AKP ភ្នំពេញ ថ្ងៃទី០៨ ខែឧសភា ឆ្នាំ២០២៦ -- មន្ត្រី​កូរ៉េខាងត្បូងបាន​និយាយ​ថា រដ្ឋមន្ត្រីការបរទេសកូរ៉េខាងត្បូង លោក ចូ ហ្យ៊ុន (Cho Hyun)បានជួបជាមួយឯកអគ្គរដ្ឋទូតមកពីសមាគមប្រជាជាតិអាស៊ីអាគ្នេយ៍(អាស៊ាន) កាលពីថ្ងៃព្រហស្បតិ៍ ដើម្បីពិភាក្សាអំពីវិធីពង្រឹងកិច្ចសហប្រតិបត្តិការរវាងកូរ៉េខាងត្បូង និងតំបន់អាស៊ីអាគ្នេយ៍។

ក្នុងអំឡុងពេលនៃកិច្ចប្រជុំនោះ លោក ចូ បានកត់សម្គាល់ថា ការផ្លាស់ប្តូរប្រជាជន និងសេដ្ឋកិច្ចរវាងកូរ៉េខាងត្បូង និងអាស៊ាន បានបន្តកាន់តែស៊ីជម្រៅ ខណៈដែលបានកត់សម្គាល់ពីការផ្លាស់ប្តូរកម្រិតខ្ពស់យ៉ាងសកម្មរួមទាំងដំណើរទស្សនកិច្ចមកកាន់ប្រទេសកូរ៉េខាងត្បូងដែលធ្វើឡើងដោយមេដឹកនាំវៀតណាម និងឡាវកាលពីឆ្នាំមុន។ នេះបើយោងតាមក្រសួងការបរទេសបានចេញផ្សាយ។

លោករដ្ឋមន្ត្រីក៏បានគូសបញ្ជាក់ផងដែរអំពីដំណើរទស្សនកិច្ចរបស់លោកប្រធានាធិបតី លី ជេម្យុង នៅក្នុងឆ្នាំនេះទៅកាន់ប្រទេសសិង្ហបុរីហ្វីលីពីន និងវៀតណាម រួមជាមួយនឹងដំណើរទស្សនកិច្ចរបស់ប្រធានាធិបតីឥណ្ឌូណេស៊ី លោក ប្រាបូវ៉ូ ស៊ូប៊ីយ៉ាន់តូ ទៅកាន់ប្រទេសកូរ៉េខាងត្បូងកាលពីខែមុន។

លោក ចូ បានសង្កត់ធ្ងន់ទៅលើការប្តេជ្ញាចិត្តរបស់រដ្ឋាភិបាលក្នុងការជំរុញភាពជាដៃគូយុទ្ធសាស្ត្រគ្រប់ជ្រុងជ្រោយកូរ៉េ-អាស៊ាន និងបានពន្យល់ពីកិច្ចខិតខំប្រឹងប្រែងរបស់ទីក្រុងសេអ៊ូលក្នុងការកែសម្រួលកិច្ចព្រមព្រៀងពាណិជ្ជកម្មសេរីកូរ៉េ-អាស៊ាន ដើម្បីពង្រឹងកិច្ចសហប្រតិបត្តិការសេដ្ឋកិច្ច៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)