AKP ភ្នំពេញ ថ្ងៃទី១៥ ខែកញ្ញា ឆ្នាំ២០២៥-- ឯកឧត្តម សរ សុពុត្រា អភិបាលនៃគណៈអភិបាលខេត្តស្ទឹងត្រែង បានអំពាវនាវឱ្យបងប្អូនអ្នកប្រកបរបររត់ម៉ូតូឌុប ម៉ូតូកង់បី និងភ្នាក់ងារអនាម័យទាំងអស់បន្តគោរពច្បាប់ចរាចរណ៍ យកចិត្តទុកដាក់ខ្ពស់លើសុវត្ថិភាពជាចម្បង និងរក្សាអនាម័យសាធារណៈឱ្យបានល្អប្រសើរ ដើម្បីបង្កើនសោភ័ណភាពក្រុងស្ទឹងត្រែងឱ្យកាន់តែល្អបន្ថែមទៀត។ ការអំពាវនាវនេះធ្វើឡើងក្នុងឱកាសនៃការសំណេះសំណាលជាមួយបងប្អូនអ្នករត់ម៉ូតូឌុប ម៉ូតូកង់បី និងភ្នាក់ងារអនាម័យក្រុងស្ទឹងត្រែង ក្នុងឱកាសបុណ្យកាន់បិណ្ឌ កាលពីរសៀលថ្ងៃទី១៤ ខែកញ្ញា ឆ្នាំ២០២៥។

ឯកឧត្តមអភិបាលនៃគណៈអភិបាលខេត្តស្ទឹងត្រែងបានថ្លែងថា ពិធីសំណេះសំណាលនេះគឺជាឱកាសមួយក្នុងការជួយឱ្យរដ្ឋបាលខេត្ត និងបងប្អូនដែលជាអ្នករត់ម៉ូតូឌុប ម៉ូតូកង់បី និងភ្នាក់ងារអនាម័យបានជួបជុំគ្នា បង្កើនការយោគយល់ និងទំនាក់ទំនងល្អ ក្នុងការចូលរួមធ្វើឱ្យក្រុងស្ទឹងត្រែងមានសណ្តាប់ធ្នាប់ និងភាពរីកចម្រើន។

ឯកឧត្តមបានពាំនាំនូវការផ្តាំផ្ញើសួរសុខទុក្ខ និងសេចក្តីនឹករលឹកពីសំណាក់សម្តេចធិបតី ហ៊ុន ម៉ាណែត នាយរដ្ឋមន្រ្តី នៃព្រះរាជាណាចក្រកម្ពុជា និងលោកជំទាវដល់បងប្អូនអ្នករត់ម៉ូតូឌុប ម៉ូតូកង់បី និងភ្នាក់ងារអនាម័យ ដែលបានចូលរួមនាពេលនេះ និងជូនពរឱ្យរកទទួលទានមានបានគ្រប់ៗគ្នា៕

ដោយ៖ ចាន់ សុភឿន (ប្រភព៖ រដ្ឋបាលខេត្តស្ទឹងត្រែង)