AKP ភ្នំពេញ ថ្ងៃទី១៥ ខែកញ្ញា ឆ្នាំ២០២៥--ឯកឧត្តម យី វាសនា អគ្គលេខាធិការ គណៈកម្មាធិការជាតិប៉ារ៉ាឡាំពិកកម្ពុជាបានគូសបញ្ជាក់ថា ជាការពិត ការបណ្តុះបណ្តាលធនធានមនុស្ស គឺយើងមានក្តីរំពឹងទុក ក្នុងការបង្កើនការអភិវឌ្ឍទាំងកម្រិតជាតិ និងឆ្ពោះទៅរកកម្រិតអន្តរជាតិ។

នេះជាការលើកឡើងរបស់ឯកឧត្តមអគ្គលេខាធិការ នៅក្នុងបទសម្ភាសន៍ ក្រោយបញ្ចប់ពិធីបើកវគ្គបណ្តុះបណ្តាលគ្រូបង្វឹកកីឡាប៉ារ៉ាឡាំពិកម្ពុជាកម្រិតបឋម ពីថ្ងៃទី១៥-១៨ ខែកញ្ញា ឆ្នាំ២០២៥  នៅថ្ងៃទី១៥ ខែកញ្ញា ឆ្នាំ២០២៥ ដោយមានសិក្ខាកាមចូលរួមចំនួន ៤០នាក់។

ឯកឧត្តម យី វាសនា មានប្រសាសន៍ថា វគ្គបណ្តុះបណ្តាលកម្រិតបឋមនេះ គឺជាការចាប់ផ្តើមនូវភាពច្បាស់លាស់ ដើម្បីឆ្ពោះទៅកាន់វគ្គធម្យម និងកម្រិតខ្ពស់ ព្រមទាំងកម្រិតបំប៉នផ្សេងៗទៀត។ ក្នុងនាមជាគ្រូឧទ្ទេសប្រចាំវគ្គនេះ ឯកឧត្តម យី វាសនា នឹងចែករំលែកអំពីការកកើតនូវគណៈកម្មាធិការជាតិប៉ារ៉ាឡាំពិកកម្ពុជា ស្ថាប័នអន្តរជាតិកម្រិតតំបន់ និងពិភពលោក រួមទាំងជីវប្រវត្តិនៃប្រភេទកីឡាប៉ារ៉ាឡាំពិកផងដែរ។ វគ្គនេះនឹងស៊ីជម្រៅអំពី ដើម្បីឱ្យគ្រូបង្វឹកមានទុនក្នុងការចូលរួមចែករំលែកចំណេះដឹងបន្តដល់កីឡាករ កីឡាការិនីពិការកម្ពុជាឱ្យកាន់តែមានប្រសិទ្ធភាពបន្ថែមទៀត។

សង្កត់ធ្ងន់បន្ថែមពីលើនេះ ឯកឧត្តមលើកឡើងថា ជាការពិត តាមរយៈការបណ្តុះបណ្តាលធនធានមនុស្ស គឺយើងមានក្តីរំពឹងទុក ក្នុងការបង្កើនការអភិវឌ្ឍទាំងកម្រិតជាតិ និងឆ្ពោះទៅរកកម្រិតអន្តរជាតិ។ ការបណ្តុះធនធានមនុស្សនេះ គឺយើងចង់ឱ្យគ្រូមានបច្ចេកទេសគ្រប់គ្រាន់ ដើម្បីបណ្តុះបណ្តាលដល់កីឡាករ កីឡាការិនីរបស់យើងឱ្យមានសក្តានុពល ត្រៀមចូលរួមប្រកួតប្រជែងមេដាយមាស ប្រាក់ និងសំរឹទ្ធ ពីការប្រកួតអន្តរជាតិយកមកជូនជាតិ។ ជាមួយគ្នានេះ យើងក៏សង្កេតមើលបន្តទៀតថាតើ កម្ពុជាអាចថែរក្សាមេដាយ បង្កើនមេដាយ ឬក៏ថយចំនួនមេដាយ ឬបង្កើនប្រភេទកីឡាសម្រាប់ព្រឹត្តិការណ៍ប្រកួតបន្តបន្ទាប់។ ដូច្នេះគ្រូបង្វឹក គឺជាធនធានដ៏មានសារៈសំខាន់ ក្នុងការរួមចំណែកទាំងការជ្រើសរើសកីឡាករ កីឡាការិនី ការរៀបចំបង្វឹកកីឡាករ រួមទាំងការដឹកនាំចេញទៅប្រកួតជាដើម។ 

តាមរយៈការបណ្តុះបណ្តាលធនធានគ្រូបង្វឹកនេះនឹងកសាងនូវភាពរឹងមាំបន្ថែម ក្នុងគុណភាពបច្ចេកទេសរបស់កីឡាករ កីឡាការិនីពិការកម្ពុជា ដើម្បីត្រៀមឆ្ពោះទៅចូលរួមប្រកួតប្រជែងមេដាយជូនជាតិ ក្នុងព្រឹត្តិការណ៍ប្រកួតអាស៊ានប៉ារ៉ាហ្គេម រៀងរាល់២ឆ្នាំម្តង ជាបន្តបន្ទាប់ រួមទាំងគោលដៅទទួលរៀបចំធ្វើម្ចាស់ផ្ទះ ការប្រកួតកីឡាយុវជនអាស៊ីប៉ារ៉ាហ្គេម នាឆ្នាំ២០២៩ផងដែរ (បន្ទាប់ចប់ កីឡាយុវជនអាស៊ី ឆ្នាំ២០២៩ នៅកម្ពុជា)។ ជាមួយគ្នានេះ គណៈកម្មាធិការជាតិប៉ារ៉ាឡាំពិកកម្ពុជាតែងតែខិតខំបណ្តុះបណ្តាលធនធានគ្រូបង្វឹក កីឡាករ កីឡាការិនីពិការជម្រើសជាតិកម្ពុជា ដែលជាកិត្តិយសជាតិរបស់យើងចូលរួមប្រកួតជាបន្តបន្ទាប់ទៀត ក្រោមអនុសាសន៍ណែនាំរបស់សម្តេចតេជោ ហ៊ុន សែន អតីតប្រធានគណៈកម្មាធិការជាតិប៉ារ៉ាឡាំពិកកម្ពុជា តាំងពីដើមរៀងមក រហូតដល់បច្ចុប្បន្ន សម្តេចតេជោជាប្រធានកត្តិយស បន្តមកដល់បច្ចុប្បន្ន ដែលមានសម្តេចធិបតី ហ៊ុន ម៉ាណែត ប្រធានគណៈកម្មាធិការជាតិប៉ារ៉ាឡាំពិកកម្ពុជា៕

ដោយ ហេង ណាលីន