AKP បន្ទាយមានជ័យ ថ្ងៃទី១៦ ខែកញ្ញា ឆ្នាំ២០២៥--លោក ឈឿន ក្រៃ យ៉ុងអភិបាលរងខេត្តបន្ទាយមានជ័យ បានក្រើនរំលឹក និងជំរុញយ៉ាងទទូចដល់អាជ្ញាធរ និងគ្រប់ភាគីពាក់ព័ន្ធទាំងអស់ ត្រូវតែយកចិត្តទុកដាក់ខ្ពស់ក្នុងការពិភាក្សា រៀបចំ និងកសាងកម្មវិធីវិនិយោគរយៈពេល៣ឆ្នាំរំកិលនេះ ឱ្យមានលក្ខណៈច្បាស់លាស់។

ការថ្លែងយ៉ាងដូច្នេះនៅក្នុងឱកាសលោក ឈឿន ក្រៃ យ៉ុង អភិបាលរងខេត្តតំណាងឯកឧត្តម អ៊ុំ រាត្រី អភិបាលនៃគណៈអភិបាលខេត្តនៅក្នុងវេទិកាពិគ្រោះយោបល់មួយ ស្តីពី “ការរៀបចំនិងកសាងកម្មវិធីវិនិយោគបីឆ្នាំរំកិល (២០២៦-២០២៨)” របស់រដ្ឋបាលខេត្តបន្ទាយមានជ័យដែលត្រូវបានប្រារព្ធធ្វើឡើងនៅសាលប្រជុំ (ក) នៃសាលាខេត្តបន្ទាយមានជ័យនៅព្រឹកថ្ងៃទី១៦ ខែកញ្ញា ឆ្នាំ២០២៥នេះ ដោយមានការចូលរួមពីសំណាក់ឯកឧត្តម សុវណ្ណ សុភា សមាជិកក្រុមប្រឹក្សាខេត្ត តំណាងឯកឧត្តម ប្លែក វ៉ារី ប្រធានក្រុមប្រឹក្សាខេត្ត ព្រមទាំងលោក លោកស្រី អភិបាលរងខេត្ត អភិបាលរងក្រុង ស្រុក ប្រធានមន្ទីរ-ស្ថាប័ន និងអង្គការដៃគូពាក់ព័ន្ធជាច្រើនទៀត។

លោក ឈឿន ក្រៃ យ៉ុងបានបញ្ជាក់ថា ការយកចិត្តទុកដាក់នេះមានគោលបំណងសំខាន់ ដើម្បីជំរុញការអភិវឌ្ឍមូលដ្ឋានខេត្តបន្ទាយមានជ័យឲ្យកាន់តែមានប្រសិទ្ធភាព និងឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋក្នុងមូលដ្ឋានស្របទៅនឹងភាពរីកចម្រើនរបស់ប្រទេសជាតិក្រោមការដឹកនាំដ៏ប៉ិនប្រសព្វរបស់សម្តេចមហាបវរធិបតីហ៊ុនម៉ាណែតនាយករដ្ឋមន្ត្រីនៃកម្ពុជានោះ។

សូមបញ្ជាក់ថាវេទិកាពិគ្រោះយោបល់នេះមានសារៈសំខាន់ណាស់ក្នុងការប្រមូលធាតុចូល និងទស្សនៈពីគ្រប់ភាគីពាក់ព័ន្ធទាំងអស់ដើម្បីធានាបាននូវគម្រោងវិនិយោគដែលមានលក្ខណៈគ្រប់ជ្រុងជ្រោយនិងមានប្រសិទ្ធភាពខ្ពស់ក្នុងការអភិវឌ្ឍសេដ្ឋកិច្ច និងសង្គមក្នុងខេត្តនាពេលអនាគតសំដៅកាត់បន្ថយភាពក្រីក្ររបស់ប្រជាពលរដ្ឋនោះ៕

ដោយ ឈុន សារ៉ាត