AKP ភ្នំពេញ ថ្ងៃទី១៣ ខែកញ្ញា ឆ្នាំ២០២៥--ម៉ាស៊ីនថតសួត ឌីជីថល មានភ្ជាប់បញ្ញាសិប្បនិម្មិតចំនួនបីគ្រឿង ត្រូវបានឯកឧត្តម ចិនហ្សាមិន ឆាង (Benjamin Chiang) ភារៈធារីស្ថានទូតសហរដ្ឋអាមេរិកប្រចាំកម្ពុជាប្រគល់ជូន   ដល់មជ្ឈមណ្ឌលជាតិកំចាត់រោគរបេង និងហង់សិនដែលមាន  លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការ ក្រសួងសុខាភិបាល  អញ្ជើញប្រគល់-ទទួល នាព្រឹកថ្ងៃសុក្រ ទី១២ ខែកញ្ញា ឆ្នាំ២០២៥។

  ម៉ាស៊ីនថតសួត ឌីជីថល មានភ្ជាប់បញ្ញាសិប្បនិម្មិត មានសមត្ថភាពអាចបង្កើនការរុករកជំងឺរបេងបានឆាប់រហ័ស និងជំរុញឱ្យការថែទាំព្យាបាលបានទាន់ពេលវេលា។ ការប្រើប្រាស់នូវឧបករណ៍ទំនើប និងបែបឌីជីថលទាំងនេះ ពិតជាបង្កើននូវលទ្ធភាព និងសមត្ថភាពរបស់អ្នកផ្តល់សេវារបេង ជាមួយនឹងលទ្ធផលកាន់តែជឿទុកចិត្ត និងឆាប់រហ័ស។

លោកជំទាវរដ្ឋលេខាធិការ បានថ្លែងអំណរគុណជូនដល់រដ្ឋាភិបាល ក៏ដូចជាប្រជាពលរដ្ឋសហរដ្ឋអាមេរិក ដែលតែងតែបានរួមចំណែកយ៉ាងសំខាន់ និងមិនអាចខ្វះបានសម្រាប់ការអភិវឌ្ឍវិស័យសុខាភិបាល និងសុខភាពសាធារណៈនៅកម្ពុជាទាំងនៅកម្រិតជាតិ និងនៅថ្នាក់ក្រោមជាតិ ក្នុងនោះរួមមានជំងឺរបេង អេដស៍ គ្រុនចាញ់ សុខភាពមាតា និងទារក កូវីដ-១៩ និងជំងឺឆ្លង និងមិនឆ្លងជាច្រើនទៀត៕

ដោយ៖ ពេជ្រ សំអឿន( ប្រភព៖ក្រសួងសុខាភិបាល )