាន និងកំពុងផ្តល់សេវា គាំទ្របច្ចេកទេស ប្រមូល ទិន្នន័យ តម្រង់ទិសផលិតកម្មកសិកម្ម ក្ដាប់បញ្ហាប្រឈម និងផ្តល់ដំណោះស្រាយ ជាពិសេស ការជួយរកទីផ្សារ និងសម្របសម្រួលការលក់ស្រូវរបស់បងប្អូនប្រជាកសិករ”។

រដ្ឋមន្រ្តីក្រសួងអប់រំ បានបញ្ជាក់បន្ថែមថាក្រសួងកសិកម្ម រុក្ខាប្រមាញ់ និងនេសាទអនុវត្តបានដោយជោគជ័យ ក្នុងការ បង្កើតសហគមន៍កសិកម្មទំនើបចំនួន១៦ នៅក្នុងខេត្តចំនួន១០ លើមុខដំណាំស្រូវ, បន្លែ, ម្រេច និងស្វាយចន្ទី ដែលរូបខ្ញុំរំពឹងថានឹងមានការកើនឡើងជាបន្តបន្ទាប់ទៀត នាពេលខាងមុខ៕

ដោយ៖ មករា