AKP កំពង់ធំ ថ្ងៃទី០៨ ខែឧសភា ឆ្នាំ២០២៦--ឧត្ដមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានអចិន្ដ្រៃយ៍នៃគណៈកម្មការការពារទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំបានឡើងធ្វើបទអន្តរាគមន៍ស្តីពីលទ្ធផលនៃការការពារ ទប់ស្កាត់ និងបង្ក្រាបបទល្មើសធនធានធម្មជាតិ និងបានលើកឡើងនូវបញ្ហាប្រឈមមួយចំនួនក្នុងកិច្ចប្រជុំប្រចាំខែរបស់គណៈបញ្ជាការឯកភាពរដ្ឋបាលខេត្តកំពង់ធំកាលពីរសៀលថ្ងៃទី០៧ ខែឧសភា ឆ្នាំ២០២៦ ក្រោមអធិបតីភាពឯកឧត្ដម នួន ផារ័ត្ន អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំនៅសាលប្រជុំប្រាសាទតោនៃរដ្ឋបាលខេត្តកំពង់ធំ។ 

ឧត្ដមសេនីយ៍ត្រី ពេជ ថាល់ ស្នងការរងនគរបាលខេត្ត ប្រធានក្រុមការងារលេខាធិការដ្ឋានគណៈបញ្ជាការឯកភាពរដ្ឋបាលខេត្តកំពង់ធំ បានឡើងរាយការណ៍អំពីលទ្ធផលការងារសន្តិសុខ សណ្តាប់ធ្នាប់សង្គម ការអនុវត្តន៍គោលនយោបាយភូមិ ឃុំ សង្កាត់ មានសុវត្ថិភាព ការបង្ក្រាបបទល្មើសឆបោកតាមប្រព័ន្ធបច្ចេកវិទ្យា(online scam)និងការការពារ ទប់ស្កាត់ បង្ក្រាបបទល្មើសធម្មជាតិ ដែលគណៈបញ្ជាការឯកភាពរដ្ឋបាលគ្រប់ជាន់ថ្នាក់ សហការជាមួយកងកម្លាំងប្រដាប់អាវុធទាំងបី រួមគ្នាសម្រេចបានលទ្ឋផលល្អប្រសើរគួរជាទីមោទនៈ ។ 

ឧត្ដមសេនីយ៍ទោ សោម ស៊ុន បានគូសបញ្ជាក់ថា បទល្មើសព្រៃឈើមានការថយចុះគួរឱ្យកត់សម្គាល់ តែក៏នៅមានការកើតឡើង ដោយជនល្មើសមួយចំនួនតូចនៅតែលួចកាប់ទន្ទ្រានព្រៃឈើ យកដីធ្វើកម្មសិទ្ធិ តាមរបៀបពង្រីកក្បាលចំការ នៅក្នុងដីព្រៃឈើសហគមន៍ ដែលជាតំបន់គ្រប់គ្រងដោយរដ្ឋបាលព្រៃឈើនិងតំបន់ដាច់ស្រយ៉ាលមួយចំនួនដែលគ្រប់គ្រងដោយស្ថាប័នបរិស្ថានតែត្រូវបានកងកម្លាំងចម្រុះបង្ក្រាបបាន និងមួយផ្នែកទៀតកំពុងចាត់វិធានការតាមផ្លូវច្បាប់ជាធរមាន ។   

នៅក្នុងឱកាសនេះដែរឧត្ដមសេនីយ៍ទោ សោម ស៊ុន ក៍បានលើកឡើងអំពីលទ្ធផលជោគជ័យនៃការបង្ក្រាបបទល្មើសនេសាទនៅក្នុងតំបន់បឹងទន្លេសាប ពិសេសក្នុងពេលថ្មីៗនេះកម្លាំងចម្រុះ ដែលមានកងទ័ពធ្វើជាស្នូល បាន និងកំពុងការពារតំបន់ឡូអភិរក្សពូជត្រី ទាំងយប់ទាំងថ្ងៃ នៅឃុំផាត់សណ្តាយ ស្រុកកំពង់ស្វាយ និងតំបន់អភិរក្សពូជត្រី នៅតំបន់បាឡត និងតំបន់ទន្លេឆ្មារឃុំពាមបាង ស្រុកស្ទោង ខេត្តកំពង់ធំ ដើម្បីរក្សាពូជត្រីសម្រាប់ពងកូន នៅរដូវវស្សាខាងមុខនេះឱ្យមានការសំបូរឡើងវិញ សម្រាប់បម្រើសេចក្តីត្រូវការរបស់សង្គមជាតិ និងប្រជាជនកម្ពុជា ។ 

ឯកឧត្ដម នួន ផារ័ត្ន អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ បានថ្លែងនូវការកោតសរសើរចំពោះថ្នាក់ដឹកនាំគ្រប់លំដាប់ថ្នាក់ នៃគណៈបញ្ជាការឯកភាពរដ្ឋបាលខេត្តក្រុង ស្រុករួមជាមួយកងកម្លាំងប្រដាប់អាវុធទាំងបីប្រភេទ បណ្ដាមន្ទីរស្ថាប័នអង្គភាព និងអាជ្ញាធរដែនដី ដែលបានខិតខំប្រឹងប្រែងបំពេញភារកិច្ចការពារសន្តិសុខ សុវត្ថិភាព សណ្តាប់ធ្នាប់សង្គម បានល្អ ពិសេសក្នុងពេលចូលឆ្នាំថ្មីប្រពៃណីជាតិខ្មែរកន្លងទៅនេះ និងបានថ្លែងអំណរគុណចំពោះឧត្តមសេនីយ៍ទោ សោម ស៊ុន ដែលបានខិតខំប្រឹងប្រែងបំពេញភារកិច្ចក្នុងការការពារ ទប់ស្កាត់ និងបង្ក្រាបបទល្មើសធនធានធម្មជាតិ ក្នុងរយៈពេលកន្លងទៅទទួលបានលទ្ធផលល្អប្រសើរ ។ 

ឯកឧត្ដម នួន ផារ័ត្ន បានប្រគល់ភារកិច្ចដល់កងកម្លាំងប្រដាប់អាវុធទាំងបី មន្ទីរអង្គភាព ស្ថាប័ននានា និងថ្នាក់ដឹកនាំគណៈបញ្ជាការឯកភាពរដ្ឋបាលខេត្ត ក្រុង ស្រុកត្រូវបន្តយកចិត្តទុកដាក់បង្ក្រាបឱ្យបានមិនឱ្យមានការកើតឡើងជាដាច់ខាត នូវបទល្មើសឆបោកតាមប្រព័ន្ធបច្ចេកវិទ្យា(online  scam)ហើយត្រូវបន្តអនុវត្តន៍គោលនយោបាយភូមិ ឃុំ មានសុវត្ថិភាព និងត្រូវបន្តសកម្មភាពដោយយកចិត្តទុកដាក់ក្នុងការការពារ ទប់ស្កាត់ និងបង្ក្រាបបទល្មើសធនធានធម្មជាតិ ក្នុងភូមិសាស្ត្រខេត្តកំពង់ធំឱ្យទទួលបានជោគជ័យបន្ថែមទៀត។ជាមួយគ្នានោះដែរ ត្រូវការពារគ្រប់គ្រងឱ្យបានដាច់ខាតផ្ទៃដី ស្ថិតនៅក្នុងតំបន់ ពីរ  និងតំបន់បី ក្នុងភូមិសាស្ត្រ ក្រុង ស្រុក ទាំង ៦ មិនឱ្យមានបទល្មើសកើតឡើងជាដាច់ខាត៕

ដោយ ស៊ុម វណ្ណា