AKP ភ្នំពេញ ថ្ងៃទី១១ ខែកញ្ញា ឆ្នាំ២០២៥-- គំនិតផ្ដួចផ្ដើមពាក់ព័ន្ធនឹងការអប់រំ និងវប្បធម៌របស់ក្រុមហ៊ុន ALL DREAMS CAMBODIA ត្រូវបានលើកយកមកពិភាក្សារវាងឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយកដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងលោក Jacques GUICHANDUT តំណាងក្រុមហ៊ុន ALL DREAMS CAMBODIA នារសៀលថ្ងៃទី១១ ខែកញ្ញា ឆ្នាំ២០២៥ នៅទីស្តីការក្រសួងអប់រំ យុវជន និងកីឡា។ 

បើតាមការលើកឡើងរបស់លោក Jacques GUICHANDUT គំនិតផ្ដួចផ្ដើមពាក់ព័ន្ធនឹងការអប់រំ និងវប្បធម៌នេះ រួមមាន ១. ការប្រកួតប្រជែងពានរង្វាន់ចម្រៀងអន្តរជាតិជាពួកលើកទី២ “Royal Choral Award” នៅរាជធានីភ្នំពេញ នាអំឡុងខែឧសភា ឆ្នាំ២០២៧  និង២. កម្មវិធីបណ្ដុះបណ្ដាលអ្នកដឹកនាំក្រុមចម្រៀងជាពួក ដោយលោក Jacques GUICHANDUT បានគូសបញ្ជាក់ថា គំនិតផ្តួចផ្តើមពាក់ព័ន្ធនឹងការអប់រំ និងវប្បធម៌នេះ មានគោលបំណងជំរុញឱ្យមានការចូលរួមពីសំណាក់គ្រូបង្វឹក និងក្រុមចម្រៀងកម្ពុជានៅក្នុងការប្រកួតប្រជែងថ្នាក់ជាតិ ដែលនឹងប្រព្រឹត្តទៅក្នុងអំឡុងពេលនៃកិច្ចប្រជុំកំពូលហ្វ្រង់កូហ្វូនីលើកទី២០ ឆ្នាំ២០២៦ នៅប្រទេសកម្ពុជា និងនៅក្នុងការប្រកួតប្រជែងពានរង្វាន់អន្តរជាតិក្នុងឆ្នាំ២០២៧។

តាងនាមឱ្យក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ជួន ណារ៉ុន បានថ្លែងអំណរគុណដល់ក្រុមហ៊ុន ALL DREAMS CAMBODIA សម្រាប់គំនិតផ្ដួចផ្ដើមខាងលើ និងបានលើកទឹកចិត្តឱ្យមានការរៀបចំការបណ្ដុះបណ្ដាលគ្រូបង្រៀនជាមួយអ្នកស្ម័គ្រចិត្ត ឬគ្រូបង្វឹក និងការហ្វឹកហាត់ការច្រៀងចម្រៀងជាពួកនៅតាមគ្រឹះស្ថានសិក្សាសាធារណៈ និងគ្រឹះស្ថានសិក្សាឯកជន ព្រមទាំងលើកទឹកចិត្តឱ្យមានការរៀបចំកម្មវិធីពាក់ព័ន្ធនានា នៅតាមគ្រឹះស្ថានសិក្សាផងដែរ៕

ដោយ៖ ចាន់ សុភឿន (ប្រភព៖ ក្រសួងអប់រំ)