AKP ភ្នំពេញ ថ្ងៃទី១៥ ខែកញ្ញា ឆ្នាំ២០២៥ -- ពិព័រណ៍ពាណិជ្ជកម្មទំនិញចិននៅកម្ពុជាឆ្នាំ២០២៥ ត្រៀមបើកជាផ្លូវការនៅថ្ងៃទី២៨ ដល់ទី៣០ ខែកញ្ញា ឆ្នាំ២០២៥ ដែលព្រឹត្តិការណ៍ពាណិជ្ជកម្មដ៏ធំរបស់បណ្តាប្រទេសតាមតាមបណ្ដោយខ្សែក្រវាត់ និងផ្លូវ នឹងចាប់ផ្តើមឡើងនៅមជ្ឈមណ្ឌលសន្និបាតកោះពេជ្រ រាជធានីភ្នំពេញ ប្រទេសកម្ពុជា។ ពិព័រណ៍ពាណិជ្ជកម្មទំនិញចិននៅកម្ពុជាឆ្នាំ២០២៥ នឹងត្រូវប្រារព្ធឡើងយ៉ាងអធិកអធម ហើយនេះមិនត្រឹមតែជាពិព័រណ៍ទំនិញអន្តរជាតិលើកដំបូងដែលរៀបចំដោយប្រទេសចិននៅក្នុងប្រទេសកម្ពុជានោះទេ ប៉ុន្តែវាក៏ជាពិព័រណ៍ប្រធានបទរបស់ចិន ដែលមានទ្រង់ទ្រាយធំបំផុតក្នុងប្រវត្តិសាស្ត្រកម្ពុជា ដោយមានវត្តមានក្រុមហ៊ុនចិនជិត ១០០ ចូលរួមតាំងពិព័រណ៍។ នេះក៏ជាសញ្ញាមួយបង្ហាញថា កិច្ចសហប្រតិបត្តិការកម្ពុជា-ចិន ក្រោមគំនិតផ្តួចផ្តើម "ខ្សែក្រវាត់ និងផ្លូវ" កំពុងឈានចូលដល់ដំណាក់កាលថ្មីមួយដែលកាន់តែមានភាពរស់រវើក។

ពិព័រណ៍លើកនេះបានប្រព្រឹត្តទៅចំពេលដ៏សំខាន់ដែលគំនិតផ្តួចផ្តើម "ខ្សែក្រវាត់ និងផ្លូវ" កំពុងត្រូវបានជំរុញឱ្យកាន់តែស៊ីជម្រៅ។ ក្នុងនាមជាដៃគូដ៏សំខាន់ក្នុងការកសាង "ខ្សែក្រវាត់ និងផ្លូវ" ប្រទេសកម្ពុជា ដោយសារមានទីតាំងភូមិសាស្ត្រដ៏ល្អ គោលនយោបាយសេដ្ឋកិច្ចបើកចំហ និងកម្លាំងជំរុញអភិវឌ្ឍន៍ដ៏ខ្លាំងក្លារបស់ខ្លួន បានក្លាយជាច្រកទ្វារដំបូងសម្រាប់ក្រុមហ៊ុនចិនក្នុងការចូលទៅកាន់ទីផ្សារអាស៊ីអាគ្នេយ៍។

ស្របពេលដែលសេដ្ឋកិច្ចសកលកំពុងប្រែប្រួលយ៉ាងស៊ីជម្រៅ យុទ្ធសាស្ត្ររបស់ក្រុមហ៊ុនចិន "ដើរចេញទៅក្រៅ" ដើម្បីរួមបញ្ចូលខ្លួនយ៉ាងស៊ីជម្រៅទៅក្នុងទីផ្សារតំបន់ បានក្លាយជាជម្រើសដ៏ចាំបាច់។ ពិព័រណ៍លើកនេះបានកសាងស្ពានតភ្ជាប់ដ៏មានប្រសិទ្ធភាព និងរលូនរវាងសមត្ថភាពផលិតដែលមានគុណភាពខ្ពស់របស់ចិន ជាមួយនឹងតម្រូវការទីផ្សារនៅកម្ពុជា និងអាស៊ាន។ វិសាលភាពនៃផលិតផលដែលដាក់តាំងបង្ហាញគឺមានគោលដៅច្បាស់លាស់ ដោយរួមមាន៖ ប៊ូឡុងនិងវីស គ្រឿងដែក គ្រឿងសំណង់ ផលិតផលថាមពលពន្លឺព្រះអាទិត្យ ឧបករណ៍អគ្គិសនីប្រើប្រាស់ក្នុងផ្ទះ សម្លៀកបំពាក់ វាយនភ័ណ្ឌប្រើក្នុងផ្ទះ គ្រឿងបន្លាស់រថយន្ត និងរបស់របរជាច្រើនទៀត។ ក្រុមហ៊ុនចិនជិត ១០០ នឹងបង្ហាញយ៉ាងគ្រប់ជ្រុងជ្រោយនូវសមត្ថភាពប្រកួតប្រជែង និងនវានុវត្តន៍នៃ "ផលិតផលផលិតនៅចិន" ដើម្បីបំពេញតម្រូវការតាមកម្រិតផ្សេងៗនៃទីផ្សារកម្ពុជា និងទីផ្សារក្នុងតំបន់។

ក្នុងអំឡុងពេលពិព័រណ៍លើកនេះ នឹងមានព្រឹត្តិការណ៍ពិសេសជាច្រើនត្រូវបានរៀបចំឡើង ក្នុងនោះ រួមមាន៖វេទិកាសក្តានុពលអភិវឌ្ឍន៍ពាណិជ្ជកម្មកម្ពុជា-ចិន៖ វេទិកានេះ នឹងប្រមូលផ្តុំតំណាងស្ថាប័នរដ្ឋាភិបាល ថ្នាក់ដឹកនាំធុរកិច្ច និងអ្នកជំនាញក្នុងវិស័យពាក់ព័ន្ធមកពីប្រទេសទាំងពីរ ដើម្បីវិភាគយ៉ាងស៊ីជម្រៅអំពីបរិយាកាសវិនិយោគ គោលនយោបាយឧស្សាហកម្មអាទិភាព និងចំណុចសំខាន់ៗនៃកិច្ចសហប្រតិបត្តិការនាពេលអនាគតរបស់កម្ពុជា ដែលនឹងផ្តល់ការតម្រង់ទិសដ៏មានតម្លៃសម្រាប់ក្រុមហ៊ុននៃប្រទេសទាំងពីរក្នុងការចូលទៅកាន់ទីផ្សារ។

ជំនួបបន្ស៊ីការផ្គត់ផ្គង់ និងតម្រូវការសម្រាប់អ្នកទិញមកពីកម្ពុជា ចិន និងអន្តរជាតិ៖ បង្កើតវេទិកាទំនាក់ទំនងធុរកិច្ច B2B ប្រកបដោយប្រសិទ្ធភាពខ្ពស់។ ក្រៅពីអ្នកទិញក្នុងស្រុកដ៏មានសក្តានុពល ក៏នឹងមានការទាក់ទាញអ្នកទិញអន្តរជាតិមកពីអឺរ៉ុប អាម៉េរិក ម៉ាឡេស៊ី ឥណ្ឌូណេស៊ី សិង្ហបុរី និងប្រទេសដទៃទៀត ដើម្បីជួយក្រុមហ៊ុនចិនសម្រេចបាននូវ "ការបន្ស៊ីតែមួយ គ្របដណ្ដប់ច្រើនប្រទេស" ។

ការគាំទ្រយ៉ាងពេញទំហឹងពីសហគ្រិនចិននៅកម្ពុជា៖ សភាពាណិជ្ជកម្មចិនសំខាន់ៗនៅកម្ពុជា ដូចជាសភាពាណិជ្ជកម្មខេត្ត Zhejiang, Heilongjiang, Shandong, Hunan ជាដើម នឹងរៀបចំសមាជិករបស់ខ្លួនមកចូលរួមពិព័រណ៍ និងទិញទំនិញ។ បណ្តាញទំនាក់ទំនងក្នុងស្រុកដ៏រឹងមាំរបស់ពួកគេ នឹងផ្តល់ការគាំទ្រយ៉ាងរឹងមាំសម្រាប់ក្រុមហ៊ុនដែលចូលរួមតាំងពិព័រណ៍ដើម្បីបង្កើតអាជីវកម្មនៅកម្ពុជា។

សូមជម្រាបជូនថា ការរៀបចំពិព័រណ៍ពាណិជ្ជកម្មទំនិញចិននៅកម្ពុជាឆ្នាំ២០២៥ គឺជាសកម្មភាពជាក់លាក់មួយដើម្បីពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា-ចិន និងអនុវត្តតាមតម្រូវការនៃការកសាងគំនិតផ្តួចផ្តើម "ខ្សែក្រវាត់ និងផ្លូវ" ប្រកបដោយគុណភាពខ្ពស់។ វេទិកានេះ នឹងរួមគ្នាប្រារព្ធព្រឹត្តិការណ៍ដ៏អស្ចារ្យ បង្កើតអនាគតថ្មី ហើយវាមិនត្រឹមតែជាការត្រួសត្រាយផ្លូវយ៉ាងរលូនសម្រាប់ក្រុមហ៊ុនចិនដើម្បីបោះជំហានចូលទីផ្សារកម្ពុជា និងអាស៊ានប៉ុណ្ណោះទេ ប៉ុន្តែវាក៏នាំមកនូវជម្រើសគុណភាពខ្ពស់ជាច្រើនទៀតសម្រាប់ការពង្រឹងសមត្ថភាពឧស្សាហកម្ម និងការផ្តល់ជូនដល់អ្នកប្រើប្រាស់កម្ពុជា ដែលប្រាកដជានឹងអាចសរសេរទំព័រថ្មីនៃកិច្ចសហប្រតិបត្តិការ ឈ្នះ-ឈ្នះ និងការអភិវឌ្ឍរួមគ្នារវាងកម្ពុជា-ចិន៕

ដោយ៖ រិទ្ធី