AKP សៀមរាប ថ្ងៃទី១៣ ខែកញ្ញា ឆ្នាំ២០២៥–ថ្លែងបើកវេទិកាផ្គូរផ្គងធុរកិច្ច(Business Matching )រវាងផ្នែកឯកជន និងសហគមន៍ទេសចរណ៍/អេកូទេសចរណ៍ ក្នុងក្របខណ្ឌបណ្តាញអេកូទេសចរណ៍បឹងទន្លេសាប នៅខេត្តសៀម រាប នៅព្រឹកថ្ងៃទី១៣ ខែកញ្ញា ឆ្នាំ២០២៥ ឯកឧត្តមបណ្ឌិត ជុក ជំនោរ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ នៃក្រសួងទេសចរណ៍បានមានប្រសាសន៍ថា ការបើវេទិកានៅថ្ងៃនេះ គឺក្នុងគោលបំណងធ្វើបច្ចុប្បន្នភាពនៃវឌ្ឍនភាពបណ្តាញអេកូទេសចរណ៍បឹងទន្លេសាប(TEN)ដល់អ្នកចូលរួមក្នុងវេទិកាទាំងអស់។ 

ឯកឧត្តមបានបន្តថាដើម្បីបង្កើនប្រាក់ចំណូលបន្ថែមដល់សហគមន៍ ភ្នាក់ងារទេសចរណ៍ ក្រសួង ទេសចរណ៍ អង្គការជាតិ និងអន្តរជាតិ គួរតែគាំទ្របន្ថែមទៀតដើម្បីឱ្យវិស័យទេសចរណ៍កាន់តែមានភាពរស់រវើកនិងទាក់ទាញភ្ញៀវទេសចណ៍ឱ្យកាន់តែមានប្រសិទ្ធិភាពថែមទៀត។ ឯកឧត្តមបានបញ្ជាក់ថា បឹងទន្លេសាបជាតំបន់អេកូទេសចរណ៍ធម្មជាតិដែលមានសក្តានុពល និងមានសារៈសំខាន់ ហើយក្រសួងទេសចរណ៍ គឺរួមចំណែកយ៉ាងសំខាន់ក្នុងការគាំទ្រដល់ វិស័យឯកជន សហគមន៍មូលដ្ឋាន និងអង្គការជាតិនិងអន្តរជាតិ និងវិនិយោគិនទាំងអស់ ដូច្នេះវេទិកានេះពិតជាមានសារៈសំខាន់ណាស់ ដើម្បីផ្គូរផ្គង។

លោកជំទាវ ឆាយ ស៊ីវលីន ប្រធានសមាគមទេសចរណ៍កម្ពុជា(CATA) បានថ្លែងថា ភ្នាក់ងារទេសចរណ៍ទាំងអស់ត្រូវតែប្រើប្រាស់ផលិតផលសហគមន៍ដើម្បីលើកកម្ពស់ជីវភាពសហគមន៍ កន្លងមកបឹងទន្លេសាបក្រៅតែអំពីការធ្វើដំណើរ គឺយើងមិនទាន់បានប្រើអស់នូវសក្តានុពល ជាពិសេសផលិតផលផ្សេងៗដែលសហគមន៍អេកូទេសចរណ៍មាននៅឡើយទេ។លោកជំទាវបានលើកឡើងអំពីតំបន់សំខាន់ៗក្នុងខេត្តសៀមរាប ដូចជាតំបន់អេកូទេសចរណ៍ កំពង់ភ្លុក និងចុងឃ្នៀស គួរតែមានការរៀបចំឱ្យមានសកម្មភាពទេសចរណ៍បន្ថែមទៀតក្រៅតែពីការធ្វើសំណើរទេសចរណ៍ ជាក់ស្តែងនៅចុងឃ្នៀសគួររៀបចំឱ្យមានសៀឃ្វី និងផ្សព្វផ្សាយសកម្មភាពសមញ្ញៗបន្ថែមទៀតដូចជា ការនេសាទ បង់សំណាញ់ ហើយដៃគូពាក់ព័ន្ធទាំងអស់គួរតែគាំទ្របន្ថែមទៀតដើម្បីឱ្យវិស័យទេសចរណ៍កាន់តែមានភាពរស់រវើក និងទាក់ទាញភ្ញៀវទេសចណ៍ឱ្យកាន់តែមានប្រសិទ្ធិភាពថែមទៀត។

លោក យុក សេងឡុង នាយកប្រតិបត្តិអង្គការសម្ព័ន្ធភាពដើម្បីអភិរក្សធនធានជលផល(FACT) បានលើកឡើងថា យោងលើស្មារតីនៃវេទិកាលើកទី២ នៃបណ្តាញអេកូទេសចរណ៍បឹងទន្លេសាប ថ្ងៃនេះគឺជាឱកាសដ៏ល្អសម្រាប់ការជួបជុំជជែកពិក្សា ផ្គូរផ្គងរវាង វិស័យឯកជន និងសហគមន៍ទេសចរណ៍ និងអេកូទេសចរណ៍ និងការត្រៀមក្នុងការរៀបចំវេទិកាជាតិលើកទី៣ និងការលើកកម្ពស់វិស័យទេចរណ៍ និងអេកូទេសចរណ៍ ដើម្បីលើកកម្ពស់កំរិតជីវភាពសហគមន៍មូលដ្ឋាន ជាពិសេសសហគមន៍នេសាទជុំវិញបឹងទន្លេសាប ដើម្បីកាត់បន្ថយការនេសាទលើសកម្រិត៕

ដោយ៖ ឃុតសៅ