AKP ព្រះសីហនុ ថ្ងៃទី១៣ ខែកញ្ញា ឆ្នាំ២០២៥–ផ្ទះចំនួន ៤ខ្នង ត្រូវបានប្រគល់ជូនគ្រួសារទីទ័លក្រ ជនមានពិការភាព និងជនចាស់ជរាគ្នានទីពឹងនៅស្រុកព្រៃនប់ចំនួន ២ខ្នង និងស្រុកកំពង់សិលាចំនួន ២ខ្នង ហើយការប្រគល់នេះ ក្រោមអធិបតីភាព ឯកឧត្តម ម៉ាង ស៊ីណេត ប្រធានគណៈកម្មាធិការសាខាកាកបាទក្រហមកម្ពុជា ខេត្តព្រះសីហនុ ដោយមានការចូលរួមពីសមាជិក សមាជិកាគណៈកម្មាធិការសាខា អ្នកឧកញ៉ា លោកឧកញ៉ា ក្រុមប្រតិបត្តិសាខា អនុសាខាស្រុក និងអ្នកស្ម័គ្រចិត្ត នាថ្ងៃសៅរ៍ទី១៣ ខែកញ្ញា ឆ្នាំ២០២៥ ។  

ផ្ទះដែលបានប្រគល់ជូនប្រជាពលរដ្ឋទីទ័លក្រ ជនមានពិការភាព និងជនចាស់ជរាគ្នានទីពឹង មានទំហំ ៤មx៨ម ធ្វើអំពីដែកជញ្ជាំងស៊ីម៉ងម៍ ដំបូលប្រក់ស័ង្កសីក្រុមហ៊ុន មានចង្ក្រានបាយ តយាបផ្នែកខាងមុខ និងមានបង្គន់អនាម័យដែលជាផែនការសកម្មភាពឆ្នាំ២០២៥ ដែលស្ថិតនៅឃុំជើងគោ ១ខ្នង ឃុំតានៃ ១ខ្នង ក្នុងស្រុកព្រៃនប់ និងឃុំកំពង់សីលា២ខ្នង ក្នុងស្រុកកំពង់សីលា។ 

ក្នុងឱកាសនោះ ឯកឧត្តម ម៉ាង ស៊ីណេត ប្រធានគណៈកម្មាធិការសាខាកាកបាទក្រហមកម្ពុជា ខេត្តព្រះសីហនុ បានពាំនាំប្រសាសន៍ផ្តាំផ្ញើសួរសុខទុក្ខ និងសេចក្តីនឹករលឹកពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទ ក្រហមកម្ពុជា ដែលជានិច្ចកាលសម្តេចលោកតែងតែគិតគូរដល់សុខទុក្ខ ជីវភាពរស់នៅរបស់បងប្អូនប្រជាពលរដ្ឋគ្រប់រូប ដោយមិនប្រកាន់ពណ៌ សម្បុរ វណ្ណៈ ពូជសាសន៍ និន្នាការនយោបាយអ្វីឡើយ ស្របនឹងពាក្យស្លោក "ទីណាមានទុក្ខលំបាក ទីនោះមានកាកបាទក្រហមកម្ពុជា" នៅជាប់ជាមួយបងប្អូនប្រជាពលរដ្ឋគ្រប់រូប។ 

ឯកឧត្តម ប្រធានគណ:កម្មាធិការសាខា បានធ្វើការណែនាំដល់បងប្អូនប្រជាពលរដ្ឋត្រូវថែរក្សាសុខភាព ធ្វើអនាម័យឱ្យបានល្អជាប់ជាប្រចាំ ព្រោះកត្តាសំខាន់នោះ គឺការរស់នៅត្រូវប្រកាន់យកនៅចំណុចបីល្អគឺ រស់នៅស្អាត ផឹកស្អាត ហូបស្អាត និងគោរពច្បាប់ចរាចរណ៍ឱ្យបានខ្ជាប់ខ្ជួន ជាពិសេសចូលរួមបង្ការ ទប់ស្កាត់ការរីករាលដាលនៃជំងឺឆ្លងផ្សេងៗ។ ទន្ទឹមនោះការប្រែប្រួលអាកាសធាតុ និងបរិស្ថាន ដោយផ្តោតសំខាន់ចូលរួមកាត់បន្ថយការប្រើប្រាស់ថង់ប្លាស្ទិកនៅក្នុងសហគមន៍មូលដ្ឋាន ។ 

ក្នុងនោះ សាខាកាកបាទក្រហមខេត្តព្រះសីហនុ ក៏បានផ្តល់ជូននូវសម្ភារ:សម្រាប់គ្រួសារនីមួយៗ ដោយក្នុងមួយគ្រួសារ ទទួលបាន អង្ករ ៥០គីឡូក្រាម មី១កេស ត្រីខ១យួរ កន្ទេល១ ទឹកត្រី១យួរ ស្បែកជើង ៥គូសម្ភារៈផ្ទះបាយ ១ឈុត  ឃីត១កញ្ចប់ (មុង ភួយ សារុង ក្រមា) និងថវិកា ១០០,០០០រៀល ក្នុងនោះសមាជិកគណ:កម្មាធិការសាខាក៍បានឧបត្ថម្ភបន្ថែមក្នុង ១គ្រួសារ ៤០ម៉ឺនរៀល ៕

ដោយ៖ ងូ សុមុនី