AKP ព្រះវិហារ ថ្ងៃទី១៥ ខែកញ្ញា ឆ្នាំ២០២៥ --
ស្ថានទូតជប៉ុនប្រចាំនៅកម្ពុជា បាននាំយកកញ្ចប់ជំនួយបន្ទាន់ ដែលជាអំណោយរបស់រដ្ឋាភិបាល និងប្រជាជនជប៉ុន ទៅប្រគល់ជូនដល់ជនភៀសខ្លួនចំនួន ២០០គ្រួសារ ដែលកំពុងស្នាក់នៅមណ្ឌលសុវត្ថិភាពវត្តកំពង់សង្កែ ស្ថិតនៅស្រុកឆែប ខេត្តព្រះវិហារ ដើម្បីឆ្លើយតបទៅនឹងតម្រូវការចាំបាច់នានា និងជួយសម្រួលដល់ការស្ដារជីវភាពឡើងវិញបន្ទាប់ពីវិលត្រឡប់ទៅលំនៅឋានវិញ។ ការនាំយកកញ្ចប់ជំនួយបន្ទាន់នេះ បានធ្វើឡើងនាព្រឹកថ្ងៃទី១៥ ខែកញ្ញា ឆ្នាំ២០២៥ ដោយមានការអញ្ជើញចូលរួមពីឯកឧត្តម គីម រិទ្ធី អភិបាលខេត្តព្រះវិហារ និងលោក ណាហ្គាសិ កេនស៊ូកិ (Nagashe Kensuke) ឧបទូត និងជាអនុប្រធានបេសកកម្មនៃស្ថានទូតជប៉ុនប្រចាំនៅកម្ពុជា រួមជាមួយតំណាងអង្គការយូនីសេហ្វ (UNICEF) និងអង្គការ IOM ប្រចាំនៅកម្ពុជា។
លោក ណាហ្គាសិ កេនស៊ូកិ បានបញ្ជាក់អំពីការយកចិត្តទុកដាក់របស់រដ្ឋាភិបាលជប៉ុនចំពោះស្ថានភាពរបស់ប្រជាពលរដ្ឋដែលរងផលប៉ះពាល់ដោយជម្លោះតាមព្រំដែន។ លោកបានលើកឡើងថា ដោយការមើលឃើញពីការផ្លាស់ទីលំនៅរបស់គ្រួសារ និងកុមាររាប់ពាន់នាក់ ជប៉ុនបានសម្រេចផ្ដល់ជំនួយបន្ទាន់តាមរយៈអង្គការយូនីសេហ្វ និងអង្គការ IOM ដើម្បីផ្ដល់សម្ភារចាំបាច់ ទីជម្រកបណ្ដោះអាសន្ន ទឹកស្អាត និងការគាំទ្រផ្នែកផ្លូវចិត្ត។ លោកក៏បានសម្តែងក្តីសង្ឃឹមថា ជំនួយទាំងនេះនឹងក្លាយជាកម្លាំងចលករដ៏មានន័យ ជួយឱ្យជនភៀសខ្លួនអាចកសាង សន្តិភាព និងស្ថិរភាព ក្នុងជីវិតរបស់ពួកគេឡើងវិញបានយ៉ាងឆាប់រហ័ស។

ជាមួយគ្នានេះ ឯកឧត្តម គីម រិទ្ធី បានថ្លែងអំណរគុណយ៉ាងជ្រាលជ្រៅបំផុត ចំពោះរដ្ឋាភិបាល និងប្រជាជនជប៉ុន ដែលតែងតែជាមិត្តល្អ និងជាដៃគូអភិវឌ្ឍន៍ដ៏សំខាន់របស់កម្ពុជា ដោយបានគូសបញ្ជាក់ពីកិច្ចសហប្រតិបត្តិការយូរអង្វែងរបស់ជប៉ុន ក្នុងវិស័យជាច្រើនដូចជា ជំនួយមនុស្សធម៌ ការអប់រំ សុខាភិបាល ការស្ដារហេដ្ឋារចនាសម្ព័ន្ធក្រោយសង្គ្រាម និងការអភិវឌ្ឍសេដ្ឋកិច្ច-សង្គម។ ឯកឧត្តមអភិបាលខេត្តក៏បានលើកឡើងពីស្ថានភាពបច្ចុប្បន្នថា បន្ទាប់ពីការអនុវត្តបទឈប់បាញ់ ស្ថានការណ៍បានប្រសើរឡើងគួរឱ្យកត់សម្គាល់ ដោយប្រជាពលរដ្ឋប្រមាណជាង ៧៧% បានវិលត្រឡប់ទៅលំនៅដ្ឋានរបស់ពួកគេវិញ។ ឯកឧត្ដមបានបន្ដថា គិតត្រឹមថ្ងៃនេះ នៅសល់ជនភៀសខ្លួនប្រមាណ ២ ៧៧០ គ្រួសារ ស្មើនឹង ៩ ១២២នាក់ ដែលកំពុងស្នាក់នៅមណ្ឌលសុវត្ថិភាពចំនួន ៦ទីតាំង ក្នុងនោះ នៅមណ្ឌលវត្តកំពង់សង្កែតែមួយ មានប្រជាពលរដ្ឋស្នាក់នៅប្រមាណ ៤២៥គ្រួសារ ស្មើនឹង ១ ១៨៨នាក់។

ឯកឧត្ដមអភិបាលខេត្ដបានបញ្ជាក់បន្ថែមថា ការវិលត្រឡប់ទៅផ្ទះវិញនៅតែប្រឈមនឹងបញ្ហាផ្សេងៗ ជាពិសេសនៅតាមភូមិសាស្ត្រមួយចំនួនក្នុងស្រុកជាំក្សាន្ត ដែលនៅសល់អាវុធយុទ្ធភណ្ឌមិនទាន់ផ្ទុះ ជាច្រើន។ លើសពីនេះ ជីវភាពរស់នៅរបស់ប្រជាពលរដ្ឋក៏កំពុងស្ថិតក្នុងការលំបាកក្នុងដំណើរការស្ដារមុខរបរ និងស្ថិរភាពជីវិតឡើងវិញ ហើយឯកឧត្ដមក៏បានអះអាងថា ការផ្ដល់ជំនួយពីជប៉ុននាពេលនេះ គឺពិតជាមានសារៈសំខាន់ណាស់ ក្នុងការជួយសម្រាលបន្ទុកទាំងនេះ មុននឹងជីវភាពរបស់ពួកគាត់អាចឈានដល់ភាពប្រក្រតីពេញលេញ៕

ដោយ៖ រិទ្ធី, ប្រភព៖ មន្ទីរព័ត៌មានខេត្ដព្រះវិហារ