AKP កំពង់ឆ្នាំង ថ្ងៃទី១៣ ខែកញ្ញា ឆ្នាំ២០២៥-- ឯកឧត្តម ឡុង ឈុនឡៃ អ្នកតំណាងរាស្រ្តមណ្ឌលកំពង់ឆ្នាំង បានផ្តាំផ្ញើដល់អាជ្ញាធរ សមត្ថិកិច្ច កម្លាំងប្រជាការពារ ចូលរួមថែរក្សាសន្តិសុខសណ្តាប់ធ្នាប់នៅតាមមូលដ្ឋាន ពិសេសតាមវត្តអារាម ជូនប្រជាពលរដ្ឋ។ ការផ្ដាំផ្ញើនេះ ធ្វើឡើងក្នុងឱកាសដែល ឯកឧត្តម អញ្ជើញចូលរួមកម្មវិធីបុណ្យដាក់បិណ្ឌវេនទី៥ ថ្ងៃទី១២ ខែកញ្ញា ឆ្នាំ២០២៥ នៅវត្តត្រពាំងបី ស្ថិតក្នុងសង្កាត់ផ្សារឆ្នាំង ក្រុងកំពង់ឆ្នាំង ដោយមានការអញ្ជើញចូលរួមពីលោក ឈាង វណ្ណៈ ប្រធានមន្ទីរព័ត៌មានខេត្តកំពង់ឆ្នាំង លោក សរ លាង ប្រធានមន្ទីរធម្មការនិងសាសនា រួមនឹងមន្ត្រីរាជការថ្នាក់ដឹកនាំមន្ទីរអង្គភាពជុំវិញខេត្តជាច្រើននាក់ផងដែរ។

ឯកឧត្តម អ្នកតំណាងរាស្រ្ត ក៏បាននាំនូវប្រសាសន៍ផ្តាំផ្ញើរសាកសួរសុខទុក្ខពីសណាក់អតីតសម្តេចប្រមុខរាជរដ្ឋាភិបាលនិងសម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជានាចក្រកម្ពុជាដែលជានិច្ចកាលសម្តេចតែងតែយកចិត្តទុកដាក់គិតគូរអំពីសុខទុករបស់ប្រជាពលរដ្ឋនៅគ្រប់ទីកន្លែង សុខទុក្ខរបស់ប្រជាពលរដ្ឋគឺជាក្តីកង្វល់របស់ថ្នាក់ដឹកនាំគ្រប់លំដាប់ថ្នាក់។ បច្ចុប្បន្នរាជរដ្ឋភិបាលនៃព្រះរាជានាចក្រកម្ពុជា បានធ្វើឱ្យប្រទេសកម្ពុជា មានការអភិវឌ្ឍឥតឈប់ឈរ តាំងពីក្រុងដល់ជនបទ ដូចជា ផ្លូវ ស្ពាន សាលារៀន មន្ទីរពេទ្យ និងសមិទ្ធផលផ្សេងៗទៀត។ ក្រៅពីនេះបានចូលរួមលើកកម្ពស់ កម្រិតជីវភាពប្រជាពលរដ្ឋបានកាន់តែប្រសើរឡើងផងដែរ។ 

ឯកឧត្តម ឡុង ឈុនឡៃ និងថ្នាក់ដឹកនាំមន្រ្តីរាជការដែលអញ្ជើញចូលរួម បានប្រារព្ធពិធីរាប់បាត្រឧទ្ទិសកុសលជូនដល់ញាតកាទាំង៧សណ្តានដែលបានចែកឋានទៅនោះ សូមមកទទួលយកនូវឥដ្ឋមនុញ្ញផលដែលបានធ្វើនាថ្ងៃនេះ ។ ទេយ្យទានទាំងនោះរួមមាន(សាដក៨កញ្ចប់, អង្ករ៨បាវ , ត្រីខ៨ យួរ, មីជាតិ ៨ កេស, ទឹកក្រូច ៨ កេស, និងទឹកសុទ្ធ ៨ កេស) និងមានបច្ច័យបង្សុកូលមួយចំនួនផងដែរ។

ពិធីបុណ្យកាន់បិណ្ឌ គឺជាពិធីបុណ្យធំមួយ ដែលប្រជាពលរដ្ឋ និង ពុទ្ធសាសនិកជនខ្មែរ តែងតែបានប្រារព្វធ្វើឡើង ចាប់ពីថ្ងៃ១រោច រហូតដល់ថ្ងៃ១៥រោច ខែភទ្របទ ។ ពិធីបុណ្យភ្ជុំបិណ្ឌ និងកាន់បិណ្ឌ គឺធ្វើឡើងដើម្បី ឧទ្ទិសកុសលចំពោះបេតបុគ្គលឬប្រេត ។ ដើម្បីឱ្យបានសេចក្ដីសុខចម្រើន សិរីសួស្ដីដែលកើតពីផលទានរបស់ខ្លួន និង ដើម្បីបង្កើតសាមគ្គីរបស់ជាតិ គឺការស្រុះស្រួលគ្នា ។  ដើម្បីរៀបចំធ្វើសង្ឃភត្ត ទំនុកបម្រុងព្រះសង្ឃដែលគង់ចាំព្រះវស្សាក្នុងវត្តរយៈពេល៣ខែ ចាប់តាំងពីថ្ងៃចូលវស្សារហូតដល់ថ្ងៃចេញវស្សា៕

ដោយ បៃ ស៊ីថុន