AKP ភ្នំពេញ ថ្ងៃទី១៥ ខែកញ្ញា ឆ្នាំ២០២៥--ក្នុងឱកាសនៃពិធីកាន់បិណ្ឌ ចាប់ពីថ្ងៃ១រោច ខែភទ្របទ ត្រូវនឹងថ្ងៃទី០៨ ខែកញ្ញា ប្រជាពលរដ្ឋអ្នកកាន់ព្រះពុទ្ធសាសនា នាំគ្នាអញ្ជើញទៅធ្វើបុណ្យនៅតាមទីវត្តអារាមទូទាំងរាជធានី-ខេត្ត ដោយមិនមានការភ័យខ្លាចអ្វីទាំងអស់ ខណៈប្រទេសជាតិកំពុងអនុវត្តបទឈប់បាញ់រវាង កម្ពុជា-ថៃ ដើម្បីស្វែងរកដំណោះស្រាយតាមរយៈការចរចាដោយសន្តិវិធី។

ក្ដីសប្បាយរបស់ប្រជាពលរដ្ឋ មានទឹកមុខស្រស់ស្រាយជ្រះថ្លាសប្បាយក្នុងការធ្វើបុណ្យទាននេះ ត្រូវបាន ឯកឧត្តមឧកញ៉ា សមូហកបណ្ឌិត ឡី សុភាព ប្រធានសមាគមសហព័ន្ធយុវជនសេដ្ឋកិច្ចកម្ពុជា និងជាប្រធានសម្ព័ន្ធភាពអង្គការសមាគម និងវិស័យឯកជននៅកម្ពុជា យល់ឃើញថា កើតចេញពីការជឿជាក់លើការដឹកនាំរបស់ប្រមុខរាជរដ្ឋាភិបាលដែលមានភាពច្បាស់លាស់ក្នុងការដោះស្រាយបញ្ហា ដោយឈរលើយន្តការបច្ចេកទេស និងយន្តការច្បាប់អន្តរជាតិ។

ក្នុងបទសម្ភាសន៍ជាមួយទីភ្នាក់ងារសារព័ត៌មានកម្ពុជា AKP នៅចុងសប្ដាហ៍កន្លងទៅនេះ ឯកឧត្តមឧកញ៉ា សមូហកបណ្ឌិត បានឱ្យដឹងថា តាំងពីចាប់ផ្ដើមចូលដល់ថ្ងៃកាន់បិណ្ឌមក ឯកឧត្តម បានអញ្ជើញទៅច្រើនវត្តហើយសង្កេតឃើញថា វត្តណាក៏ដូចវត្តណាដែរ មានពុទ្ធបរិស័ទច្រើនកុះករ ធ្វើបុណ្យដោយក្ដីសោមនស្សរីករាយ។

ឯកឧត្តមឧកញ៉ា សមូហកបណ្ឌិត ឡី សុភាព បានមានប្រសាសន៍ថា « ឆ្នាំនេះតាមខ្ញុំSurvey(ស្ទង់មើល) ខ្ញុំបានចុះ មកដល់ម៉ោងនេះ ខ្ញុំបានទៅ១៥វត្ត ១៥វត្តវាស្មើ១៥ខេត្ត មួយខេត្តខ្ញុំទៅមួយវត្ត អ៊ីចឹងយើងឃើញថា ប្រជាពលរដ្ឋ ទោះជាវាមានបញ្ហារវាងកម្ពុជា-ថៃ ក៏ពិតមែន ក៏ប៉ុន្តែប្រជាពលរដ្ឋយើងទៅវត្តទៅវ៉ាធម្មតា  លើកលែងតែខេត្តជាប់ព្រំដែនដែលមានបញ្ហាប៉ះទង្គិចតែប៉ុណ្ណោះ ក្រៅពីហ្នឹងធម្មតា ហើយសតិអារម្មណ៍ប្រជាពលរដ្ឋមានទំនុកចិត្តលើរាជរដ្ឋាភិបាល ទៅលើសម្ដេចមហាបវរធិបតី ហ៊ុន ម៉ាណែត និងសម្ដេចតេជោ ហ៊ុន សែន អ៊ីចឹងប្រជាជនគាត់អត់មានសតិអារម្មណ៍ភ័យព្រួយអីទេ គឺគាត់មានទំនុកចិត្ត១០០ភាគរយ»។

សូមជម្រាបជូនថា ជារៀងរាល់ឆ្នាំ ចាប់ពីថ្ងៃ១រោច ដល់ថ្ងៃ១៥រោច ខែភទ្របទ ប្រជាពលរដ្ឋខ្មែរតែងតែប្រារព្ធនូវពិធីបុណ្យកាន់បិណ្ឌ និងភ្ជុំបិណ្ឌនៅតាមទីវត្តអារាម ដោយធ្វើជាចង្ហាន់រាប់បាត្រប្រគេនព្រះសង្ឃ។ ពិធីបុណ្យដែលធ្វើតាមទំនៀមពីដូនតាមកនេះ ត្រូវបានដក់ជាប់ក្នុងគំនិតប្រជាពលរដ្ឋខ្មែរតជំនាន់មកថា វាជាពិធីដើម្បីឧទ្ទិសកុសល្យជូនទៅដល់ដូនតា និងញាតកាទាំង៧សណ្តានដែលបានចែកឋានទៅ ។

ពិធីបុណ្យភ្ជុំបិណ្ឌ ត្រូវបានចែកចេញជាពីរ គឺ៖ ទី១ ៖ ជារយៈពេលនៃការកាន់បិណ្ឌចាប់ពីថ្ងៃទី១រោចខែភទ្របទ រហូតដល់ថ្ងៃ១៤រោច ដោយប្រជាពលរដ្ឋខ្មែរតែងធ្វើចង្ហាន់ទៅប្រគេនព្រះសង្ឃ ។ ទី២ ៖ ថ្ងៃចុងក្រោយ គឺថ្ងៃ១៥រោច ដែលជាថ្ងៃភ្ជុំបិណ្ឌប្រជាពលរដ្ឋតែងធ្វើការជួបជុំគ្នាដើម្បីឆ្លងនូវសទ្ធាជ្រះថ្លា ដែលបានថ្វាយទានចំពោះភិក្ខុសង្ឃក្នុងរយៈពេល១៤ថ្ងៃកន្លងមក៕

ដោយ៖ គង់ សិរីរ័ត្ន