AKP ភ្នំពេញ ថ្ងៃទី១៣ ខែកញ្ញា ឆ្នាំ២០២៥--រដ្ឋសភាកម្ពុជាតាមរយៈគណៈកម្មការទី៨ នៃរដ្ឋសភា ដឹកនាំដោយ លោកជំទាវ ឡោក ខេង ជាប្រធាន បានសហការជាមួយតំណាង UNFPA និង UN Women ដើម្បីរៀបចំកម្មវិធី «សភាធ្វើត្រាប់» (Model Parliament)។ កម្មវិធីនេះមានគោលបំណងលើកទឹកចិត្ត ពង្រឹងភាពក្លាហាន និងសមត្ថភាពរបស់ស្ត្រី និងក្មេងស្រី ឲ្យដើរតួនាទីជាថ្នាក់ដឹកនាំនយោបាយនាពេលអនាគត។

កម្មវិធី «សភាធ្វើត្រាប់» នេះនឹងផ្ដល់ឱកាសដល់ស្ត្រី និងក្មេងស្រីទូទៅ ក៏ដូចជាស្ត្រីដែលមានតួនាទីជាមេភូមិ មេឃុំ ឬសមាជិកក្រុមប្រឹក្សាឃុំ-សង្កាត់ មកពីទូទាំង ២៥ខេត្ត-រាជធានី ឲ្យបានចូលរួមបំពេញតួនាទីជាតំណាងរាស្ត្រ ឬអ្នកសម្រេចចិត្តផ្នែកនយោបាយ។ ពួកគេនឹងបានហ្វឹកហាត់ក្នុងការបញ្ចេញមតិជាសាធារណៈ ការពារសេចក្ដីព្រាងច្បាប់ ឬគោលនយោបាយសាធារណៈនានា ដើម្បីផលប្រយោជន៍រួមរបស់សហគមន៍ និងប្រទេសជាតិ។

លោកស្រី Sandra Bernklau តំណាង UNFPA និងលោកស្រី ឃុន សុភា អ្នកសម្របសម្រួលកម្មវិធីប្រចាំប្រទេសរបស់ UN Women បានលើកឡើងថា កម្មវិធីនេះជាផ្នែកមួយនៃយុទ្ធនាការរបស់អង្គការសហប្រជាជាតិក្នុងការជំរុញសមភាពយេនឌ័រ និងភាពជាអ្នកដឹកនាំរបស់ស្ត្រី។ ទំាងលោកស្រី Sandra Bernklau តំណាង UNFPA ក៏ដូចជា លោកស្រី ឃុន សុភា បានបង្ហាញការគោរព និងមោទនភាពចំពោះភាពជាអ្នកដឹកនាំដ៏លេចធ្លោរបស់លោកជំទាវ ឡោក ខេង ដែលបានធ្វើការយ៉ាងសកម្ម ដើម្បីសម្រេចបាននូវសមភាពយេនឌ័រជាក់ស្ដែងដូចជាកម្មវិធី «Girl2Leader» ជាដើម។ តាមរយៈការប្ដេជ្ញាចិត្តខ្ពស់របស់លោកជំទាវ ឡោក ខេង, UNFPA និង UN Women ជឿជាក់ថា ស្ត្រី និងក្មេងស្រីនឹងទទួលបានបទពិសោធន៍ដ៏ល្អ ដើម្បីបន្តវេនជាអ្នកដឹកនាំដ៏ក្លាហាន និងមានសមត្ថភាព។

លោកជំទាវ ឡោក ខេង បានបង្ហាញការពេញចិត្តចំពោះគំនិតផ្ដួចផ្ដើមនេះ និងបានផ្ដល់នូវទស្សនាទានសំខាន់ៗជាច្រើន ដើម្បីធានាឲ្យកម្មវិធីនេះទទួលបានជោគជ័យ។ លោកជំទាវបានជំរុញឲ្យ UNFPA និង UN Women រៀបចំផែនការលម្អិត រួមមានប្រធានបទ កម្មវិធីដំណើរការ ការចំណាយ និងការហូបចុក ក៏ដូចជាការស្នាក់នៅសម្រាប់ស្ត្រី និងក្មេងស្រីទាំង ២៥ខេត្ត-រាជធានី ដែលត្រូវបានជ្រើសរើសឲ្យចូលរួម។

លោកជំទាវបានសង្កត់ធ្ងន់ថា បញ្ហានៃវិសមភាពយេនឌ័រ គឺតម្រូវការជាក់ស្តែងរបស់សង្គមដែលអ្នកតំណាងរាស្ត្រទំាងអស់បានធ្វើការងារនេះជាច្រើនឆ្នាំមកហើយ ហើយនឹងរីករាយបន្តធ្វើដើម្បីផលប្រយោជន៍រួមរបស់សង្គម តាមរយៈការខិតខំរួមគ្នា បង្កើនភាពក្លាហាន ភាពជឿជាក់ និងសមត្ថភាពដល់ស្ត្រីនិងក្មេងស្រី ដើម្បីអោយពួគគេ អាចចូលរួមបានពេញលេញក្នុងនាមជាដៃគូរបស់បុរស ដើម្បីផលប្រយោជន៍សហគមន៍ និងប្រទេសជាតិទាំងមូល។

លោកជំទាវ ឡោក ខេង ក៏បានលើកឡើងថា ការសម្រេចបាននូវគោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ (SDG 2030) មិនអាចទៅរួចទេ បើគ្មានសន្តិភាពពេញលេញ។ ក្នុងន័យនេះ លោកជំទាវបានស្នើឲ្យ UNFPA និង UN Women ជួយធ្វើរបាយការណ៍បន្ថែមទៅកាន់អង្គការសហប្រជាជាតិ ដើម្បីស្នើឲ្យមានកិច្ចសហប្រតិបត្តិការដោយស្មោះត្រង់ពីភាគីថៃ ដើម្បីដោះស្រាយបញ្ហាព្រំដែន និងស្ដារទំនាក់ទំនងទ្វេភាគីឲ្យវិលទៅរកភាពប្រក្រតីឡើងវិញ ដើម្បីផលប្រយោជន៍រួមរបស់ប្រជាជននៃប្រទេសទាំងពីរ៕

ដោយ៖ ប៊ុនរិទ្ធ,ប្រភព៖ រដ្ឋសភា