AKP ភ្នំពេញ ថ្ងៃទី១៥ ខែកញ្ញា ឆ្នាំ២០២៥--គណៈកម្មាធិការជាតិប៉ារ៉ាឡាំពិកម្ពុជាបានប្រគល់រាជក្រឹត្យត្រាស់បង្គាប់តែងតាំងមុខតំណែង និងផ្តល់ឋានៈជាអគ្គលេខាធិការ និងអគ្គលេខាធិការរង នៃអគ្គលេខាធិការដ្ឋានគណៈកម្មាធិការជាតិប៉ារ៉ាឡាំពិកកម្ពុជាចំនួន៥រូប នៅក្នុងឱកាសបើកវគ្គបណ្តុះបណ្តាលគ្រូបង្វឹកកីឡាប៉ារ៉ាឡាំពិកកម្ពុជា នៅថ្ងៃទី១៥ ខែកញ្ញា ឆ្នាំ២០២៥ ដោយប្រគល់ជូនដោយឯកឧត្តម យី វាសនា អគ្គលេខាធិការមានឋានៈស្មើរដ្ឋមន្ត្រី។

ព្រះរាជក្រឹត្យ ចុះថ្ងៃទី០៦ ខែកញ្ញា ឆ្នាំ២០២៥ បានទ្រង់យល់សេចក្តីក្រាបបង្គំទូលថ្វាយរបស់សម្តេចមហាបឋរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដោយបានត្រាស់បង្គាប់តែងតាំងមុខតំណែង និងផ្តល់ឋានៈជាអគ្គលេខាធិការ និងអគ្គលេខាធិការរង នៃអគ្គលេខាធិការដ្ឋានគណៈកម្មាធិការជាតិប៉ារ៉ាឡាំពិកកម្ពុជាចំនួន ៥រូប រួមមានៈ ឯកឧត្តម យី វាសនា អគ្គលេខាធិការ មានឋានៈស្មើរដ្ឋមន្ត្រី និងអគ្គលេខាធិការរងមានឋានៈស្មើអគ្គនាយកចំនួន៤រូប មាន ឯកឧត្តម យី សុភក្ត្រា ឯកឧត្តម ម៉ៅ សុជា លោកជំទាវ សុង សុខលាភ និងឯកឧត្តម យី សម្បត្តិបញ្ញា។

ឯកឧត្តម យី វាសនា មានប្រសាសន៍ថា នេះជាសុឆន្ទៈរបស់ថ្នាក់ដឹកនាំ និងក្រោមការចង្អុលបង្ហាញ ជាផែនការយុទ្ធសាស្ត្រក្នុងការកសាងធនធានមនុស្ស ហើយការជ្រើសរើសនេះក៏មិនមែនចេះតែដាក់មនុស្សមកកាន់ភ្លាមៗនោះទេ។ ដូច្នេះនេះជាយុទ្ធសាស្ត្រដ៏ត្រឹមត្រូវរបស់ថ្នាក់ដឹកនាំ ដោយតែងតាំងអគ្គលេខាធិការរង អគ្គលេខាធិការដ្ឋាននៃគណៈកម្មាធិការជាតិប៉ារ៉ាឡាំពិកកម្ពុជា ដែលត្រូវមានកម្រិតសមរម្យមួយ និងជាមោទនភាពរបស់ពួកគាត់ជាយុវជនជំនាន់នេះ។ អគ្គលេខាធិការរងទាំង៤រូបធ្លាប់មានបទពិសោធន៍បម្រើកិច្ចការជាមួយគណៈកម្មាធិការជាតិប៉ារ៉ាឡាំពិកកម្ពុជាយូរឆ្នាំ ហើយអ្នកខ្លះជាង១០ឆ្នាំមកហើយ។

ឯកឧត្តម យី វាសនា គូសបញ្ជាក់ទៀតថា នេះជាករតម្រង់ទិសរបស់ថ្នាក់ដឹកនាំ ដែលផ្តល់នូវកិត្តិយសសម្រាប់ពួកគាត់ ក៏ដូចជាការកសាងធនធានមនុស្ស ក្នុងវិស័យកីឡាជនពិការកម្ពុជា។ ទន្ទឹមនឹងការបណ្តុះបណ្តាលធនធានគ្រូបង្វឹក មន្ត្រីជាន់ខ្ពស់ ក៏ត្រូវកសាងដូចគ្នា រួមទាំងការកសាងទាំងរចនាសម្ព័ន្ធ គោលនយោបាយ ផែនការយុទ្ធសាស្ត្ររបស់គណៈកម្មាធិការជាតិប៉ារ៉ាឡាំពិកកម្ពុជាឱ្យបានរឹងមាំបន្ថែមទៀត។

គួរបញ្ជាក់ថា គណៈកម្មាធិការជាតិប៉ារ៉ាឡាំពិកម្ពុជាត្រូវបានបង្កើតឡើងដោយព្រះរាជក្រឹត្យ ដោយមានសម្តេចតេជោ ហ៊ុន សែន ប្រធានកិត្តិយស គណៈកម្មាធិការជាតិប៉ារ៉ាឡាំពិកកម្ពុជា, សម្តេចមហាបវរធិបតី ហ៊ុន ម៉ាណែត ប្រធានគណៈកម្មាធិការជាតិប៉ារ៉ាឡាំពិកកម្ពុជា រួមទាំងឧបនាយករដ្ឋមន្ត្រី រដ្ឋមន្ត្រីជាច្រើនរូបទៀតជាអនុប្រធាន៕

ដោយ ហេង ណាលីន